هُداوندئے ناما بنازێنێت
135
هُداوندا بنازێنێت، هَلّێلویا.هُداوندئے ناما بنازێنێت،
او هُداوندئے هزمتکاران، هُداوندا بنازێنێت،
2 شما سجّهێن که هُداوندئے لۆگا هزمتَ کنێت،
مئے هُدائے لۆگئے پێشگاها.
3 هُداوندا بنازێنێت چێا که هُداوند نێک اِنت،
په سئوت آییئے ناما بنازێنێت که دلکَشّ اِنت.
4 چێا که هُداوندا آکوب په وت گچێن کرتگ،
اِسراییل، که په آییا گنجے ببیت.
5 منَ زانان که هُداوند مزن اِنت،
که مئے هُداوند چه سجّهێن هُدایان مستر اِنت.
6 هرچے که هُداوند آسمانان و زمینا،
دریایان و دریایانی سجّهێن جُهلانکیان کنگ بلۆٹیت، کنت.
7 چه زمینئے گُڈّی هَدّ و سیمسران جمبران چستَ کنت،
گِرۆکان گۆن هئوران رئوانَ دنت و
چه وتی امباران گواتا ڈنّا کاریت.
8 هماییا مِسرئے ائولی چُکّ جتنت،
مردمانی ائولی چُکّ و دَلوَتانی هم.
9 او مِسر! تئیی نیاما وتی نشانی و مۆجزهی رئوان داتنت،
پِرئون و آییئے سجّهێن هزمتکارانی هلاپا.
10 بازێن کئومے جتی و
آیانی پُرواکێن بادشاهی کُشتنت،
11 اَموریانی بادشاه سیهۆن،
باشانئے بادشاه اۆگ و
کَنهانئے سجّهێن بادشاه و
12 آیانی سرڈگاری میراسے کُرتنت
میراسے په وتی مهلوکا، په اِسراییلا.
13 او هُداوند! تئیی نام تان اَبدَ مانیت و
تئو نَسلانی نَسل یات کنگَ بئے، او هُداوند!
14 چێا که هُداوند وتی مهلوکئے دادرسیا کنت و
په وتی هزمتکاران رهمَ کنت.
15 کئومانی ”هُدا“ تلاه و نُگرَه اَنت،
انسانئے دستئے جۆڑ کرتگێن بُت.
16 دپِش پِر بله هبر کرتَ نکننت،
چَمِّش پِر بله دیستَ نکننت،
17 گۆشِش پِر بله اِشکتَ نکننت
و دپا ساهِش مان نێست.
18 هرکَس که اِشان جۆڑَ کنت، همِشانی پئیما بیت و
هرکس که اِشانی سرا تئوکلَ کنت هم انچشَ بیت.
19 او اِسراییلیان! هُداوندا بنازێنێت.
او هارونئے لۆگ! هُداوندا بنازێنێت.
20 او لێویئے لۆگ! هُداوندا بنازێنێت.
او هُداتُرسان! هُداوندا بنازێنێت.
21 چه سَهیونا هُداوندا بنازێنێت،
هما که اورشَلیما جَهمنند اِنت.
هُداوندا بنازێنێت، هَلّێلویا.