Galasia 4

^1,2 Ian ku igpananglitan ka anak to songo datu no oggalatan to tibo no igkaratu to amoy rin. Di ko bato pad ka sikan no anak, ogkounawa rod to uripon sikandin su agad ko sikandin ka tagtuun to tibo uromo, ogkouyamu pad to mgo buyag woy songo otow pad ka ogkasaligan to sikan no inggalat to amoy rin kandin taman to ogpokouma on ka sikan no allow no innangon to amoy rin. ³ Songo ogkounawa kinow rod su ko waro ki pad mataga to tu-tuu ian no tinuuan, nounawa ki pad to sikan no anak to datu su nakapaagad-agad kinow pad to mgo tinuuan to soini no kalibutan no kono no litos. ^4,5 Di ko nokouma on ka allow no imboot to Magboboot, impootow rin on ka bugtung no anak din, no kai to boi to soini no kalibutan impaanak. Nig-alam din ka boi no nasakup to sikan no Balaod ni Moisis su oyow ko dakol on ka anak din, ogkabalukas din on ka tibo no songo nasakup to sikan no Balaod oyow ogkohimu on sikandan no anak to Magboboot.

⁶ Nò mgo sulod, su nohimu kow on no anak to Magboboot, songo nabogayan kow on to Gimukud to Anak din. No su diad on to goinawa ta sikandin, ogpokouwang kid no og-ampu no ogkagian ta sikandin to, “Ian Amoy ku sikoykow.” ⁷ Sikan ian, kono kow on no mgo uripon to sikan no Balaod di mgo anak kow on to Magboboot. Woy su anak kow on nikaniu, ogsalupung kow on to tibo no igbogoy rin to Anak din.

Ka igkasasow ni Pablo to mgo nigtuu no taga Galasia

⁸ Nokani no waro kow pad mataga to tu-tuu ian no Magboboot, nouripon kow pad to sikan no mgo nig-ampuan now no kono no tu-tuu ian no magboboot. ⁹ Di kuntoon atag, nataga kow on to Magboboot, woy ko ogkagion ta pa to, pigtokod kow on nikandin. Nò, su sikan ian, manio naan to ogkoiniatan now to oghutuk kow no ogpasakup man do to sikan no tinuuan no waro pulus woy ko goinawa now to ogkohutuk kow on no ogpouripon. ¹⁰ Ian ku ig-inso su duon dod ogtumanon now no mgo allow woy ka mgo bulan woy ka mgo tuid. ¹¹ Sikan ian, dakol ka igkasasow ku kaniu, mgo sulod, su inat to warad pulus ka tibo no in-anad ku kaniu tongod ki Hisus.

¹² Nò mgo sulod, ogbuyu a kaniu to oyow og-iling kow kanak to songo nig-ilingan ku sikaniu to waro kow masakup to mgo Balaod ni Moisis. No ko nig-ugpo a pad dio to kaniu nokani, waro salo now kanak [su lagboy no maroyow ka batasan now kanak]. ¹³ Nataga kow to, ka sikan no an-anayan no innangonnangon ku kaniu tongod ki Hisus no dio a pad to kaniu, ian su nigdaralu ad dio no waro a mokohipanow. ¹⁴ Di agad mohirap kaniu ka sakit ku, di waro a now ang-anggoi woy waro a now lomoti. Di ka pogsagman now atag kanak, ian ku ogkoilingan ko songo diwata a pa to Magboboot ka nigdatong woy ko si Hisu Kristu ka nokouma.

¹⁵ An-anayan, narago kow lagboy! Manio kow kuntoon? Di ogpakamalogot a kaniu to lagboy no maroyow ka goinawa now kanak nokani. Ko nohimu pa, agad ka mata now ko ogkaloko pa, songo imbogoy now poron kanak. ¹⁶ Di og-inso a kaniu ko kuntoon ogmaroot on ka goinawa now kanak su ligkat to ingkanangonnangon ku kaniu ka tu-tuu ian no tinuuan?

¹⁷ Ka sikan no mgo otow no ogsasowsasow kaniu, ogkoiling to maroyow lagboy ka batasan dan kaniu, di maroot so tuud dan su ian goinawa ran ko ogkoongkoran a now on no oyow sikandan do ka ogkasagman now. ¹⁸ Balagad on poron, mgo sulod, ko dakol ka pogsagman to mgo otow kaniu ko maroyow pa ka tuud dan. Ko sikan poron ka batasan dan, agad waro a dio to kaniu, songo litos. ¹⁹ Nò mgo anak ku bag no indakoli ku, ian ku ogkoilingan ka songo boi no oglogonan din to pog-anak. Ian su songo oggoramon ku ka masakit to goinawa ku su ogpoomoton ku man do to oghutuk to pog-anad kaniu taman to ogpokounug kow on lagboy ki Kristu. ²⁰ Ian goinawa ku porom no dio a pa to longod now su oyow ogmaal-alukuyoy ki oyow ogkabalbalawan do ka goinawa ku. Ian su kuntoon, dakol ka igkasasow ku kaniu.

Ka mgo Pananglitan Tongod ki Agar woy si Sara

²¹ Mgo sulod, duon inso ku kaniu no ogpasakup poron to sikan Balaod, ko waro kow buwa makarinog to kagi to sikan no Balaod? ²² Ian su duon ingkasulat to sikan no Balaod tongod ki Abraham to daruwa ka anak din no lukos. Uripon ka inoy to sagboka no anak, di kono no uripon ka inoy to sikan no dangob no anak. ²³ Di ka bato no in-anak to inoy no uripon, nigligkat to pogboot do to otow. Di ka bato no in-anak to sikan no inoy no kono no uripon, nigligkat to pogboot to Magboboot no nigtuman din on ka insabut din ki Abraham.

²⁴ Ka sikan, ogkohimu no pananglitan. Ian su ka sikan no daruwa no boi, igkapananglitan ta to daruwa no sabut no imbogoy to Magboboot. Ka sagboka no sabut, ian ogkoilingan si Agar su uripon sikandin woy ka mgo anak din. No ka mgo otow no nasakup to Balaod no imbogoy to Magboboot ki Moisis dio to Sinai, songo ogkounawa rod to uripon. ²⁵ Si Agar, songo ogkapanag-ilingan to sikan no bubungan to Sinai no ian ligkatan to sikan no Balaod no ingkabogoy ki Moisis. Woy igkapanag-iling dod si Agar to kuntoon no lunsud to Hirusalim su ka mgo taga Hirusalim woy ka tibo no Hudiu no nasakup to sikan no Balaod, songo nouripon to sikan dod no Balaod.

²⁶ Di sikanta no nigtuu on ki Hisus, ogkoiling ki to kapunganan ni Sara no ian ka nokohun-a no asawa ni Abraham no kono no uripon. ²⁷ Ian su duon ingkasulat dongan no kinagian to Magboboot Kagi rin to,

“Karago ka, koykow no boi no waro nig-anak.

Agad to waro ka hayori, igngangngang nu ka igkarago nu su agad to noongkoran ka pad to asawa nu, ka koykow no anak, molmohon-ing on to anak to sikan no boi no waro ongkori to asawa rin.”

²⁸ Nò mgo sulod, songo ogkounawa kinow rod ki Isaak no ian anak to waro nouripon su ian to nohimu kinow on no anak to Magboboot su ligkat to pogtuman din to innangon din dongan ki Abraham.

²⁹ Dongan, ka sikan no anak ni Agar no nigligkat do to pogboot to otow ka pogkootow rin, nigbaybayaran din ka anak ni Sara no nootow su ligkat to pogboot to Gimukud to Magboboot. No kuntoon mgo sulod, songo ogkounawa ki rod ka nigtuu su songo ogkabaybayaran ki to sikan no mgo otow no ogsalig to kandan no pogtuman. ³⁰ Di nokoy ka innangon to sikan no Tahan no Kasulatan to kinagian to Magboboot? Kagi rin ki Abraham to,

“Dogila nu ka sikan no uripon no boi woy ka anak din su ka anak to uripon, kono ogkatalaran to sikan no inggalat to amoy ran no igkabogoy to sikan no anak to boi no kono no uripon.” Ian ka ingkasulat.

³¹ Sikan ian, mgo sulod, sikanta no nigtuu, kono ki man no kaap-apuan to sikan no uripon no boi su nohimu kinow on atag no kaap-apuan to sikan no boi no kono no uripon.