13
1 Ogbabalion to marodyow no anak ka igtuaro to amoy rin, di kono ogpamminog to sapad ka ungud og-atu no anak.
2 Marodyow ka ogkatinawo to otow pinabadyo to marodyow no mgo kinagian din, di ian do ogko-ibogan to mgo matigawoy ka pogpasakit to duma.
3 Ogbantoy to koudyagan din ka otow no ogbantoy to ogkagion din, di magaan ogkaguak ka pog-ugpo to otow no magaan ogpangagikagi.
4 Ungud ogko-ibog ka poguon no otow, di waro ogkoutol din, di ogkatood lagboy ka noiniatan to mapamakut no otow.
5 Og-usigon to matuarong no otow ka kono'n litos, di oghatod to kasiporan ka mgo dorooti no otow.
6 Ogkabantadyan ka otow no waro igkosawoy pinabadyo to pogkamatuarong din, di ogkaro-og ka otow no makasasao pinabadyo to pogkasabandal din.
7 Duon otow no ogpatuu no datu sikandin, dokad di waro kandin; songo duon otow no ogpatuu no nawaraan sikandin, dokad di dakol ka duon to kandin.
8 Ogpakabaukas ka datu to koudyagan din, di waro oghinallok to otow no nawaraan.
9 Unawa to maadyag no ilawan ka koudyagan to matuarong no otow, di unawa to ilawan no magaan ogkoobukan ka koudyagan to dorooti no otow.
10 Ka pogpan-ogot ian ka bogas to pogparakol-dakol, di mougsob ka mgo otow no ogpamminog to tambag.
11 Magaan ogka-awo ka saapi no napurut to magaan doa, di ogtulin ka saapi no pigpamakutan.
12 Ogmasakit ka goinawa ta ko ungud ogkabaabagan ka pigtatagaran ta, di oglibong ka dadyagang ta ko ogkatood ka pig-im-imanan ta.
13 Ogkabaybadyaran ka otow no ogsamili to pogpamminog to igtuaro, di ogkadassagan ka otow no ogpannalinga to sugu.
14 Unawa to sobsob to koudyagan ka igtuaro to mougsob no otow, odyow no kono ogpakasagad ka otow to mgo lit-ag to kamatadyon.
15 Og-iloon ka otow ko marodyow ka pogdoromdom din, di ogkabaybadyaran ka otow no kono ogkasaligan.
16 Panadyon ogdoromdoma to mougsob no otow ka oghimuon din woy rin oghimua, di ogpapitow ka angol-angol no otow to ka-angoan din.
17 Ogko-uug to koirapan ka dorooti no taagnangon, di ogpaka-aap to pogpokog-uli ka ogkasaligan no inpa-aap no otow.
18 Ogkawaraan woy ogkasiporan ka otow no kono ogpannalinga to pogsapad, di ogmabantug ka otow no ogpamminog to pogpatul-id.
19 Moomis ka oggoramon ta ko ogkatood ka pig-im-imanan ta, di ogdomot ka angol-angol no otow to pog-iniug to karootan.
20 Ogmougsob ka otow no ogduma-ruma to mgo mougsob no otow, di ogkabaybadyaran ka otow no ogludyud to mgo angol-angol.
21 Ungud ogkalopowan to igkobaybadyari ka otow no ladyun ogpakasao, di ogkadassagan ka matuarong no otow to pogtulin.
22 Duon igtugun-tugun to marodyow no otow pohondio pad to mgo anak to mgo anak din, di ka saapi to makasasao no otow oghondio do dio to mgo matuarong no otow.
23 Agad ko dakol ka abut to kamot to otow no nawaraan, kono sikandin ogkapuusan to sikan su ogka-agowan sikandin to mgo dorooti no otow.
24 Ka otow no kono oglampos to anak din ogpoitaga no pig-usig din ka anak, di ka otow no duon dakol no goinawa to anak din ogsapad kandin ko ogpakasao ka anak.
25 Ogkabuung to pogkoon ka mgo matuarong no otow, di oggutasan ka dorooti no mgo otow.