هُداوندئے شان چه زمین و آسمانا بُرزتر اِنت
148
هُداوندا بنازێنێت، هَلّێلویا.چه آسمانان هُداوندا بنازێنێت،
برزێن جاگهان آییا ستا کنێت.
2 او آییئے سجّهێن پرێشتگان! آییا ستا کنێت.
او آییئے سجّهێن آسمانی لشکران! آییا ستا کنێت.
3 او ماه! او رۆچ! آییا ستا کنێت.
او سجّهێن دْرپشناکێن اِستاران! آییا ستا کنێت.
4 او بُرزێن اَرش! آییا ستا کن.
او آسمانئے سربرئے آپان! آییا ستا کنێت.
5 اے سجّهێن، هُداوندئے ناما ستا بکناتنت،
چێا که چه هماییئے هُکما جۆڑ بوتگاَنت.
6 هماییا اے سجّهێن، اَبد تان اَبد برجاه داشتگاَنت و
اَنچێن هُکمے داتی که هچبر دئور دئیگ و ناکار کنگَ نبیت.
7 هُداوندا چه زمینا ستا کنێت،
شما او سجّهێن دریایی سَهداران و زِرئے سجّهێن جُهلانکیان،
8 او گِرۆک و ترۆنگل، برپ و جمبران،
او توپانێن گواتان که هماییئے هُکما برجاهَ دارێت،
9 او کۆه و سجّهێن جُمپان،
او نیبگی درچک و سجّهێن گَزّان،
10 او رستر و سجّهێن دَلوَتان،
او کسانێن جانوَر و بالی مُرگان،
11 او زمینئے بادشاه و سجّهێن کئومان،
او زمینئے شهزادگ و سجّهێن هاکمان،
12 او ورناێن مردێن و جنێنان،
او پیرێنان، گۆن چُکّان یکجاه!
13 اے سجّهێن، هُداوندئے ناما ستا بکناتنت،
چێا که تهنا هماییئے نام مزنشان اِنت،
هماییئے شان و شئوکت چه زمین و آسمانا بُرزادتر اِنت.
14 آییا کانٹے* په وتی کئوما بُرز کرتگ،
آییئے سجّهێن وپادارێن هزمتکارانی ستا،
اِسراییلئے ستا، کئومے که گۆن آییئے دلا نزّیکّ اِنت.
هُداوندا بنازێنێت، هَلّێلویا.