اِبرام لوتا رَکّێنیت
14
شینارئے بادشاه اَمراپِل و اِلاسَرئے بادشاه اَریوک و ایلامئے بادشاه کِدُرلامِر و گۆییمئے بادشاه تیدالئے زمانگا،
2 اے بادشاهان گۆن سُدومئے بادشاه بارَه و گُمورَهئے بادشاه بِرشا و اَدمَهئے بادشاه شِناب و سَبوییمئے بادشاه شێمِبِر و بێلَهئے بادشاها جنگ کرت.
بێلَهئے دومی نام سۆهَر اِنت.
3 نون اے گُڈّی پنچێن بادشاه، سِدّیمئے دَرَگا،* بزان وادزِرئے* دَرَگا یکجاه بوتنت.
4 اِشان تان دوازده سالا کِدُرلامِرئے هِزمت کرت و سێزدهمی سالا سرکشّیاِش کرت.
5 چاردهمی سالا کِدُرلامِر گۆن همراهێن بادشاهان آتک و رِپاهی مهلوکی مان اَشتِروتکَرنئیما پرۆش دات، زوزی مهلوکی مان هاما و اێمی مهلوکی مان شاوِهکِریاتئیما پرۆش داتنت.
6 هۆرایی مهلوکی، مان کۆهستگێن مُلکا، سَهیرا بگر تان اِلپارانا پرۆش دات.
اِلپاران گیابانئے نزّیکّا اِنت.
7 نون پِر ترِّتنت و اِنمِشپاتا بزان کادِشا آتکنت و اَمالیکیانی سجّهێن مُلکِش گپت.
هَساسونتَمارا نِشتگێن اَموریانی مُلکِش هم گِپت.
8 گڑا سُدومئے بادشاه، گُمورَهئے بادشاه، اَدمَهئے بادشاه، سَبوییمئے بادشاه و بێلَهئے، بزان سۆهَرئے بادشاه، ڈنّا در آتکنت و سِدّیمئے دَرَگا جنگئے تئیاریاِش کرت و
9 گۆن ایلامئے بادشاه کِدُرلامِر و گۆییمئے بادشاه تیدال و شینارئے بادشاه اَمراپِل و اِلاسَرئے بادشاه اَریوکا جنگِش کرت، بزان چار بادشاه، پنچ بادشاهئے هِلاپا.
10 سِدّیمئے دَرَگ چه ڈامبرئے کَنڈا پُرّ اَت و وهدے سُدوم و گُمورَهئے بادشاه تتکنت، باز مردم اے کَنڈانی تها کپت و اے دگه مردم دێم په کۆهستگا تتکنت.
11 گڑا چارێن بادشاهان سُدوم و گُمورَهئے سجّهێن مال و مَڈّی و تۆشگ زرت و شتنت.
12 اِبرامئے برازاتک لوت، سُدوما جَهمنند اَت.
آاِش هم گپت و گۆن سجّهێن مال و مَڈّیا گۆن وَت بُرت.
13 یکّ مردمے تتک و اِبرانیێن اِبرامئے کِرّا آتک و اے هالی دات.
اے وهدا اِبرام، اَموریێن مَمرِهئے مزنێن درچکانی نزّیکّا نِشتگاَت.
اَموریێن مَمرِه، اِشکول و آنِرئے برات اَت.
اِشانی و اِبرامئے نیاما اَهد و پئیمانے هستاَت.
14 وهدے اِبراما اِشکت که منی برازاتک گِرگ و بَرگ بوتگ، وتی هما سئے سد و هژدهێن در آورتگێن* جَنگۆل، که آییئے لۆگا پێدا بوتگاَتنت، زُرتنتی و تان دانئے شهرا دُژمنانی رندا کپت.
15 شپئے وهدا آییا وتی همراه ٹۆلی ٹۆلیا بهر کرتنت و دژمنئے سرا اُرُشی کرت و پرۆشی داتنت و تان هوبَها، که دَمِشکئے شمالا اِنت، آیانی رندا کپت.
16 اِبراما سجّهێن مال و مَڈّی پَچ گپتنت و وتی برازاتک لوت و آییئے مال و هستی، جنێنآدم و اے دگه مردم پدا آورتنت.
مَلکیسِدیک اِبراما برکتَ دنت
17 وهدے اِبرام چه کِدُرلامِر و آییئے هَمپَتّێن* بادشاهانی پرۆش دئیگا رند پِر ترّگا اَت، سُدومئے بادشاه تان شاوِهئے دَرَگا، که بادشاهئے دَرَگ اِنت، آییئے پێشوازیا* آتک.
18 گڑا شَلیمئے* بادشاه مَلکیسِدیکا، که بُرزێن اَرشئے هُدائے دینی پێشوا اَت، نان و شراب آورت.
19 آییا اِبرام برکت دات و گوَشت:
”اِبرام!
ترا چه بُرزین اَرشئے هُدا،
آسمان و زمینئے اَڈّ کنۆکئے نێمگا برکت برسات.
20 بُرزێن اَرشئے هُدایا ستا و سنا بات
که دژمنی تئیی دستا داتنت.“
گڑا اِبراما، آییارا چه هر چیزّا دَهیَکّ دات.
21 سُدومئے بادشاها گۆن اِبراما گوَشت:
”منی مردمان منا بدئے و مال و مَڈّیان بزور، تئییگ اَنت.“
22 اِبراما گۆن سُدومئے بادشاها گوَشت:
”من هُداوندئے دێما، بُرزێن اَرشئے هُدا، آسمان و زمینئے جۆڑ کنۆکئے دێما دست چِست کرتگ و سئوگند وارتگ
23 هرچے که تئییگ اِنت، من چه آیان هچَّ نزوران، یکّ بندیکّے یا سْواسبَندے هم نزوران.
چُش مبیت تئو بگوَشئے که اِبرام من هستۆمند کرتگ.
24 من هچّ چیزَّ نزوران اَبێد چه هما وراکان که وَرنایان وارتگاَنت و هما مردمانی بَهرا که منی همراهیا آتکگاَنت، بزان آنِر، اِشکول و مَمرِه.
آ وتی بهرا بزورنت.“