Numeros 17

Nigtunas ka Tukod ni Aaron

¹ Nigkagi ka Magboboot ki Mosis to ² “Nangoni nu ka mgo otow to Israil woy puruta nu ka sampuu woy daruwa no mgo tukod ligkat kandan; sagboka no tukod to kara igbudyag to sampuu woy daruwa no lunggunan to Israil. Ipatik nu duon to mgo tukod ka ngaran to tagtuun to tukod. ³ Dio to tukod to lunggunan ni Livi ipatik nu ka ngaran ni Aaron, hoo su duon sagboka no tukod to igbudyag to kara lunggunan no kapunganan ni Israil. ⁴ Isabuk nu ka mgo tukod to sood to Tukbung to Pogtangko to tangkaan to Sooranan to Kasabutan no ian ka tomuanan ku koikow. ⁵ Ogtunas ka tukod to otow no og-aamon ku, woy ogtamporon ku ka soini no pog-aaras ladyun to mgo otow to Israil tongod koikow.”

⁶ No nigkagi si Mosis duon to mgo otow to Israil, woy pigbogadyan sikandin to mgo igbudyag dan to sampuu woy daruwa no tukod; sagboka no tukod to kara igbudyag to lunggunan no inlagkos ka tukod ni Aaron. ⁷ Insabuk ni Mosis ka mgo tukod duon to tangkaan to Magboboot to Tukbung to Kasabutan. ⁸ To pogkapawo nigsood si Mosis to Tukbung to Kasabutan woy nakita rin ka tukod ni Aaron no tuus to lunggunan ni Livi. Waro do nigtunas soini ko konon nigtunas, nigbulak woy nigpambogas on to mgo almindras! ⁹ Inlibuwas ni Mosis ka mgo tukod ligkat to tangkaan to Magboboot duon to mgo otow to Israil. Pigmolmoogan dan ka mgo tukod woy pigpurut to kara sagboka kandan ka kandin do no tukod.

¹⁰ Nignangon ka Magboboot ki Mosis to “Ilibong nu ka tukod ni Aaron duon to tangkaan to Kasabutan, odyow no ogkagaat no tuus to mgo otow no og-atu. Ogkatampod on ka kandan no pog-aaras tongod koddi, odyow no kono ogkammatoy sikandan.” ¹¹ Pighimu ian ni Mosis ka insugu to Magboboot.

¹² Nignangon ka mgo otow to Israil duon ki Mosis to “Ogkammatoy koy! Wa ki, wa ki tibo ian! ¹³ Agad hontow no ogdani ro to tukbung to Magboboot ogkamatoy. Ogkoubus ki buwa ogkammatoy?”