4
1 Timoteo, to kai ki to tangkaan to Magboboot, duon igsug-ku koykow su oglibong si Hisu Kristu kai to tano no ogkohimu on sikandin no Lagboy no Igbuyag to tibo no mgo otow, no ogbootan din on ka tibo kandan, agad ka mannokal pad woy ka mgo nammatoy on. 2 Sikan ian no ogsuguon ku sikoykow to oyow ungod nu ro ogpoomoton to ogpannangonnangon to kinagian to Magboboot agad ko ogkoiniatan to mgo otow to ogpamminog woy ko kono dan ogkoiniatan. Tul-ira nu ka mgo otow no makasasalo. Sapari nu ka kono ogpaagad-agad to Magboboot. Udlingi nu sikandan to maroyow. Woy gogoinawoon nu to malayat ka mgo otow no og-anaron nu 3 su duon allow no ogpokouma no konad on ogpamminog ka mgo otow to tu-tuu ian no ig-anad. Di ian dan do maroyow no og-unugon dan ka ogpakabulung to maroot no ogkoiniatan dan. Sikan ian no ogmohon-ingon dan ka og-anad kandan to agad nokoy no ogkoiniatan dan no ogpamminogan. 4 Og-iniugan dan ka tu-tuu ian no tinuuan. No ian dan do ogpamminogon ka mgo nangnangonon no kono no tu-tuu. 5 Di sikoykow atag, Timoteo, agad nokoy ka ogkabayaan nu, ponora nu ka mgo batasan nu. Aguantoon nu ro ka mgo igkabaybayari nu. Paragasa nu ka pog-alap-alap nu to Maroyow no Nangnangonon, woy tumana nu ka tibo no igpohimu to Magboboot koykow.
6 Ian su sikanak atag no si Pablo, magaan ogkoitis ka langosa ku no igkabogoy to Magboboot, su ligkat to pogtuu ku ki Hisu Kristu, magaan a ogkoumoi to kamatayon ku. 7 No ian ku nounawaan ka otow no ogpallaguy no ogpaag-agapoy no ogpokouma on to katamanan su nigpoomotan ku ka pogtuman ku to tibo no insug-to Magboboot kanak no nig-unugan ku lagboy ka tu-tuu ian no tinuuan. 8 No kuntoon, duon on ka igtagad to Lagboy no Igbuyag ta kanak no igsayo din to mgo otow no nohimu on no maroyow. No igbogoy rin kanak uromo to sikan no Allow no ogbootan din ka mgo hinimuan to tibo no mgo otow. Sikandin ka talagboot no oglitos on ian ka pogboot din. Di kono no sikanak do ka ogbogayan din di songo ogkabogayan ka tibo no mgo otow no ogkarago no ogtagad to poglibong ni Hisu Kristu kai to tano.
Ka Igtuguntugun ni Pablo ki Timoteo
9 Timoteo, ol-olog ka to magaan ka oghondii kanak 10 su si Dimas, nig-ongkoran a rin su dakol ka goinawa rin to pog-ugpo din kai to soini no kalibutan, no nighipanow on sikandin no nighondio to lunsud to Tisalunika. Si Krisinti, nighondio to ugpaan to Galasia, no si Titu, nighondio to Dalmasia. 11 Si Lukas naan do ka duma ku kai. Hinggata nu si Markos kai to kanak su ogpakabulig kanak. 12 Si Titiku, impohondio ku to lunsud to Episu. 13 Ka makopal no kinabo ku no ig-akob no niggalat ku ki Karpu dio to lunsud to Troas, alapa nu ro ko oghondii ka. Ilagkos nu ro alapa ka mgo diblu ku, woy ka mgo nasulatan, su ian ka lagboy no og-awoson ku.
14 Si Alihandro no talagsalsal to tumbaga, maroot lagboy ka nighimu rin kanak. Di ka Lagboy no Igbuyag ta ka ogsuli kandin no igsokod to mgo hinimuan din. 15 Ayad-ayad ka kandin su dakol ka pog-atu rin to in-anad noy.
16 Ka an-anayan no nig-in-insaan ad to tangkaan to mgo igbuyag, waro agad sagboka no nig-pangabang kanak. Di noongkoran ad to tibo. Di maroyow ku ko kono og-indanan to Magboboot ka sikan no salo dan. 17 Agad waro nig-pangabang kanak di nigbuligan ad to Lagboy no Igbuyag ta no nighirosonan a rin to oyow ogpokouwang a to ognangon to tibo to soi Maroyow no Nangnangonon tongod ki Hisu Kristu oyow ogpakarinog on ka tibo no mgo otow no kono no Hudiu. No nig-atangan ad on to Magboboot no waro a toori to oghimatayan. a 18 No agad nokoy no ogpakamula poron kanak, kono ogpokoomonu kanak su ogbuligan a rod to Lagboy no Igbuyag ta no ogpangabangan a rin taman to ogpasoloran a rin on to pandatuan din no dio to Langit. Maroyow ko ogsayoon ta sikandin to waro katamanan. Malogot ian. 19 Nangoni nu si Priska woy si Akila woy ka lunggunan ni Onisipuru to sikanak no si Pablo, ogdoromdomon ku sikandan. 20 Og-ugpo pad si Irastu dio to Kurintu woy niggalat kud si Tropimu dio to lunsud to Militu su nigdaralu. 21 Agpas ka no oghondii to kono pad no tig-uran. Si Eubulu, si Prudinti, si Linu, si Klaudia, woy ka tibo no nigtuu ki Hisus no kai og-ugpo, igpanangon koykow to ogdoromdomon dan sikoykow. 22 Ogparumoon ka to Lagboy no Igbuyag ta woy maroyow ku ko ogkohoy-uan kow nikandin.