Lukas
Pengawit
1
Duh jero Teopilus sane wangiang tiang,
salam saking tiang,
Lukas.
Sampun akeh anake ngutsahayang nulis pakaryan Hyang Yesuse sane sampun mamargi ring tengah-tengah iragane.
2 Tulisane punika manut para anak sane dados saksi ring sekancan paindikan saking pengawitne.
Tur ipun ngortiang pengajahan saking Sang Hyang Pengardine punika dados ayah-ayahan ipune.
3 Sasampune tiang alon-alon mreksa sekancan paindikan sane sampun kakaryanin olih Hyang Yesus saking pengawit,
tiang minehang becik yening tiang nulis saha nyusun sekancan ceritane punika buat jerone.
4 Tiang malaksana sekadi punika mangda jerone uning indik pengajahan sane terima jerone punika yakti patut.
Dane Sakaria Polih Sabda Indik Yohanes Jagi Lekad
5 Ritatkala Herodes dados raja ring Negeri Yudea,
duk punika wenten rsi sane mapesengan Sakaria.
Dane puniki salah tunggal rsi ring sekan rsi Abiaa.
Rabin danene mapesengan Elisabet saking soroh sentanan rsi Harun.
6 Idup danene sareng kalih patut ring ajeng Sang Hyang Pengardi tur dane satinut tanpa ceda ring sekancan prentah lan ukum Sang Hyang Pengardine.
7 Nanging dane nenten madue oka krana dane Elisabet bekung tur dane makakalih sampun lingsir.
8 Kaceritayang mangkin,
soroh rsi Abia polih duman ngayah ring ajeng Sang Hyang Pengardi.
Kenten pada dane Sakaria ngamargiang tugas rsine punika.
9 Sekadi biasane para rsine ngocok undi mangda uning sira sane jagi ngenyitin menyan ring jeroan Genah Agung Mabakti kapining Sang Hyang Pengardi.
Irika dane Sakaria sane kapilih ngenyitin menyan.
10 Duk nglaksanayang upacara ngenyitin menyane,
anake akeh mabakti ring natah genah mabaktine punika.
Gambar: Dane Sakaria ngenyitin menyan (1:9)
11 Jeg saget dane Sakaria nyingakin wenten malekat Sang Hyang Tunggal ngadeg ring sisi kenawan meja tugu genah ngenyitin menyane.
12 Ritatkala dane Sakaria nyingakin malekate punika,
dane makesiab lan jejeh pisan.
13 Nanging malekate punika mabaos sapuniki,
“Eda ja jejeh,
Sakaria!
Sang Hyang Pengardi sampun mirengin pinunas ragane.
Kurenan ragane,
Elisabet lakar nglekadang pianak muani.
Ragane musti ngadanin anake cerik ento Yohanes.
14 Ragane bakal kalintang liang.
Buina liu anake bakal masukarena krana palekadan anak cerik ento.
15 Krana anake cerik ento bakal dadi anak luih ring ajeng Sang Hyang Tunggal;
ia tusing bakal nginem anggur wiadin inuman lenan ane ngranayang punyah.
Keto masih ia bakal setata kaebekin olih Roh Sang Hyang Pengardi uli di belingan memene.
16 Tur ia bakal nuntun liu anak Israele mangda mawali satinut kapining Sang Hyang Pengardi,
Sasembahan Tunggalb ipune.
17 Buina anake cerik ento bakal dadi utusan Sang Hyang Pengardi ane kuat apanga ngayah nganggon kuasa buka dane Eliac.
Ia bakal nuntun para bapane apanga mawali dame ajak pianaknyane,
tur anake ane tusing satinut,
katuntun buin apanga ngelah papineh ane beneh.
Buka keto ia nyiapang para krama apanga siaga buat Sang Prabu sane Kajanjiang.”
18 Raris dane Sakaria mabaos ring malekate sapuniki,
“Sapunapike carane titiang uning yening paindikane puniki prasida mamargi?
Krana titiang sareng kurenan titiange sampun lingsir.”
19 Raris malekate punika mabaos sapuniki,
“Tiang ene Gabriel ane ngayahin Sang Hyang Pengardi,
tur tiang kautus apanga nyeritayang orti becik ene tekening ragane.
20 Apa ane orahang tiang,
yakti mamargi di dinane ane suba kapastiang.
Sakewala krana ragane tusing pracaya,
ragane bakal tusing nyidang ngraos;
ragane bakal kolok kanti saluirin ane orahang tiang ento mamargi.”
21 Duk punika anake akeh nyantosang dane Sakaria.
Ipun sami angob krana dane sue pisan ring jeroan Genah Agung Mabakti kapining Sang Hyang Pengardi.
22 Duk dane medal,
dane nenten mresidayang mabaos ring anake akeh.
Punika mawinan anake akeh irika uning yening dane sampun nyingakin malekat Sang Hyang Pengardi ring jeroan genah mabaktine punika.
Raris dane Sakaria ngicen tanda nganggen tangan ring anake akeh krana dane kolok.
23 Sasampune puput ngayah ring genah mabaktine,
dane Sakaria budal ka jeron danene ring Pegunungan Yudea.
24 Sasampune paindikane punika mamargi,
rabin dane Sakaria inggih punika dane Elisabet mobot.
Raris dane Elisabet meneng ring jeron danene kantos limang bulan suene.
25 Dane Elisabet raris mabaos sapuniki,
“Sekadi asapunika,
Sang Hyang Tunggal nulungin titiang lan ngicalang rasa kimud titiange ring arepan anake akeh.”
Dane Maria Polih Sabda Indik Hyang Yesus jagi Lekad
26-27 Ring Kota Nasaret Wawidangan Galileane,
wenten anak bajang kari sukla sane mapesengan Maria.
Ipun sampun masemaya jagi marabian sareng dane Yusup saking soroh sentanan raja Daud idumun.
Ritatkala dane Elisabet sampun mobot nem bulan,
Sang Hyang Pengardi ngutus malekat Gabriel kapining dane Maria.
28 Malekate punika ngrauhin dane Maria saha mabaos,
“Duh Maria,
rahayu ja ragane.
Ragane suba maan wara nugraha lan Sang Hyang Tunggal nyarengin ragane!”
29 Irika,
dane Maria tengkejut saha bimbang mirengin baos malekate punika.
30 Raris malekate punika mabaos ring dane Maria sapuniki,
“Eda ja jejeh,
krana Sang Hyang Pengardi sweca tekening ragane.
31 Ragane bakal beling tur nglekadang oka lanang,
ane musti kaparabin Yesus!
32 Ida jagi agung tur jagi kasambat Putran Ida Sang Maha Luhur.
Sang Hyang Pengardi Sasembahan Tunggal jagi nadosang Putrane punika raja sekadi raja Daud,
leluhur Idane.
33 Turmaning Putrane punika jagi mamrentah dados raja salamin-laminne ring soroh sentanan dane Yakub,
tusing ada len anak Yahudi.
Tur karajaan Idane jagi kantos salamin-laminne.”
34 Raris dane Maria matur ring malekate sapuniki,
“Titiang anak bajang kari sukla.
Sapunapike paindikane punika prasida mamargi?”
35 Malekate punika nyaurin sapuniki,
“Roh Sang Hyang Pengardi jagi ngrauhin ragane,
lan kuasan Ida Sang Maha Luhur jagi nglingkubin ragane.
Ento mawinan Putrane ane lekad ento bakal kasambat Putra suci lan Putran Sang Hyang Pengardi.
36 Lan sujatine,
Elisabet nyaman ragane ane suba tua tur bekung ento,
jani suba beling nem bulan.
37 Krana Sang Hyang Pengardi prasida nglaksanayang sekancan paindikan.”
38 Dane Maria raris matur sapuniki,
“Titiang puniki parekan Sang Hyang Tunggal.
Durusang ja mamargi sekadi pikayunan Idane.”
Raris malekat punika matilar.
Dane Maria Ngrauhin Griyan Dane Sakaria
39 Kaceritayang mangkin,
dane Maria gelis-gelis nuju desan dane Elisabet sane wenten ring Pegunungan Yudea.
40 Sasampune rauh irika,
dane Maria ngranjing ka griyan dane Sakaria saha ngucapang salam kapining dane Elisabet sapuniki,
“Rahayu ja iraga makasami.”
41 Ritatkala dane Elisabet mirengin salame punika saking dane Maria,
glejat-glejut anake alit sane wenten ring weteng dane Elisabete.
Raris dane Elisabet kicen kuasa olih Roh Sang Hyang Pengardi
42 mangda mawicara keras sapuniki,
“Kaswecanin ja ragane luihan kapining anake istri-istri lianan,
tur kaswecanin ja anake alit ring weteng ragane.
43 Titiang ngrasa kaluihang krana dane Maria,
ibun Sang Ratu Agung titiange,
rauh ring titiang.
44 Ritatkala titiang mireng sambutan ragane,
anake alit ring weteng titiange glejat-glejut krana girang.
45 Bagia ja ragane krana pracaya indik pengandikan Sang Hyang Tunggale jagi mamargi.”
Kidung Dane Maria
46 Raris dane Maria mabaos sapuniki,
“Titiang ngagungang Sang Hyang Tunggal
antuk manah sane sujati.
47 Turmaning jiwatman titiange girang
krana Sang Hyang Pengardi sane ngrahayuang titiang.
48 Duaning Ida eling ring titiang,
parekan Idane sane nista.
Tur ngawit mangkin saluirin bangsa nganggep titiang niki bagia.
49 Krana Ida Sang Maha Kuasa,
ngardi paindikan sane agung kapining titiang,
suci ja parab Idane.
50 Samaliha,
welas asih Idane kicenin kapining anake sane subakti ring Ida,
ngantun ring pianak wiadin cucune sakayang-kayang.
51 Ida ngedengang kuasa nganggen tangan Idane,
lan Ida nyambragang tur ngenyagang anake sane manahnyane sumbar.
52 Para rajane katedunang saking linggih idane,
lan anake sane nista kaagungang.
53 Anake sane seduk jagi pepek antuk paindikan sane becik,
nanging sane sugih jagi katundung nenten makta napi-napi.
54-55 Ida nulungin parekan Idane,
inggih punika Bangsa Israel,
krana Ida eling janjin Idane ring dane Abraham,
leluhur iragane.
Duk punika Ida masemaya jagi ngedengang welas asih Idane
kapining dane Abraham tur soroh sentanan danene ngantun salamin-laminne.”
56 Kirang langkung tigang bulan suene dane Maria meneng sareng-sareng dane Elisabet.
Raris ipun mawali ka jeronnyane.
Dane Yohanes Lekad
57 Kaceritayang mangkin,
sasampune genep galahe,
irika dane Elisabet nglekadang oka lanang.
58 Duk punika,
para pisaga lan para semeton danene mirengin indik Sang Hyang Tunggal ngicen welas asih sane kalintang ageng ring dane Elisabet.
Raris ipun sami masukarena sareng dane Elisabet.
59 Duk anake alit punika mayusa kutus dina,
raris ipun jagi kasunat manut ukum agama Yahudine.
Lan anake sane rauh mrika meled ngwastanin anake alit punika Sakaria sekadi pesengan ajin ipune.
60 Nanging ibun anake alit mabaos sapuniki,
“Sampunang ja!
Anake alit puniki musti kawastanin Yohanes.”
61 Raris ipun sami sane wenten irika mabaos sapuniki,
“Ngudake kawastanin Yohanes?
Krana nenten wenten saking kaluargan ragane mapesengan sekadi punika!”
62 Raris anake irika ngicen tanda nganggen tangan jagi mataken kapining dane Sakaria,
sirake jagi kawastanin anake alit punika.
63 Irika dane Sakaria nunas papan raris nulis sekadi puniki,
“Wastannyane Yohanes.”
Raris anake sane wenten irika pada angob krana wastane punika pateh sekadi sane kicen olih dane Elisabet.
64 Jeg saget,
dane Sakaria mresidayang mawicara malih tur dane ngagungang Sang Hyang Pengardi.
65 Irika raris para pisagane pada jejeh krana nyaksiang kuasan Sang Hyang Pengardi,
tur orti paindikane punika dados kasub ring saluirin Pegunungan Yudea.
66 Makasami anake sane mirengin ortine punika pada mapineh saha mabaos,
“Kenken lakar penadine anake cerik ento manian?”
Krana anake alit punika kasarengin olih Sang Hyang Pengardi.
Kidung Dane Sakaria
67 Dane Sakaria,
ajin anake alit punika,
kakuasain olih Roh Sang Hyang Pengardi.
Irika raris dane midartayang pabesen saking Sang Hyang Pengardi sekadi puniki,
68 “Kaagungang ja Sang Hyang Pengardi,
Sasembahan Tunggal Bangsa Israele!
Ida rauh nulungin kraman Idane tur mebasang iraga sami.
69 Ida ngicen Juru Rahayu sane kukuh,
saking soroh sentanan raja Daud,
parekan Idane idumun.
70 Sekadi punika sapengrauh Juru Rahayu sampun katrawang idumun olih para sinoman Idane sane suci,
71 Inggih punika iraga karahayuang saking musuh-musuh iragane
lan saking kuasan anake sane gedeg kapining iraga.
72 Sane mangkin Sang Hyang Pengardi muktiang welas asih Idane ring leluhur iragane,
krana janjin Idane sane suci punika kalaksanayang.
73-74 Ida masumpah ring dane Abraham leluhur iragane sami,
lan majanji jagi ngrahayuang iraga saking musuh-musuh iragane.
Mangdane iraga ngayahin Ida tanpa rasa jejeh kapining musuh-musuh iragane,
75 Turmaning iraga jagi ngayahin Ida malantaran urip sane suci lan patut ring ajeng Sang Hyang Pengardi selantang tuuh iragane.”
76 Raris dane Sakaria mabaos kapining okan danene sapuniki,
“Duh cening pianak aji,
cening jagi kasambat sinoman saking Sang Hyang Pengardi Sane Maha Luhur.
Krana cening kautus sadereng sapengrauh Sang Prabu sane Kajanjiang,
mangda nabdabang margi buat Sang Prabu punika.
77 Tur cening jagi ngortiang kapining krama Sang Hyang Pengardine indik ipun kabebasang saking ukuman,
krana dosan-dosannyane kaampurayang.
78 Sang Prabu punika jagi rauh sekadi sinar ai rikala semeng,
krana Sang Hyang Pengardi welas asih tur sayang.
79 Sekadi punika Sang Hyang Pengardi ngicen galang ring manusane sami,
sane urip ring kapetengan lan baya padem.
Sang Prabu punika jagi nuntun iraga,
nuju margi sane dame.”
80 Okan dane Sakaria inggih punika dane Yohanes ngancan kelih tur jiwatmannyane kuat.
Ritatkala dane Yohanes kelih,
dane meneng ring genah sane bengang linggah.
Irika dane Yohanes meneng kantos rauh galah danene midartayang pengajahan saking Sang Hyang Pengardi ring Bangsa Israel.