دانیال نبیئے کتاب
دانیال نبیئے کتابئے پجّار
دانیال نبیئے کتاب دو زُبانا، اِبرانی و اَرامیا نبشته کنگ بوتگ. دانیال نبی، اِسراییلی ورناے اَت. سال 605 پێشمیلادا، بابِلئے بادشاه نِبوکَدنِزَرا اسراییلئے سرا اُرُش کرت. بازێن دگه مردُمێئے همراهیا دانیال هم آوار جنَگ و بابِلا برگ بوت. چه آ وهدا و رند دانیالا وتی سجّهێن اُمر بابِل و پارسئے بادشاهانی دربارا گوازێنت. دانیالا، بابِلی بادشاه نِبوکَدنِزَر و بلشازَرئے دئور هم دیستگ و ماد بادشاه داریوش و پارس بادشاه کورُشئے زمانگ هم دیستگ. اے سَرگوَست و اِلهام که دانیالئے کتابا مان اَنت، 605 تان 536 پێشمیلادا بوتگاَنت و پێشَ دارنت که اے کتاب شَشُمی کَرن پێشمیلادا نبشته کنگ بوتگ.
دانیالئے کتابئے هپتُمی تان دوازدَهُمی دَر، یونانی و رومی مَزَنواکانی جاه جنَگئے گپّا کنت. بازێن دگه انچێن چِست و اێرێئے گپّا هم یکّ و ٹِکّا کنت که چه دانیالئے پئیگمبریئے دئورا باز رندتِرا بوتگاَنت. پاکێن کتابئے نمَنّۆک هئیالَ کننت که هُدا دێمئے کارانَ نزانت و زاهر کرتِشَ نکنت. پمێشکا گوَشنت که اے کتاب باز رندتِرا نبیسگ بوتگ. بله په باوَرمندان اے گپّ تچک اِنت که هُدا دێمئے کارانَ زانت و زاهر کرتِشَ کنت.
کتابئے ائوَلی، سئیُمی و ششُمی دَر همے گپّئے سرا اَنت که دانیال و آییئے سنگت انچێن جاگهێا وتا پاک و پلگارَ دارنت که سجّهێن نێمگان بُتپرَستی اِنت. کِرّ و گوَرئے مردُمانی چمّ هم سَکّ اَنت که دانیال و آییئے سنگت رَدێن کارے بکننت و گِرَگ ببنت. هُدا دو رندا آیان چه مرکا رَکّێنیت. دانیالا بابِلی و پارس بادشاهانی گوَرا مزَنێن اُگده گۆن بوتگ و انگت بُتپرَستانی نیاما وتی هُدائے سرا وتی باوَری مُهر داشتگ.
کتابئے دومی و چارُمی دَرا، دانیال دو وابئے مانایا گوَشیت که بادشاه نِبوکَدنِزَرا دیستگاَنت. کتابئے پنچُمی دَرا، اَناگت دستے زاهِرَ بیت و شاهی دیوانجاهئے دیوالئے سرا اَنچێن چیزّے نبشتهَ کنت که کسّی وانتَ نکنت. دانیال، اے نبشتها هم وانیت و مانا کنت.
کتابئے هپتُمی تان دوازدَهُمی دَر هما اِلهامانی گپّا کنت که دانیال نبیا دیستگاَنت و آیۆکێن وهدئے بارئوا اَنت. چه اے کاران بازێنے سرجم بوتگ: دانیال، پارس بادشاهیئے کپگئے پێشگۆیا کنت، سِکندَرئے آیگ و پدا آییئے کپگئے هبرا کنت، سِکندَرئے بادشاهیئے بهر و بانگ بئیگئے گپّا کنت، شمال بزان سوریَهئے و جُنوب بزان مِسرئے بادشاهانی هبرا کنت، په زێباێن مُلک، اِسراییلا اے بادشاهانی نیامئے هما جنگانی هبرا هم کنت که رَندا بنت.
دانیال، هما واده داتگێن مسیهئے آیگئے پێشگۆیا هم کنت، ایسّا مسیهئے. ایسّائے جندا هم که وتی تالیم و درسانی تها هلاسیئے وهدئے بارئوا هبر کرتگ، دانیالئے پێشگۆیانی مِسالی داتگ. اِشیئے مانا اِش اِنت که دانیالئے لهتێن پێشگۆی دنیائے هلاسیئے وهدئے بارئوا اَنت و انگت سرجم نبوتگاَنت.
ما دانیال نبیئے کتابئے تها گِندێن که جهانئے چست و اێر انسانئے دستا نهاَنت، هُدائے دستا اَنت و هُدا اے سجّهێن چیزّان دێم په هما منزِلا بَران اِنت که آییئے وتی واهگ اِنت و گُڈسرا، هُدا وتی بادشاهیا برجمَ کنت. اے دنیایا، هُدائے باوَرمَند مُدام چۆ دَرامَدا اَنت بله انگت وتی باوَرئے سرا مُهر اۆشتاتَ کننت و اَنچێن زندے گوازێنتَ کننت که هُدا چه آیان رَزا و وَشنۆد ببیت.