آییئے پادانی پدگئے دێما سُجده کنێت
99
هُداوند بادشاهیَ کنت،کئوم بِلَرزاتنت،
آ، کَرّوبیانی* نیاما، وتی بادشاهی تهتا نِشتگ،
زمین بِلَرزات.
2 سَهیونا، هُداوند مزن اِنت،
بُرزێن اَرشئے هُدا، سجّهێن کئومانی سرا هاکم.
3 تئیی مزن و باکَمالێن ناما ستا کناتنت،
هُداوند پاک اِنت.
4 بادشاه زۆراور اِنت، اَدلی دۆستَ بیت.
تئو، او هُدا، اِنساپ برجاه داشتگ،
سجّهێن اِسراییلا* تئو هما کار کرتگ که
په اَدل و اِنساپ اَنت.
5 مئے هُداوندێن هُدایا شان و شئوکت دئیێت و
آییئے پادانی پدگئے دێما پرستش کنێت،
که آ پاک اِنت.
6 موسّا و هارون چه هماییئے دینی پێشوایان اتنت و
سَموییل هم چه همایان اَت که هُداوندئے نامِش گپت.
هُداوندِش تئوار کرت و
آییا پَسّئو داتنت.
7 چه جمبرئے سُتونا گۆن آیان هبری کرت و
آیان هم هما هُکم و شَریَت برجاه داشت که داتگاَتی.
8 او هُداوند، مئے هُدا! تئو آ پَسّئو داتنت،
تئو په اِسراییلا پَهلّ کنۆکێن هُداے اتئے،
هرچُنت که آیانی گناهانی سزااِت هم دات.
9 مئے هُداوندێن هُدایا شان و شئوکت بدئیێت،
آییئے پاکێن کۆهئے سرا آییا پرستش کنێت،
که هُداوند، مئے هُدا پاک اِنت.