هُداوند بندیگان آزاتَ کنت
146
هُداوندا بنازێنێت، هَلّێلویا.او منی ارواه! هُداوندا بنازێن.
2 تان زندگ آن هُداوندا ستا کنان
تانکه هَستان وتی هُدایا نازێنان.
3 شهزادگانی سرا تئوکل مکنێت،
مردمانی سرا، که رَکّێنتَ نکننت.
4 اَرواهِش که درَ کئیت، زمینا پِرَ ترّنت و
هما رۆچا آیانی سجّهێن شئور و هئیال گار و زئوالَ بنت.
5 بَهتاور هما اِنت آکوبئے هُدا آییئے کُمکّ اِنت،
هما که اُمێتی وتی هُداوندێن هُدائے سرا اِنت،
6 هماییئے سرا که زمین و آسمانئے جۆڑ کنۆک اِنت و
دریا و هر چے که دریایا هست،
هماییئے سرا که تان اَبد وپادار اِنت،
7 زُلم دیستگێنانی دادرسیا کنت و
شدیگان وراکَ دنت.
هُداوند بندیگان آزاتَ کنت،
8 هُداوند کۆرانی چمّان پچَ کنت،
هُداوند همایان چستَ کنت که لگَتمال اَنت،
هُداوند پهرێزکاران دۆستَ داریت،
9 هُداوند درامدانی نِگهپانیا کنت و
چۆرئو و جنۆزامانی هئیالا داریت،
بله بدکارانی راها چَپّ و چۆٹَ کنت.
10 هُداوند تان اَبد بادشاهیَ کنت،
تئیی هُدا، او سَهیون، نَسلانی نَسل.
هُداوندا بنازێنێت، هَلّێلویا.