اِبراهێمئے مَرک
25
اِبراهێما دگه جَنے گپتگاَت که نامی کِتورَه اَت.
2 اِبراهێمئے چُکّ زِمران و یُکشان و مێدان و میدیان و یَشباک و شَواه چه کِتورَها پێدا بوتنت.
3 چه یُکشانا شێبا و دیدان پێدا بوتنت.
دیدانئے اۆبادَگ آشوری و لِتوشی و لئیومی اَتنت.
4 میدیانئے مَردێنچُکّ، اِپاه و اێپِر و هَنوک و اَبیدَه و اِلداه اَتنت.
اے سجّهێن کِتورَهئے اۆبادَگ اَتنت.
5 اِبراهێما وتی سجّهێن هستی اِساکارا دات.
6 هما مَردێنچُکّ که اِبراهێما چه سُریَتان بوتگاَتنت، وتی زندا آیانا ٹێکیای دات و چه وتی چُکّ اِساکا دور، رۆدراتکی مُلکا راه داتنت.
7 اِبراهێما سد و هپتاد و پنچ سال اُمر کرت و
8 وتی گُڈّی دَمی کَشِّت، شَرّێن مزنێن اُمرے کرتی و مُرت.
اِبراهێم پیریا په دلاێمِنی گۆن وتی مُرتگێن مهلوکا هئوار بوت.
9 آییئے چُکّ اِساک و اِسماێلا وتی پت مَمرِهئے نزّیکّا، مَکپێلَهئے گارئے تها کَبر کرت، هما ڈگارا که هیتّی سۆهَرئے چُکّ اِپرونئے بوتگاَت و
10 اِبراهێما چه هیتّیان بها زرتگاَت.
اِبراهێم همۆدا وتی لۆگی سارَهئے کِرّا کبر کنگ بوت.
11 چه اِبراهێمئے مرکا رند هُدایا آییئے چُکّ اِساک برکت دات.
اِساک بِهێرلَهاییروییئے نزّیکّا جَهمنند بوت.
اِسماێلئے نَسل و پَدرێچ
12 اِبراهێمئے چُکّ اِسماێل، که چه سارَهئے مِسری مۆلد هاجِرا پێدا بوتگاَت، آییئے نَسل و پَدرێچئے کِسّه چُش اِنت:
13 اِسماێلئے مردێنچُکّانی نام، اُمرئے هِسابا په رِد اِش اَنت:
مسترێن چُکّ نِبایوت و اے دگه چُکّ، کێدَر و اَدبیل و مِبسام و
14 مِشما و دوما و مَسّا و
15 هَداد و تێما و یَتور و ناپیش و کِدمَه اَتنت.
16 هَنکێن* و گِدانانی هسابا، اِسماێلئے چُکّانی نام همِش اَتنت، دوازده سَردار، وتی کَبیلهانی رِد و بندئے سرا.
17 اِسماێلا یکّ سَد و سی و هپت سال اُمر کرت.
وتی گُڈّی دَمی کَشِّت و مُرت و گۆن وتی مُرتگێن مهلوکا هئوار بوت.
18 آییئے اۆبادَگ، مِسرئے سیمسرا که دێم په آشورا رئوئے، چه هئویلَها بگر تان شورئے زمینا جَهمنند بوتنت.
آ گۆن وتی سجّهێن براتان اَڑِتگاَتنت.
آکوب و ایسّو
19 اِبراهێمئے چُکّ اِساکئے کِسّه چُش اِنت:
اِساکئے پت اِبراهێم اَت.
20 اِساکئے اُمر چِلّ سال اَت وهدے گۆن رِبِکّایا سوری کرت.
رِبِکّا، بِتوێل اَرَماییئے جنکّ و لابان اَرَماییئے گهار اَت.
بِتوێل پَدّاناَرامئے مردمے اَت.
21 اِساکئے لۆگی سَنٹ و بےائولاد اَت و پمێشکا اِساکا په وتی لۆگیا چه هُداوندا دْوا لۆٹت.
هُداوندا آییئے دْوا گۆش داشت و اِساکئے لۆگی رِبِکّائے لاپ پُرّ بوت.
22 دوێن چُکّ، ماتئے لاپا گۆن یکدومیا کَشّ و چیلّ کنگا اَتنت.
رِبِکّایا گوَشت:
”گۆن من چێا چُش بئیگا اِنت؟“
شت و چه هُداوندا جُستی کرت.
23 هُداوندا گوَشت:
”دو راج تئیی لاپا اِنت.
دو کئوم چه تئیی لاپئے تها سِدیت.
یکّ راجے چه دومیا زۆرمندترَ بیت و
مسترێن، کَسترێنئے هِزمتا کنت.“
24 چُکماتیئے ماه و رۆچ که پوره بوتنت، رِبِکّایا جاڑ آورت.
25 ائولی چُکّ که پێدا بوت، سُهرَگے اَت و آییئے سجّهێن بدن چۆ مودی کباها اَت.
آییئے نامِش ایسّو* کرت.
26 رندا آییئے برات پێدا بوت و پێدا بئیگئے وهدا ایسّوئے پادئے پونزی* داشتگاَت.
اے چُکّئے نامِش آکوب* کرت.
وهدے رِبِکّایا اے جاڑ آورتنت، اِساکا شست سال اَت.
27 چُکّ رُست و مزن بوتنت.
ایسّو زبردستێن شکاریے بوت و دَشت و گیابانان گردۆکێن مردے اَت.
آکوب آرامتَبێن مردے اَت و گێشتر گِدانا نِشتگاَت.
28 اِساکا ایسّو دۆستتر اَت که شکارئے گۆشتانی تامی وشَّ بوت.
رِبِکّایا آکوب دۆستتر اَت.
29 یکّ رۆچے آکوب نارُشتئے گْرادگا اَت، ایسّو چه گیابانا آتک، شُدا چَنگ* اَت.
30 گۆن آکوبا گوَشتی:
”چه اے سُهرێن نارُشتان تُشے دئے گُلُمبان، چه اے سُهرێنان، که منا شُدا کُشت.“
پمێشکا ایسّواِش اِدوم* هم گوَشت.
31 آکوبا پَسّئو دات:
”ائولا وتی پێدائِشی هَکّا* منی کِرّا بها کن.“
32 ایسّوا گوَشت:
”منا شُدا کُشت، پێدائِشی هَکّ منی چِه کارا کئیت؟“
33 آکوبا گوَشت:
”پێسرا گۆن من سئوگِند بوَر.“
گڑا آییا سئوگِند وارت و وتی پێدائِشی هَکّی آکوبئے کِرّا بها کرت.
34 نون آکوبا لهتێن نگن و ڈالئے نارُشت ایسّوارا دات.
آییا وارت و رندا پاد آتک و شت.
اے پئیما ایسّوا وتی پێدائِشی هَکّ بےاِزّت کرت.