سارَهئے مَرک
23
سارَها یکّ سَد و بیست و هپت سال اُمر کرت.
آییئے زِندئے سال و رۆچ همینکس اَتنت.
2 سارَه، کَنهانئے سرڈگارا، کِریَهاَربها بێران بوت.
کِریَهاَربهئے دومی نام هِبرون اِنت.
اِبراهێم شت که پُرسا بنندیت و په سارَها بگرێت.
3 پدا چه لاشئے کِرّا پاد آتک و گۆن هیتّیان گوَشتی:
4 ”من شمئے نیاما درکئوم و دَرامدے آن.
منا په کبرستانێا، زمینی ٹُکّرے بها بدئیێت که وتی مُردگا کبر کرت بکنان.“
5 هیتّیان پسّئو دات:
6 ”او منی واجه!
مئے هبران گۆش دار.
تئو مئے نیاما پُرواکێن شَهزادگے ائے.
وتی مُردگا مئے کبرستانا، گچێنی جاگهێا کبر کن.
چه ما کَسّ، ترا چه تئیی مُردگئے کبر کنگا نداریت.“
7 اِبراهێم پاد آتک و آ سرڈگارئے مردم، بزان هیتّیانی دێما په اَدب سَری جَهل کرت.
8 گۆن آیان گوَشتی:
”اگن شما رازیگ اێت که من وتی مُردگا کبر بکنان، گڑا منی هبرا گۆش دارێت و سۆهَرئے چُکّ اِپرونئے کِرّا منی سِپارشا بکنێت،
9 که وتی گارا منی کِرّا بها بکنت، هما گار که مَکپێلَها آییئے ڈگارئے گُڈّی بهرا اِنت.
جاگهئے پورهێن کیمّتا چه من بگیپت که منا شمئے مُلکا کبرستانے ببیت.“
10 اِپرون هیتّی همۆدا مردمانی نیاما نِشتگاَت.
اِبراهێمئے پسّئوی اَنچُش دات که آییئے شهرئے دروازگئے دپا آتکگێن سجّهێن هیتّی بِشکننت:
11 ”اِنّه، واجه!
کیمّتئے هبرا مکن.
منی گپّا گۆش دار.
من آ گار و ڈگار دوێن ترا داتگاَنت.
منی اے سجّهێن مردمانی دێما، آ ڈگار تئییگ اِنت.
وتی مُردگا اۆدا کبر کن.“
12 اِبراهێما پدا آ مُلکئے مردمانی دێما سَر جَهل کرت و
13 گۆن اِپرونا اَنچۆ گوَشتی که مردم بِشکننت:
”اگن منی هبران گۆشَ دارئے، من ڈگارئے کیمّتا دئیان.
اِشیئے زرّان چه من بزور که من وتی مُردگا اۆدا کبر کرت بکنان.“
14 اِپرونا پسّئو دات:
15 ”منی واجه!
منی هبرا گۆش دار.
ڈگارئے کیمّت نُگرهئے چار سد شِکِل* اِنت.
اے منیگ و تئیی نیاما هچّے نهاِنت.
وتی مُردگا کبر کن.“
16 اِبراهێما اِپرونئے هبر زُرت و هما کیمّتی تۆر کرت* که اِپرونا گوشتگاَت و هیتّیان اِشکتگاَت، بزان نُگرهئے چار سد شِکِل، سئوداگرانی گیشّتگێن سَنگ و تۆرئے هِسابا.
17-18 گڑا اِپرونئے ڈگار که مَکپێلَها، مَمرِهئے نزّیکّا اَت، سجّهێن هیتّیانی دێما که شهرئے دروازگا آتکگاَتنت، آ ڈگار و ڈگارئے تهئے گار و سجّهێن درچک، اِبراهێمئے مِلکَت بوتنت.
19 نون اِبراهێما وتی لۆگی سارَه، مَکپێلَهئے ڈگارئے گارا، کَنهانئے سرزمینا کبر کرت.
اے گار مَمرِهئے نزّیکّا اِنت و مَمرِه هِبرونا اِنت.
20 هیتّیان اے ڈگار گۆن گارا اِبراهێمارا دات که کبرِستانے بکنتی.