هُدائے دێما کئے اۆشتاتَ کنت؟
په سازگر و وشآوازانی سالارا. گۆن سیمّی سازان. اَساپئے زَبور. سئوتے.
76
یَهودیَها هُدا زانگ و پجّاه آرگَ بیت،اِسراییلا آییئے نام مزن اِنت.
2 آییئے تَمبو شَلیما* اِنت و
منندجاه، سَهیونا.
3 آسگوارێن تیری همۆدا پرۆشتنت،
زَهم و اِسپر هم، که جنگی سِلاه اَنت. اۆشت...
4 تئو دْرپشان ائے و
شئوکت و شانِت، چه آ کۆهِستگان زێباتر اِنت که شکارا پُرّ اَنت.
5 دلێر آوار جَنَگ بوتنت،
وتی گُڈّی وابا اَنت،
چه جنگاوران یکّے هم نمنت
که دستے بسُرێنیت.
6 او آکوبئے هُدا! چه تئیی نهِرّان،
آیانی اَرّابه و اسپان سر په مَرکئے وابا دات.
7 تئو باکَمال ائے،
وهدے هِژمَ گرئے، کئے تئیی دێما اۆشتاتَ کنت؟
8-9 تئو چه آسمانا دادرسیَ کنئے و
وهدے تئو، او هُدا، په دادرسیا جاهَ جنئے
که زمینئے سجّهێن ستم دیستگێنان نجات بدئیئے،
زمین چه تُرسا چُپ و بێتئوارَ بیت. اۆشت...
10 په انسانا تئیی هِژم هم تئیی سَتائے سئوَبَ بیت و
پَشت کپتگێن هِژما تئو وتی لانکا بندئے.
11 گۆن وتی هُداوندێن هُدایا کئول بکنێت و وتی زبانئے سرا بۆشتێت،
آ سجّهێن که کِرّ و گوَران اَنت
په هماییا ٹێکی بیارنت که باکَمال اِنت.
12 آ هاکمانی گرورانَ پرۆشیت،
زمینئے بادشاه چه آییا تُرسنت.