هُداوند پْرُشتهدِلان دْراهَ کنت
147
هُداوندا بنازێنێت، هَلّێلویا،مئے هُداوندئے نازێنگ چۆن وشّ اِنت و
آییئے ستا کنگ دلکشّ.
2 هُداوند اورشَلیما چه نۆکسرا اَڈَّ کنت و
اِسراییلئے دَرانڈێهان یکجاهَ کنت.
3 پْرُشتهدِلان دْراهَ کنت و
ٹپّانِشَ بندیت.
4 اِستاران هسابَ کنت و
هر یکّێا په نام تئوارَ کنت.
5 مئے هُداوند مزن اِنت، زۆری بێکِساس،
آییئے زانت و زانگا کدّ و کِساس نێست.
6 هُداوند بێکِبران کُمکَّ کنت،
بله بدکاران زمینا دئورَ دنت.
7 هُداوندا گۆن شُگرگزاری بنازێنێت،
په مئے هدایا سرۆز و چَنگ بجنێت.
8 آ، آسمانا گۆن جمبرَ پۆشێنیت و
زمینا هئورَ بَکشیت و
کۆهانی سرا سبزگَ رۆدێنیت.
9 آ، هئیوانان وراکَ دنت و
گوَراگان هم، وهدے پریاتَ کننت.
10 آ، اسپانی زۆرا گَلَ نبیت و
نه که جنگۆلانی پادان.
11 هُداوند همایانی سرا وشَّ بیت که چه آییا تُرسنت و
سجّهێن اۆست و اُمێتِش گۆن آییئے مِهرا اِنت.
12 او اورشَلیم! هُداوندا ستا کن،
او سَهیون! هُداوندا بنازێن.
13 هما تئیی دروازگانی کڑیان مُهرَ داریت و
تئیی دیوالانی تها، تئیی چُکّان برکتَ دنت.
14 تئیی مَرز و سیمسران اێمنَ کنت و
ترا چه گهترێن گندما سێرلاپَ کنت.
15 وتی هُکما زمینا راهَ دنت و
آییئے هبر تێزیا شِنگَ بیت.
16 برپا چۆ پژما شِنگَ کنت و
نۆدا پُرئے پئیما شانکَ دنت.
17 ترۆنگلا نانئے هوردگانی پئیما اێرَ دنت،
کئے آییئے برپێن سارتیئے دێما اۆشتاتَ کنت؟
18 وتی هبرا راهَ دنت و هر چیزّ آپَ بیت،
وتی گواتا دێمَ دنت و آپَ رُمبنت و تچنت.
19 وتی هبرا په آکوبا آشکارَ کنت و
وتی هُکم و پرمانا په اِسراییلا.
20 اے کاری په دگه هچّ کئومێا نکرت و
اے دگه کئوم آییئے رهبندانَ نزاننت.
هُداوندا بنازێنێت، هَلّێلویا.