22
1 Kagi ni Pablo to mgo Hudiu to, “Mgo sulod woy mgo amoy, pamminog kow to soini no ignangon ku kaniu.” 2 Pogdinog to mgo otow to ian kinagian din ka kinagian dan no Hinibriu, warad ian nigkakagi sikandan no ogpamminog. 3 No kagi ni Pablo to, “Sikanak, Hudiu a no dio a mootow to lunsud to Tarsu dio to Probinsia to Silisia. Dokad di, kai a ro mogtulin to soini no lunsud to Hirusalim no si Gamaliel, ian ka nig-anad kanak. Matularong ka pog-anad din kanak to sikan no Balaod no inggalat to mgo kaap-apuan ta. No nounawa a rod man kaniu no kai kuntoon su nigpoomot a lagboy to pogtuman ku to tibo to agad nokoy no nahan ku no ogkoiniatan to Magboboot. a 4 Sikan ian to nigbaybayaran ku ka mgo nigtuu no nig-unug to soini no Dalan tongod ki Hisus, woy duon pad pighimatayan ku. Agad lukos to boi, nigdakop kud woy nigbanggutan kud woy impapirisu kud on,” kagi ni Pablo. 5 “Insaa now pa ka Labow no Talagpanubad woy ka mgo pogbuyagon ta kai su sikandan ka ogpakamalogot to soini no ignangon ku. Ian su sikandan ka nakabogoy kanak to mgo sulat no impaalap dan nokani dio to mgo duma ta no mgo Hudiu no dio to lunsud to Damasku. Sikan ian to nighondio a nokani to oyow ogpandakopon ku ka mgo otow dio no nigtuu on ki Hisus,” kagi ni Pablo, “su ighatod ku porom sikandan dini to Hirusalim oyow ogkalogparan on.
6 Nò, nighipanow ad on, no pogkamarani ku to Damasku no ogmarani on ogkougtu on ka allow, no natokow ad on to dakol no layag no nigligkat to langit. No nalayagan ka tibo duon to sasindogan ku. 7 Napolod a ro duon, no duon nigdinog ku no nigkagi kanak to, ‘Saulo, Saulo, manio to ogbaybayaran a nu?’ 8 Nigtabak a to, ‘Buyag, hontow ka?’ Kagi rin kanak to, ‘Sikanak no si Hisus no taga Nasarit no ian ka ogbaybayaran nud,’ kagi rin kanak,” kagi ni Pablo. 9 “Ka mgo duma ku, nigkita to layag di waro mogdinog to kagi to sikan no nignangon kanak. 10 No nigtabak a ki Hisus to, ‘Nokoy ka oghimuon ku, Buyag?’ Kagi to Lagboy no Igbuyag kanak to, ‘Sasindog kad on no hondio kad on to lunsud to Damasku, no duon ka ognangon koykow to tibo no nigbobootan to Magbob-ot no igpohimu rin koykow.’
11 “Pogpitow ku poron,” kagi ni Pablo, “no kono ad ogkita su nabutud ad on su ligkat to sikan no dakol lagboy no layag. Sikan ian to nigkitkit ad to mgo duma ku no nigparagas koy on nigsolod dio to lunsud to Damasku.”
12 Kagi ni Pablo, “Duon otow no taga Damasku no ogtahud to Magboboot, no si Ananias ka ngaran din. Batasan din to ayad-ayad no ogtuman to Balaod ni Moisis. No ogkatahuron sikandin to tibo no mgo Hudiu no taga Damasku. 13 Nò, nighondio si Ananias kanak woy nigsasindog to longod ku. Kagi rin to, ‘Sulod Saulo, gimulat kad on.’ Inogo on no nakakita ad on, woy nakakita a ki Ananias. 14 Kagi ni Ananias kanak to, ‘Ka Magboboot, no ian Magboboot dod to mgo kaap-apuan ta, sikandin ka nig-alam koykow to oyow ogkatagaan nud on ka ogkoiniatan to Magboboot, woy to oyow ogpakakita ka ki Hisus no ian ka Matularong no Suguanon din, woy to oyow ogpakarinog kad on to kandin lagboy no lagong. 15 Ian su sikoykow ka ogpamalogot din dio to tibo no mgo otow to sikan no nigkita nud woy ka nigdinog nud no ogligkat ki Hisus. 16 No kuntoon,’ kagi ni Ananias kanak to, ‘Nokoy ka ogtagaran nu? Sasindog kad on woy pabautismu kad on woy sampitan nud on ka ngaran ni Hisus oyow ogpasayluan din on ka mgo salo nu.’”
17 Kagi ni Pablo to mgo otow to, “Pogkaponga, nig-uli a dio to Hirusalim no nighondio ad to Dakol no Ampuanan ta, no duon impapitow kanak no paatawan. 18 No nakakita a ki Hisus no kagi rin kanak to, ‘Agpas ka awo kai to lunsud to Hirusalim su ka mgo otow kai, kono ogtuu to igmalogot nu to impohitaga ku koykow,’ 19 No nigtabak a ki Hisus to, ‘Di Buyag, ogtuu poron su natagaan to mgo otow kai ka mgo batasan ku nokani no inlogob kud ka mgo anaranan to mgo Hudiu no impapirisu ku woy nigbarasan kud on ka mgo otow no nigtuu koykow. 20 No ko nighimatayan dan si Istiban no talagmalogot to kinagian nu, nighoo ad woy nigsasindog a to longod dan no nanggalat ku ka mgo kinabo dan.’ 21 Di nigtabak si Hisus kanak to, ‘Hipanow kad on su ogsuguon ku sikoykow dio to mariu oyow ogkanangonan nu ka mgo otow no kono no Hudiu to nangnangonon ku,’ kagi ni Hisus kanak,” kagi ni Pablo.
22 Duon do ian mataman ka mgo otow no nigpamminog ki Pablo taman to nighingaranan din ka mgo otow no kono no Hudiu. No nambabansagon dan to, “Himatayi now on ka soini no otow. Himatayi now on. Konad no litos to duon pad goinawa.” 23 Nambabansagon ka mgo otow woy nigtopongan dan ka mgo manggad dan woy insawilo dan ka basak su nabolu on ian lagboy ki Pablo.
24 Nò, ka sikan no igbuyag to mgo sundalu, nigpasolod din on si Pablo dio to baloy woy insugu din oyow ogbarasan dan ka og-insoinso ki Pablo ko manio to nigbabansagonan ka mgo otow kandin. b
25 Sikan ian to nigbanggutan dan on ka bolad woy ka paa ni Pablo su ogbarasan dan porom sikandin di kagi ni Pablo to sagboka no kapitan no nigsasindog to longod din to, “Ko ogbarasan nu ka nasakup to gobirnu to Roma to waro now pad in-insoi ko duon salo din, kono kow buwa ogpokounug to sikan no balaod dan,” kagi ni Pablo. 26 Pogdinog to kapitan to sikan no kagi ni Pablo, nighondio pad to igbuyag to mgo sundalu no kagi rin to, “Manio to ogpabarasan nu kanami ka otow no nasakup to Roma?” 27 No sikan ian to nighondio ka igbuyag dan no kagi rin ki Pablo to, “Og-inso a koykow ko tu-tuu ian no nasakup kad to gobirnu to Roma?” Kagi ni Pablo, “Hoo.” 28 Kagi to igbuyag to mgo sundalu to, “Nakabayad a to dakol oyow ogkasakup a to gobirnu to Roma.” Kagi ni Pablo to, “Di sikanak atag, ligkat to ingkabato ku, nasakup a to gobirnu to Roma.”
29 Inogo on no ka mgo sundalu no ogbaras no og-insoinso poron ki Pablo, nan-awo on to longod din. Woy songo nahallok on ka igbuyag to mgo sundalu su nataga rin on to nasakup si Pablo to gobirnu to Roma woy su nakasalo on to balaod to sikan no gobirnu su nigpabanggutan din si Pablo.
Ka Pogtangko ni Pablo to mgo Pogbuyagon to mgo Hudiu
30 Pogkapawo on, nighokoran on to igbuyag to sundalu ka karina no inhikot to bolad ni Pablo. Woy nighinggat din si Pablo dio to pinanlimud din on no mgo igbuyag to mgo talagpanubad to to mgo Hudiu, woy ka tibo no mgo pogbuyagon dan. No nigpatangko din on si Pablo kandan.