12
Natimtimulan ka Igkabaybayari
1 Tigbal no dongan do to sikan, no si Hirodis no ian Lagboy no Igbuyag dan dio to Hirusalim, pigbunsuran din on to ogpambayadbayad to mgo otow no nigtuu ki Hisus.
2 No impatigbas ni Hirodis si Santiago no hari ni Huan su oyow ogkamatoy. 3 Pogpitow ni Hirodis to narago ka mgo Hudiu to namatoy on si Santiago, nighutuk man do no imparakop din on si Pedro. Ka sikan, tigpagkoonan to mgo Hudiu no ogkohingaranan dan to Pagkoonan to Paan no waro Igpatulin. a 4 Pogparakop din on, impapirisu on ni Hirodis woy duon sampulu woy hon-om no sundalu no pinabantoy rin ki Pedro. No to maallow woy to marusilom, nigbabaadbaad ka mgo sundalu to man hop-at ka ogsoipsoip no ogbantoy. No ian tuud ni Hirodis, ko ogkapongaan on ka sikan no pagkoonan, og-in-insaan din si Pedro duon to tangkaan to mgo otow. 5 Sikan ian to natagood on mapirisu si Pedro. Di ka mgo otow no nigtuu ki Hisus, ungod dan ampui si Pedro to Magboboot.
Ka Pogpalibuwas ki Pedro to pirisuan
6 Nò, nokouma on ka mohuri no marusilom ni Pedro dio to pirisuan. No pogkapawo on, ogpaangoy on porom ni Hirodis sikandin. Si Pedro, nohikotan to karina ka mgo bolad din no inggawid to daruwa no sundalu. Duon do ian nokohirogo sikandin. Woy duon mgo sundalu dio to tangkaan to mgo lokob to pirisuan no nigbabantoy. 7 Inogo on no duon diwata to Magboboot no niglibuwas on no nalayagan on ka sikan no sinabong to pirisuan. Niglamposan din ka kiliran ni Pedro no nigpokow din on. No kagi to diwata kandin to, “Onow kad on agpas.” No naawo do duon ka karina no inhikot to mgo bolad no Pedro. 8 Kagi to diwata kandin to, “Panginabo kad on woy panapatus kad,” No nigpaagad-agad on si Pedro. Woy kagi to diwata kandin to, “Bukusi nu ka lawa nu to sikan no malayat no kinabo nu no luyud kad on kanak.” 9 Nò, nakalibuwas do duon si Pedro ka nigluyud to diwata di waro din mataga to tu-tuu ian ka sikan no nohonduon kandin su nahan din no nigkita rin do duon to ogpaatawan kandin. 10 Nò, nigligaran dan on ka mgo talagbantoy no duon to diralom woy ka dio to taliwaro to pirisuan. No nokouma on sikandan dio to katamanan no lokob no putow no iglibuwas dio to lunsud. Nò, napulasan do duon, no nakalibuwas on woy si Pedro. Nigparagas dan to oghipanow dio to koopusan to sikan no dalan. Inogo on no naawo on ka sikan no diwata to Magboboot.
11 Sikan ian no nigtokod on ni Pedro to tu-tuu ian ka ingkabayo din. Kagi rin to, “Kuntoon, natagaan kud lagboy to duon diwata to Magboboot no insugu to Lagboy no Igbuyag ta no si Hisus. No nigpangabangan a rin oyow kono ogkatuman ka tuud ni Hirodis woy ka nig-im-imanan to mgo Hudiu.” 12 Pogdoromdom ni Pedro to sikan, nigparagas on nighipanow no oghondio to baloy ni Maria no inoy ni Huan no og-anggaan ki Markos. Moon-ing ka mgo otow no nalimud no nig-ampuan dan ka Magboboot. 13 Nò, nigtotoktok si Pedro to lokob no duon to alad to lama su ogpapulasan din. No duon boi no binulan no si Roda no nigdalapak oyow ogpitawon din ko hontow ka duon. 14 Pogtokod ni Roda to kagi ian ni Pedro, narago-dagò. Di waro din pulasi su nigpallaguy ka niglibong dio to solod to baloy. No nignangonan din ka mgo otow no nalimud to duon on si Pedro to gumawan. 15 Di kagi to mgo otow to, “Nangog ka ra!” Di nigbaghot to nigkagi ni Roda to, “Tu-tuu ian to si Pedro ian ka duon.” Kagi to mgo otow, “Diwata buwa to Magboboot no ogbantoy kandin.”
16 Di ungoron do duon toktoka ni Pedro ka lokob. Pogpulas dan on, pigkita ran to si Pedro nanaan ian. No nabolongbolong lagboy ka mgo otow. 17 Di nigkamoy si Pedro to oyow oghagtong on ka mgo otow to ogkakagi. Woy innangonnangon din kandan ka nighimu to Magboboot no impalibuwas kandin to pirisuan. Kagi ni Pedro, “Inangon now ka soini dio ki Santiago woy to mgo sulod ta to pogtuu ta ki Hisus.” Pogkaponga, nighipanow on si Pedro no nighondio to songo ugpaan.
18 Nò, pogkapawo on, nasasowsasow on ka mgo sundalu ko nighondoid on si Pedro. 19 No si Hirodis, songo nigpapamangho ki Pedro di waro ian makitoi. Sikan ian to ungod din insoinsoi ka mgo sundalu no nakabantoy ki Pedro, woy nigpohimatayan din on sikandan. Pogkaponga, nighipanow on si Hirodis ligkat to Hudia no nighondio to lunsud to Sisaria no dio pad nig-ugpò.
Ka Pogkamatoy ni Hirodis
20 Nò, duon ingkabolu ni Hirodis to mgo taga Tiro woy mgo taga Sidon. No su ka ogkakoon dan, ogligkat to kandin no ugpaan, niglimudlimud on sikandan no pig-amigu ran ka sinaligan ni Hirodis no si Blastu oyow ogpohusayon din si Hirodis ko nokoy ka igkabolu din kandan.
21 Pogkouma on to allow no innangon to ogpalimud ka mgo otow to tangkaan ki Hirodis, nig-ilis on sikandin to maroyow no manggad no ian ilisanon to dakol no igbuyag. No nigpinpinnuu on si Hirodis to pinnuanan din to pandatuan. Woy duon malayat no innangonnangon din to sikan no mgo otow no nalimud. 22 Nò, pogdinog to mgo otow to innangonnangon ni Hirodis, pigpaagbotan dan to pogsayo dan to, “Kono no kagi ro duon to otow ka soini ko kono no magboboot nanaan ka ogkagi kanami.” 23 Inogo on no niglogparan on to diwata to Magboboot si Hirodis su waro din sayaa ka tu-tuu ian no Magboboot. No nig-iasan on ka lawa ni Hirodis woy namatoy on.
24 Di ungod naalap-alap on ka kinagian to Magboboot taman to nigtangkap on. Woy natimtimuan on ka nigtuu ki Hisus.
25 No si Birnabi woy ki Saulo, napongaan dan on ka inhondio dan to Hirusalim, no niglibong on to lunsud to Antiokia. Woy pigduma ran on si Huan no og-anggaan ki Markos.