Ka an-anayan no sulat ni
Huan
no suguanon ni Hisus no impaalap din to mgo otow no nigtuu ki Hisu Kristu.
1
Si Hisus ka Oghingaranan no Kagi no Ogbogoy kanta to Kouyagon
1 Soini ka igsulat ku kaniu tongod ki Hisu Kristu no ian ogngaranan to kinagian.a
Duon tahan si Hisus no waro pad nohimu ka soini no kalibutan. Di sikanami no mgo suguanon din, nigdinog koy to kagi rin woy namolmologan noy on ian to pogpitow noy kandin, woy songo nakagongon koy to lawa rin. Si Hisus ka ogpohitaga kanta to pogkouyag no nigligkat to Magboboot, 2 No si Hisus dod ka kouyagan no impohitaga kanami. Sikandin, dio tahan nig-ugpo to Magboboot di nighondiid on to kanami. Nigkita noy on sikandin no ian ka ogbogoy kanta to sikan no pogkouyag ta. No sikan ian to ogpakamalogot koy to sikan no kouyagan no waro katamanan no impohitaga to Magboboot kanami. 3 Ian to ognangonnangon koy kaniu to sikan no nigkita noy woy to nigdinog noy tongod ki Hisus su oyow ogpakaamut kow kanami to sikan to maroyow no pogdumaruma noy to Magboboot woy ka Anak din no si Hisu Kristu. 4 Ka dangob no tuud noy to ogsulat kaniu su oyow ogdakol on ka igkarago tanow.
Ka pog-ugpo ta to Kaawangan
5 Soini no nangnangonon noy kaniu, nigligkat dio ki Hisus. No ka innangon din kanami no songo ignangon noy kaniu tongod to Magboboot to waro tagu no agad nokoy no maroot dio to kandin. Tibo dio to kandin ogmaawang. 6 Sikan ian, ko maroot ka mgo batasan ta, ian ogkounawaan ko ogpokohipanow ki rod to karusiloman, no kono no tu-tuu ko ignangon ta to duma ta to, “Maroyow ka pogdumaruma ku to Magboboot,” su ubat do duon ka ogkagion ta, no ka mgo batasan ta, waro mokounug to tu-tuu ian no nangnangonon. 7 Di ko oghipanow ki dio to maawang unawa to Magboboot no tahan nig-ugpo to maawang, ogmaroyow ro ka pogdumaruma tanow, no ka langosa ni Hisus no ian Anak to Magboboot ka iglinis to goinawa ta oyow ogkaawo on ka mgo salo ta.
8 Ko ogkagi ki to, “Wa man salo ku,” ogkoubatan ta ro ka kanta no goinawa, no ka tu-tuu no nangnangonon, waro nig-ugpo to goinawa ta. 9 Di ko ignangon ta to Magboboot ka mgo salo ta, ogpasayluan din ka salo ta. Ian su maroyow ka Magboboot no ogkasaligan ta sikandin to og-awoon din on ka agad nokoy no maroot no nakatagu to goinawa ta. 10 Di ko ogkagi ki to, “Waro a makasalo,” ogkounawa to oghimuon ta ka Magboboot to ubaton su wa ki nigtuu to kagi rin tongod to duon salo ta.