هُداوندئے نام مئے مدَت اِنت
دێم په اورشَلیما برزاد رئوگئے سئوتے. داوودئے زَبور.
124
”اگن هُداوند گۆن ما گۆن مبوتێن،“اِسراییل بگوَشات:
2 ”اگن هُداوند گۆن ما گۆن مبوتێن
آ وهدا که مردمان مئے سرا اُرُش و همله کرت،
3 آیان مارا زندگا اێر برتگاَت
وهدے هِژمِش مئے سرا چِست اَت.
4 آ وهدا آپان مارا اێر برتگاَت،
هار و توپّانا مارا مان رُپتگاَت،
5 مَستێن آپان
مارا رۆپان کرتگاَت.“
6 هُداوندا ستا بات
که نهاِشتی ما اِشانی دنتانانی شکار ببێن.
7 مئے زندی انچۆ رَکّێنت که
بالی مُرگے چه شکاریئے داما،
دام دِرت و ما رکّتێن.
8 هُداوندئے نام مئے مدَت اِنت،
آسمان و زمینئے جۆڑ کنۆکئے نام.