3
Mgo Udling tongod to mgo Pogbuyagon to mgo Nigtuu
1 Tu-tuu ian ka soini no ignangon ku kaniu: ko duon lukos no ogkoiniat ko ogkohimu on no pogbuyagon to mgo nigtuu, maroyow ian ka ogkoiniatan din. 2 Sikan ian to og-awoson to, ka lukos no igbuyag to mgo otow no ogtuu, waro maroot no batasan din no igkoogot kandin. Woy og-awoson to sagboka ro ka asawa rin no kono ogpanlibug woy kono ogmagolgol to agad nokoy, woy ogkatapid so goinawa rin no molungangon, woy maroyow ka pogsagman din to mgo magaliug din, woy ogkatou sikandin no og-anad to mgo otow. 3 Og-awoson to kono oglasinglasing ka igbuyag now woy to oyow kono no mabulut sikandin. Di og-awoson to moungangon sikandin woy to kono ogsasamuk woy to kono oggogolgol to salapi. 4 Og-awoson to maroyow ka pog-alap din to lunggunan din to oyow ogpakapaagad-agad ka mgo anak din woy to oyow ogtahuron dan sikandin, 5 su ogkoomonu naan ka sikan no igbuyag to og-alap to mgo otow no ogtuu ki Hisu Kristu ko kono ogkatou sikandin no og-alap to kandin no lunggunan? 6 Kono ogkaayun ko ka lukos no iam pad nigtuu ki Hisu Kristu ka oghimuon no igbuyag to mgo otow no nigtuu su songo kuwo buwa ko ogparakoldakol no ogkalogparan on sikandin to unawa to poglogpad to Magboboot ki Satanas. 7 Woy og-awoson to maroyow ka mgo batasan din oyow songo ogtahuron sikandin to mgo otow no waro nigtuu ki Hisus, su ko kono, songo kuwo no ogkasamilian sikandin no ogkagawayan on ni Satanas.
Mgo Talagbulig dio to Simbaanan
8 Ka mgo talagbulig to igbuyag to mgo otow no nigtuu, songo og-awoson to maroyow so batasan dan no litos to ogtahuron to mgo otow, woy to oyow ogkasaligan ko nokoy ka ignangon dan. Woy og-awoson to kono ogpanlasinglasing woy kono dan oggogolgol to salapi. 9 Og-awoson to ogmaawang do ka goinawa ran to Magboboot ka oggongonan dan ka sikan no pogtuu ta no impohitaga to Magboboot kanta. 10 Woy og-awoson no ogkoologon pad ka mgo batasan dan ko maroyow. No ko litos ian, litos no ogbutuan now on sikandan to katondanan to talagbulig to igbuyag to mgo otow no nigtuu. 11 No ka mgo boi no asawa ran, songo og-awoson to maroyow so batasan dan no litos to ogtahuron to mgo otow woy to kono dan ogtalosobon ka mgo duma ran woy to kono no ogmagolgol to agad nokoy woy to ogkasaligan sikandan. 12 No ka mgo lukos no talagbulig to pogbuyagon to mgo nigtuu, songo og-awoson dan to sagboka ro ka asawa ran, woy to maroyow ka pog-alap dan to asawa ran, mgo anak dan. 13 Ian su, ko maroyow ka pogbulig dan to mgo otow no nigtuu, ogkatimulon ka pogtahud to mgo otow kandan, woy kono ogkasipod sikandan no ognangonnangon to sikan no pogtuu ta ki Hisu Kristu.
Ka Tu-tuu ian no Tinuuan
14 Ka ogsulat a to soini, og-iman-iman a to magaan a buwa ogpakapanumbaloy dio to kaniu. 15 Di ogsulatan ku sikoykow to soini no ig-udling ku su oyow, ko duon igkatalantan ku pad, ogkataga ka ko nokoy ka litos no batasan ta ka nohimu on no mgo anak to Magboboot. Ian su sikanta no oglimudlimud no ogsimba kandin no ian Magboboot no kono ogkamatoy, ian ta ogkounawaan ka mgo suloy woy mgo tangon no ogpakarigon to baloy su ogpakamalogot kinow to tu-tuu ian no tinuuan, 16 su tibo kinow nataga to maroyow lagboy ka impohitaga to Magboboot kanta tongod to soini no tu-tuu ian no tinuuan ta to:
Nigpokootow si Hisu Kristu no nigligkat dio to Magboboot.
Woy nigmalogot to Gimukud to Magboboot to maroyow on ian si Hisu Kristu.
Nakitaan si Hisus to mgo diwata to Magboboot
woy innangonnangon on sikandin di to mgo otow no konon Hudiu
Woy duon on mgo otow no nigtuu on kandin kai to tano.
Woy nigbatun on sikandin dio to langit.