آکوبئے کبر و کپَن
50
ایسُّپا وتارا پتئے سرا دئور دات، گرێتی و پتی چُکّت.
2 گڑا هما داکتر که ایسُّپئے هزمتا اَتنت، ایسُّپا گۆن آیان گوَشت که منی پت اِسراییلا مۆمیایی* کنێت و آیان اِسراییل مۆمیایی کرت.
3 اے کارا چِلّ رۆچ جت که اینچُک وهد په مۆمیایی کنگا اَلّمی اَت.
مِسریان هپتاد رۆچ په آییا پُرس داشت.
4 وهدے پُرسئے رۆچ هلاس بوتنت، ایسُّپا گۆن پِرئونئے لۆگئے مردمان گوَشت:
”اگن منی اِزّتا کنێت، په منیگی گۆن پِرئونا هبر کنێت و بگوَشێتی
5 که منی پتا منا سئوگند داتگ و گوَشتگ:
’من مِرَگی آن.
منا هما کبرا کَلّ کن که من په وت کَنهانئے مُلکا کۆتکگ.‘
نون منا رَزا دئے که رئوان و وتی پتا کبرَ کنان و کایان.“
6 پِرئونا گوَشت:
”برئو، وتی پتا هما پئیما کبر کن که ترا سئوگندی داتگ.“
7 گڑا ایسُّپ وتی پتئے کبر کنگا شت.
پِرئونئے سجّهێن هزمتکار هم آییئے همراه اَتنت.
پِرئونئے لۆگئے مسترێن مردم و مِسرئے سجّهێن کَماش شتنت گۆن.
8 ایسُّپئے لۆگئے سجّهێن مردم، آییئے پتئے لۆگئے مردم و آییئے برات هم گۆن اَتنت.
اێوکا چُکّ و رمگ و گۆرُم گۆشِنا منتنت.
9 اَرّابهسوار و اَسپسوار هم شتنت گۆن.
سکّێن مزنێن رُمبے اَت.
10 وهدے آ اُردُنئے کئورئے نزّیکّا اَتادئے جۆهانا* سر بوتنت، کوکّارِش کرت و زارِش جت.
ایسُّپا اۆدا هپت رۆچا په وتی پتا پُرس داشت.
11 وهدے اۆدئے نندۆکێن کَنهانیان اَتادئے جۆهانا داشتگێن اے پُرس دیست، گوَشتِش:
”مِسریان بلاهێن پُرسے داشتگ.“
پمێشکا آ جاگه که اُردُنئے کئورئے نزّیکّا اِنت، آ جاگهئے نامِش آبِلمِسراێم* کرت.
12 گڑا آکوبئے چُکّان هما پئیم کرت که پتا هُکم داتگاَتنت.
13 آکوبِش کَنهانئے مُلکا برت و هما گارا کبر کرت که مَکپێلَهئے ڈگارا، مَمرِهئے نزّیکّا اَت.
اِبراهێما آ گار گۆن ڈگارا چه اِپرون هیتّیا بها زرتگاَت که کبرستانے بکنتی.
14 چه پتئے کبر کنگا رند ایسُّپ گۆن وتی براتان و گۆن سجّهێن همراهان که آییئے پتئے کبر کنگا آتکگاَتنت، مِسرا پِر ترّت.
ایسُّپ پدا براتان دلجمیَ دنت
15 وهدے ایسُّپئے براتان دیست که مئے پت مُرتگ، گوَشتِش:
”اگن ایسُّپا کێنگ دلا اِنت، هما سجّهێن بدیانی بێرا گیپت که ما گۆن آییا کرتگاَنت.“
16 گڑا آیان په ایسُّپا کلئوے راه دات و گوَشتِش:
”تئیی پتا مَرکا پێش اے وَسیَت کرتگ:
17 ’ایسُّپا بگوَشێت که منی دَزبندی اِنت که وتی براتانی مئیار و گناهان بِبَکش که گۆن تئو بدیاِش کرتگ.
وتی پتئے هُدائے بَندهانی بدیان پَهِلّ کن.‘“
وهدے آیانی پئیگام ایسُّپا سر بوت، گرێتی.
18 گڑا برات ایسُّپئے کرّا آتکنت و پادانی کپتنت و گوَشتِش:
”ما تئیی گُلام اێن.“
19 بله ایسُّپا گوَشت:
”متُرسێت.
من هُدا وَه نهآن.
20 شمئے نیّت منی تاوان دئیگ اَت، بله هُدائے نیّت نێک اَت.
آییئے نیّت همِش اَت که بازێن مردمێئے ساه برَکّیت.
اے کار، همِش اِنت انّون بئیگا اِنت.
21 گڑا متُرسێت.
من شمئے و شمئے چُکّانی زلورتان پورهَ کنان.“
براتی دلجَمی داتنت و گۆن آیان په شَرّی هبری کرت.
ایسُّپئے مَرک
22 ایسُّپ گۆن وتی پتئے لۆگئے سجّهێن مردمان مِسرا نِشت.
یکّ سَد و دَه سال اُمری کرت و
23 اِپراێمئے چُکّانی سئیمی پُشتی دیست.
مَنَسیئے نُماسگ، ماکیرئے چُکّ هم که پێدا بوتنت، ایسُّپئے کُٹّا دئیگ بوتنت.
24 ایسُّپا گۆن وتی براتان گوَشت:
”من مِرَگی آن، بله دلجم آن که هُدا په شمئے مَدتا کئیت و شمارا چه اے مُلکا دێم په هما مُلکا بارت که آییئے بارئوا گۆن اِبراهێم و اِساک و آکوبا سئوگندی وارتگ.“
25 ایسُّپا گۆن اِسراییلئے چُکّان گوَشت:
”سئوگِند بوَرێت که وهدے هُدا شمئے مَدتا کئیت، منی هڈّان چه اے جاگها برێت گۆن.“
26 ایسُّپ یکّ سَد و ده سالئے اُمرا مُرت، گڑا آاِش مۆمیایی کرت و تابوتێا واپێنت و مِسرا اێرِش کرت.