2
Mgo Igpanag-ilingan to Pogtuman
1 Sikan ian, manganak ku no si Timoteo, hirosoni nu ka goinawa nu to pogtuu nu no ogligkat to pogkohoy-u to Magboboot no ogligkat to ogkasagboka kinow ki Hisu Kristu. 2 No ka nigdinog nu no impan-anad ku dio to tangkaan to mohon-ing no mgo otow, ipatalipun nu to mgo lukos no oglitos no ogkasaligan oyow songo ig-anad dan to duma no mgo otow.
3 Unawa to sundalu no og-aguanta to igkabaybayari rin, songo aguantaa nu ro ka igkabaybayari nu no ogligkat to maroyow ka no suguanon ni Hisu Kristu 4 su ka otow no nohimu on no sundalu, kono oglitos no ogkatalantan to sikan no igkatiglingoy to duma no mgo otow no konon sundalu. Ian su og-awoson to ian din do oghimuon ka igkarago to igbuyag din. 5 Woy songo ogkounawa ka to sikan no otow no ogpaag-agapoy oyow ogpitawan ko hontow ka matallong no ogpallaguy. Di kono ogkabogayan to igsayo ka sikan no ogpakaroog ko kono din ogtumanon ka innangon to mgo talagboot. 6 Songo ogkounawa ka rod to otow no ogpoomot to ogpanuig no ian porom ogpokohun-a to ogkoon ko tiggaani on. 7 Sumsumana nu ka soini no igkaanad ku su ogbuligan kad to Lagboy no Igbuyag ta to oyow ogkasabutan nu ka tibo. 8 Kono nu kalingawi si Hisu Kristu. Kapunganan ni David sikandin no pogkalugoy, nigpakimatoy on, di pogkaponga, nouyag do. No ian ku ikanangonnangon to soini no Maroyow no Nangnangonon ku. 9 Sikan ian to kai a to pirisuan no noiling ad on to makasasalo ka nohikotan ad on to karina. Dokad di to waro igkaatang to kinagian to Magboboot. 10 No su ian ian, og-aguantoon ku ro ka agad nokoy no igkabaybayari ku to oyow, ka mgo otow no nig-abin to Magboboot, ogkabogayan to kouyagan no waro katamanan su ogkasagboka ro sikandan ki Hisu Kristu no ogkabogayan on sikandan to karoyawon no pog-ugpo no waro kataman. 11 Tu-tuu ian ka soini no kagi,
Ko nakalagkos kinow ki Hisus to pogkamatoy rin
songo ogkabogayan ki to kouyagan ta no og-uugpo ki dio to kandin.
12 Ko og-aguantoon ta ka igkabaybayari ta kuntoon
uromo ogpakalagkos ki kandin to pog-alap din to katondanan din to ogpan-udling.
Di ko ogligalon ta sikandin, songo ogkaligal ki nikandin.
13 Agad kono ki ogkasaligan no ogtuman to kinagian to Magboboot,
di ogkasaligan atag sikandin no ogtuman to kinagian din su kono ogkohimu ko kono din ogtumanon ka innangon din.
Ka Talag-anad no Oglitos no Ogkasayo
14 Paromdoma nu ka mgo otow to soini tibo. No to tangkaan to Magboboot, a sapari nu sikandan to oyow kono dan ogpaap-apuloy to ogkalitukan to mgo kagi ro duon, su waro pulus to sikan, di ogpakaraat do to pogtuu to mgo otow no ogpakapamminog to kagi ran. 15 Kanokali nu to ogtalabau to sikan no impatalipun koykow to Magboboot oyow ogkasayo ka nikandin, woy to oyow waro igkasipod nu. Woy og-awoson to matul-id on ian ka ig-anad nu to kinagian to Magboboot no tu-tuu ian.
16 Kono ka ogpaginlabot to waro pulus no igpamatbat to mgo otow no kono oglitos to Magboboot su sikan ka ogpakaawo to mgo otow dio to tangkaan din. 17 Ka sikan no igkaanad dan, ian ogkounawaan ka bakokang duon to sapu no og-at-at on. No ka anad ni Himiniu woy si Pilitu, songo ogkoiling dod. 18 Sikandan, nigsuwoy on to tu-tuu ian no tinuuan su nahan dan no napongaan on ka pogkouyag ta ko nigtuu kid on ki Hisus, no warad kun on uromo pogkouyag ta ligkat to kamatayan ta. Ligkat to sikan, duon on mgo otow no namminog kandan no nakasuwoy on to pogtuu ran. 19 Di ka tu-tuu ian no tinuuan ta no imbogoy to Magboboot, ian ogkounawaan ka kono ogkawoil no ogpounturan to baloy. No duon impasulat to kinagian to Magboboot to,
Nataga ka Lagboy no Igbuyag ta ko hontow ka tu-tuu no sakup din.
No ka dangob no impasulat din kagi,
Sika otow no oghonhonduon to nigpasakup kun to Lagboy no Igbuyag ta,
no og-awoson to og-ongkoran din on ka tibo no maroot no batasan. b
20 Duon pananglitan ku. Dio to agad hondoi no dakol no baloy, duon kalaglagan no bulawan, woy ka nohimu to ogkoiling no putow di mapotit, woy songo duon ka nohimu no kayu woy ka nohimu to basak. Ka mahal no kalaglagan, ogkoindanan to magaliug, di ka duma, oglitos no ogkapurut to agad nokoy. 21 No ko duon otow no og-ongkod to tibo no oghimuon din no maroot, ian din ogkounawaan ka sikan no kalaglagan no igtagama to magaliug su og-indanan ni Hisu Kristu ka sikan no otow no oglitos sikandin to oghimu to agad nokoy no maroyow. 22 Sikan ian, mariua nu ka goinawa nu to mgo maroot no koiniatan to mgo bato-bato pad. Poomota nu no oghimu to maroyow ro woy dakola nu ka pogtuu nu, woy songo dakola nu ka goinawa nu to duma no mgo otow. Woy tuuri nu to oyow ogmaawang do ka goinawa nu to mgo duma nu su sikan ka oghimuon to tibo no mgo otow no ligkat to maawang no goinawa, ogsampit to ngaran to Lagboy no Igbuyag ta.
23 Di kono ka ogpanlabotlabot to sikan no igpaap-apuloy to mgo otow no kono no matul-id woy waro pulus su nataga kow to sikan ka ogligkatan to ogpokog-og-ogotoy on. 24 No og-awoson ta to kono ogpoog-ogotoy ka mgo sakup to Lagboy no Igbuyag ta, di ogkohoy-uan dan ka tibo no mgo otow. Woy og-awoson to maroyow ka batasan dan to pog-anad dan woy to oyow ogmalayaton dan ka poggogoinawa ran to mgo otow. 25 Woy og-awoson to og-ay-ayaran dan to og-anaron ka mgo otow no og-atu kaniu. Songo kuwo buwa ko ogbogoy ka Magboboot to oyow ogkabalbalawan dan on ka goinawa ran kandin no ogtuu on to tu-tuu ian no tinuuan. 26 Ian su oyow ogkatul-id on ka doromdom dan no ogkaawo on to pogboot ni Satanas no nakagawoy kandan su tuud din poron ko ogkapogos din poron sikandan to oghimu to ogkoiniatan din.