12
Nig-atu si Aaron woy si Miriam ki Mosis
1 No kuntoon nigbunsud nig-aaras si Miriam woy si Aaron tongod ki Mosis su naka-asawa sikandin to boi no konon otow to Israil no otow to Kus atag. 2 Songo nig-inso sikandan to “Ogkagi ro buwa ka Magboboot pinabadyo ki Mosis? Kono buwa songo ogkagi sikandin pinabadyo kanami?” No pigdinog to Magboboot ka innangon dan. 3 (Si Mosis atag, nigpasaad-saad ladyun sikandin, waro duma no otow kai to ampow to tano no unawa kandin to pogpasaad-saad.) 4 To waro moglianlian nigkagi ka Magboboot ki Mosis, ki Aaron woy ki Miriam to “Libuwas kow to Tukbung to Pogtangko, sikaniu tatou ian.” No sikan ian niglibuwas sikandan tatou. 5 No niglogsad ka Magboboot pinabadyo to suwoy to gapun woy nighasindog sikandin to gomawan to Tukbung woy pig-umow rin si Aaron woy si Miriam. To pogdani ran daruwa, 6 nigkagi ka Magboboot to “Pamminog kow pa to mgo kinagian ku: Ko duon taagtagna ligkat to Magboboot no duon to taliwaro kaniu, ogtokowan ku sikandin pinabadyo to mgo kitoonon, woy ogkagian ku sikandin pinabadyo to mgo tagoinop. 7 Di ko si Mosis atag, loin ka oghimuon ku; hoo su sikandin ka lagboy no matuwarong no otow taliwaro to lunggunan ku. 8 Og-aukuy a ki Mosis no ogpatang-tangkooy koy, no matul-id ka pogkagi ku no kono no mgo hinoos no mgo kinagian; ogpakakita si Mosis to aung to Magboboot. Manio naan no waro kow mahallok to pog-aaras tongod to suguonon ku no si Mosis?”
9 Nabou ka Magboboot kandan woy pig-ongkoran din sikandan. 10 To pogkawoy to gapun ligkat to ampow to Tukbung, dio nigsasindog si Miriam no maputi on naan lagboy tongod to ibung. Nigpitow si Aaron kandin woy nakita rin no ibungon naan si Miriam 11 woy pignangonan din si Mosis to “Igbudyag ku, kono nud isabuk duon to goinawa nu soini no sao noy koikow su waro koy mogdoromdom to marodyow to poghimu noy soini. 12 Doka ogbaagara sikandin no inat unawa to bato no taan no namatoy to pogko-otow rin no oglibuwas to aanakan to inoy rin no namou on ka sapu din.”
13 No sikan ian no nig-umow si Mosis to Magboboot no kagi rin “Magboboot, dorodyowa nu poron sikandin!”
14 Nigtabak ka Magboboot ki Mosis to “Ko naugpa pig-iloban sikandin to amoy rin dio to langlanguan din kono buwa no ogdoromdomon now no ogsamilian sikandin sood to papitu no allow? No, po-ugpaa sikandin to libuwasan to pig-ugpaan to mgo otow sood to papitu no allow, woy on ogpaka-uli sikandin.”