هُدائے مۆجزهان یات کنێت
105
هُداوندئے شُگرا بگرێت وهماییئے ناما بگرێت،
کئومان چه آییئے کاران سهیگ کنێت.
2 آییا بنازێنێت، آییا په سئوت بنازێنێت،
آییئے سجّهێن باکَمالێن کارانی هبرا بکنێت.
3 آییئے پاکێن نامئے سرا پَهر بکنێت،
هُداوندئے شۆهاز کنۆکانی دل شادمان بات.
4 هُداوند و آییئے زۆر و واکئے لۆٹۆک ببێت،
مُدام آییئے چِهرگئے دیدارئے شۆهازا ببێت.
5 آییئے کرتگێن باکَمالێن کاران یات کنێت،
آییئے مۆجزه و داتگێن هُکمان،
6 او آییئے هزمتکارێن اِبراهێمئے نَسل،
او آکوبئے چُکّان که آییئے گچێن کرتگێن اێت!
7 آ، هُداوند مئے هُدا اِنت.
آییئے دادرسی سجّهێن جهانا رسنت.
8 آ وتی اَهد و پئیمانا تان اَبد یاتَ کنت،
هما لَبز که آییا گۆن هزار نَسلا کرت،
9 هما اَهد که گۆن اِبراهێما کرتی و
هما سئوگند که گۆن اِساکا وارتی،
10 گۆن آکوبا کرارے بَست و پکّایی کرت،
گۆن اِسراییلا، اَبدمانێن اَهدے.
11 ”کَنْهانئے سرڈگارا ترا بَکشان،
که شمئے بَهر و میراسَ بیت.“
12 آ وهدا که اے کَمُّک مردم اَتنت،
کَمُّک اَتنت و درامد،
13 اے کئوم و آ کئومئے نیاما دَرپَدَر اَتنت،
اے مُلک و آ مُلکا گَشتنت.
14 کَسّا آیانی سرا زُلم کنگی نهاِشت،
په آیانیگی، آییا بادشاه نِهِر داتنت:
15 ”منی ’رۆگن پِر مُشتگێنان‘* دست پِر مکنێت و
منی نبیان نُکسان مدئیێت.“
16 زمینا ڈُکّالی اێر آورت و
آیانی نانئے اَمباری پْرۆشتنت.
17 آیانی دێما مردمے رئوانی دات،
ایسُّپ، که گُلامێئے هسابا بها کنگ بوت.
18 آییئے پادِش په بند و زمزیل ٹَپّیگ کرتنت و
آسنێن تئوکے گُٹّا داتِش،
19 تان هما وهدا که آییئے هبر راست بوتنت،
هُدائے هبرا آییئے راستی پکّا کرت.
20 بادشاها ایسُّپ لۆٹت و آزات کرت،
مردمانی هاکما آزات کرت.
21 بادشاها وتی لۆگئے مَستِر کرت،
وتی سجّهێن مال و مِلکتئے هاکم،
22 که بادشاهئے کارندهان وتی تَبا اَدب بکنت و
کَماشان داناییئے تالیما بدنت.
23 نون اِسراییل مِسرا آتک،
آکوب، هامئے سرڈگارا* په دَرامدی جَهمنند بوت.
24 وتی مهلوکی آباد و
چه آیانی دژمنان زۆراورتِر کرتنت.
25 دژمنانی دلی گَردێنت تان چه آییئے کئوما نپرت بکننت و
آییئے هزمتکارانی هلاپا پَندَل بسازنت.
26 آییا وتی هزمتکارێن موسّا رئوان دات و
هارون، که وت گچێنی کرتگاَت.
27 اِشان مردمانی نیاما هُدائے اجبّتێن نشانی و
آییئے مۆجزه پێش داشتنت، هامئے سرڈگارا.
28 آییا تهاری رئوان دات و زمین تهار کرت،
آییئے هبرئے ناپرمانیاِش نکرتگاَت.
29 آیانی آپی هۆن کرت و
ماهیگی کُشتنت.
30 سرڈگارِش چه پُگُلا پُرّ بوت
که تان آیانی بادشاهی وابجاهان سر بوتنت.
31 آییا هبر کرت و مکسکانی لشکر آتکنت و
پَشَّگ آیانی سجّهێن مُلکا مان رتک.
32 هئورئے بدلا ترۆنگلی گْوارێنت،
آس و بیر، آیانی سجّهێن سرزمینا.
33 آیانی انگور و اِنجیرئے درچکی تباه کرتنت و
مُلکئے درچکی پرۆشتنت.
34 هُکمی کرت و مَدَگ آتکنت،
کَٹَگ*، بێهسابا.
35 آیانی مُلکئے سجّهێن سبزَگِش وارتنت و
هاکئے سجّهێن بَر و سَمرِش اێر برت.
36 نون آیانی سجّهێن ائولی چُکّی جتنت
آیانی مردانگیئے ائولی بَر و سَمر.
37 وتی مردمی زَرّ و سُهرا بار کرت و ڈنّا آورتنت و
چه آیانی کَبیلهان کَسّا ٹگل نئوارت.
38 مِسر چه بنی اِسراییلئے رئوگا گَل بوت،
چێا که آیانی تُرسا گار اَت.
39 آییا جمبرے ساهێل کرت و پۆشێنتنت،
آسے رۆکی کرت که شپا رُژناییاِش بدنت.
40 آیان لۆٹِت و هُداوندا بئینکوێن* مُرگ رئوان دات و
آیی گۆن آسمانی نگنا سێر کرتنت.
41 تلارے تَلی دات و آپ رئوان بوت،
گیابانا کئورے تَتک.
42 چێا که وتی پاکێن کئولی یات اَت
که گۆن وتی هزمتکارێن اِبراهێما کرتگاَتی.
43 آییا وتی کئوم په شادمانی ڈنّا آورت،
وتی گچێن کرتگێن، گۆن شادهیئے کوکّاران.
44 آیانا راجانی سرڈگاری دات و
آ، کئومانی کرتگێن مهنتانی مالک بوتنت،
45 که آییئے رهبندانی رَندگیریا بکننت و
آییئے شَریَتئے هُکمانی سرا کار بکننت.
هُداوندا بنازێنێت، هَلّێلویا.