Ka igkatolu no sulat ni Huan no kagi rin to sulat din to:
1
1 Ka soini no sulat, nigligkat kanak no songo pogbuyagon to mgo otow no nigtuu ki Hisu Kristu. No igpaalap ku koykow, Gayo no indakoli ku to goinawa su ogligkat to pogtuu ta to tu-tuu ian no nangnangonon.
2 Sulod, nataga a to maroyow ka goinawa nu to tangkaan to Magboboot. No ogbuyu a kandin to oyow ogmaroyow ro ka pog-ugpo nu woy ka lawa nu.
3 Duon mgo otow no duma ta to pogtuu ta ki Hisu Kristu no nigdatong kai to kanami. No dakol ka ingkarago ku su nignangonan koy ran to og-ay-ayaran nu oggongoni ka tu-tuu ian no nangnangonon woy og-unug on ian ka batasan nu to sikan ian no tu-tuu ian no nangnangonon. 4 Waro duma no igkarago ku no ogkounawa to sikan no igkarago ku no ogligkat to ogdinogon ku, tongod to mgo otow no nohimu no anak ku to pogtuu ta, to ogpaagad-agad sikandan to soini no tu-tuu ian no nangnangonon.
5 Sulod, maroyow ka batasan nu to mgo duma ta to pogtuu su agad to waro nu pad matilala maroyow man ka pogsagman nu kandan. 6 Ko nan-uli sikandan, nanangonan dan ka mgo nigtuu kai to sikan no dakol no ingkohoy-u nu kandan. Maroyow ko ogbuligan nu rod sikandan to mgo og-awoson dan dio to dalan su litos ian ko ogbuligan ta ka mgo otow no ogtuman to sugu to Magboboot. 7 Ian su ian ingkohipanow ran su ogtuman ian to sugu din, woy su waro nigpurut sikandan to agad nokoy dio to mgo otow no waro nigtuu ki Hisus. 8 Sikan ian, maroyow ko sikanta no nigtuu ka ogbulig to sikan no mgo otow oyow ogkaalap dan ka soini no tu-tuu ian no nangnangonon.
Si Diotripis woy si Dimitriu
9 Duon insulat ku no impaalap ku dio to mgo otow no nigtuu ki Hisus no dio to kaniu. Di waro mogsagman ni Diotripis su kono ogpaagad-agad to katondanan ku. Ian su ogkoiniatan din ko sikandin do ka ogpakaalap to mgo otow. 10 Sikan ian, ko ogpakatood a no ogpanumbaloy dio to kaniu, ignangon ku ka tibo no oghimuon din, woy ka mgo maroot no igbayung kanak. Kono no sikan do ka oghimuon din su ko duon mgo otow no nigtuu ki Hisus no ogpanumbaloy poron dio to kandan, kono ogpasoloron ni Diotripis dio to baloy rin woy ogsaparan din ka duma rin no mgo otow no ogkoiniat poron no ogpasolod to sikan no magaliug dio to kandan no baloy. No ko duon otow no ogpasoloron to baloy ran ka sikan no mgo otow no no nigtuu no ogpanumbaloy poron, konad on ogbogoy ni Diotripis no og-amut sikandan to mgo duma ran no ogsimba.
11 Nò sulod, kono ka og-unug to sikan no mgo maroot no mgo oghimuon din. Di ian nu ro unuga ka mgo maroyow no hinimuan. Ka mgo otow no oghimu to maroyow, sikandan ka nakagongon to Magboboot. Di ka otow no maroot ka oghimuon din, waro nigtokod to Magboboot.
12 Di tongod ki Dimitriu, agad hontow, ogpakapamalogot to maroyow no otow sikandin. No ogkatagaan ta ka sikan su ka batasan din, og-unug on ian to tu-tuu ian no nangnangonon. Songo ogpakapamalogot a to maroyow ian sikandin. No nataga ka to tu-tuu ian ka igmalogot ku.
Ka igpanuguntugun ni Huan
13 Dakol dod poron ka igsulat ku koykow di kono a ogkoiniat to ogmalayaton ku. 14 Ian su og-iman-iman a to ogpakapanumbaloy a dio to koykow No ogpakakita a to langlanguan nu no ogkaayun ki no ogmaal-alukuyoy.
15 Nò, ogbuyu a to Magboboot to oyow ogbogayan din sikoykow to maawang no goinawa. Ka mgo duma ta kai to kanak, ogpakumusta koykow. Songo ogpakumusta a to koykow ka tag sagboka to tibo no mgo duma ta no nigtuu no dio to koykow.