Yhûmsîng Garai Gyó Lé Mù Ùp Râ Hkyô
14
Yerusalem wà mó ê, haû Yhûmsîng Garaî é buìnyì jé lo nyi ri; haú hkûn, nàng sing é sùtzè pé lé lú yu pyám byi mù, náng é wàhkûm hkaû má gam yu pyám kôrâ nghut lhê.2 Hkâsu mù gâ le, Ngò gi, Yerusalem wà mó lé majan zan râ matú, gótû byù myû wuì bànshoq lé zing nhâng râ nghut lhê; yhángmòq gi, wà haú lé zân ung yù mù, yhûm pé lé hpyoq zo hpyoq shuq kut luî, myiwe wuì lé rhoi pyám kôrâ nghut lhê. Wà byù rawuí gû gi, shúm zung é huî ló kôrâ nghut lhê; nghut kôlhang, myìt gyó tô é bang gi, wà hkaû má wó jâng nyi to kôrâ nghut lhê. 3 Haú hkûn, haû Yhûmsîng Garai gi, htoq ê mù, majan zân é buìnyì má su, byù myû wuì haú bang lé majan zan râ nghut lhê. 4 Haú buìnyì má, Yhâng é hkyî gi, Yerusalem wà mó buìhtoq hkyam mâ é Tsanlun Bùm má nang râ nghut mù, Tsanlun Bùm haû gi, buìhtoq hkyam mai buìwàng hkyam jé shoq í hkyam byáng gòq byùq mù, langhkaû mó dùt byùq râ nghut lhê; bùm hau é rahkyam gi, mautsûng shut huî ló mù, rahkyam gi, maupyî shut huî ló byùq râ nghut lhê. 5 Haû mù, núngmòq gi, Ngá é bùm gyoro langhkaû mai hpang ló kôrâ nghut lhê; hkâsu mù gâ le, langhkaû haû gi, Azela jowò jé shoq làm râ nghut lhê. Núngmòq gi, Yudaq hkóhkâm Uzi-a é i-pyàt má layàng nhún luî núngmòq hpang é su, hpâng kôrâ nghut lhê. Haú hkûn, Ngá é Garai Gasang nghut é, haû Yhûmsîng Garai jé lé râ nghut lhê; haû mù, chyoiyúng é bang bànshoq le, Yhang eq rahá bo lé lô kôrâ nghut lhê.
6 Haú buìnyì má, buìloq le a jòq, gyòq é eq nghânhpyû le a jòq râ nghut lhê. 7 Haû gi, nyí le a nghut, myín le a nghut, Yhûmsîng Garai za sê é làklaí é buìnyì nghut ri; chutshúm zó má maubó râ nghut lhê.
8 Haú nyí má, Yerusalem wà mó mai chyungxe wuì yui htoq râ nghut lhê; rawuí gû gi, buìhtoq hkyam mâ é Xo Nhông má yui wàng mù, rawuí gû gi, buìwàng hkyam mâ é Medihteri-an Wuimau má yui wàng râ nghut lhê; haû gi, buì lúm nám lé nghut kôle, gyòq nám lé nghut kôle, yui nyì râ nghut lhê.
9 Haú hkûn, haû Yhûmsîng Garai gi, mingkan gón é hkóhkâm dùt râ nghut lhê. Haú nyí má, Yhûmsîng Garai gi, rayùq za nyì râ nghut mù, Yhâng é myìng za jòq râ nghut lhê.
10 Ra-mau gón é gi, Geba wà mai Yerusalem wà mó é maupyî hkyam mâ é Rimon jowò jé shoq, Araba pá su dùt byùq râ nghut lhê. Nghut kôlhang, Yerusalem wá mó gi, lhoqtoq lhoqmyhang é hui mù, Ben-yamin Hkum mai Sânghî Hkum jowò eq Htúngchyûn Hkum jé shoq, Hananela Mâchya mai hkóhkam é tsibyiq wing pyik jang jé shoq nghut mù, yhâng é jowò má yhang jòq to râ nghut lhê. 11 Haú má byù nyì berâ nghut mù, hkâ-nhám le lhoqhtên pyâm é dum hui râ a nghut lo. Yerusalem wà mó gi, nguì ngón shoq jòq nyì berâ nghut lhê.
12 Yerusalem wà mó lé majan zân é byù myû wuì bànshoq bâng é ahtoq má jé râ nghut é, Yhûmsîng Garaî é wúm gi, shí dông nghut lhê; yhángmòq gi, chyungxe rû dui nyi ashî le lháng, yhángmòq é sho bùp byùq mù, yhángmòq é myòqhkóng má myòqlhumjí bùp byùq luî, yhángmòq é nhut má shô bùp byùq nhâng râ nghut lhê. 13 Haú buìnyì má, byu pé gi, Yhûmsîng Garaî èq bàt é ihkyùp mó hui zo râ nghut lhê; yhángmòq gi, rayùq eq rayùq, lòq èq kyaq zuî lhum mù, htîm lhum kôrâ nghut lhê. 14 Yudaq le Yerusalem wà mó má majan zan râ nghut mù, awui ayàm mâ é byù myû wuì bànshoq é sùtzè nghut é, hîng, ngùn eq mèbu myo myo lé gùq tsîng to kôrâ nghut lhê. 15 Gye pê é gyèwap mâ é myang pé, loze pé, gola-uk pé, loze pé eq shigu gaunyhaú bànshoq le, rajung zâ é wúm ihkyùp hui zo râ nghut lhê.
16 Hau htâng, Yerusalem wà mó lé majan lé zân é byù myû wuì bànshoq mai nyi myìt gyó tô é bang gi, haû Wum-o a-tsam dìk shoq bò Sû Yhûmsîng Garai nghut é, Hkóhkâm lé noqkuq râ matú le, Zúm Poî lòm râ matú le, razàn htâng razàn dòq lé lô kôrâ nghut lhê. 17 Haû Wum-o a-tsam dìk shoq bò Sû Yhûmsîng Garai nghut é, Hkóhkâm lé noqkuq râ matú, Yerusalem wà mó má a dòq lé é, myìdàm gón mâ é byù myû ra-myû myû nyi é nghut jáng, haú bâng ahtoq má maú wo hkyó byi râ a nghut. 18 Egutuq byu pé a dòq ê mù, a bo lom é nghut jáng, yhángmòq ahtoq má maú wo hkyó byi râ a nghut. Hau htoq agó, haû Yhûmsîng Garai gi, Zúm Poî lòm râ matú a dòq e é byù myû wuì lé hui zo nhang é wúm ihkyùp lé, yhángmòq ahtoq má jé nhâng râ nghut lhê. 19 Haû gi, Zúm Poî lòm râ matú a dòq e é, Egutuq byu pé eq gótû byù myû wuì bànshoq bang hui zo râ ihkyùp mó nghut ri.
20 Haú buìnyì má, “Yhûmsîng Garaî é matú Chyoiyúng ri” gâ é lé, myangchyû pé má tsing kâ tap to râ nghut lhê; haû Yhûmsîng Garaî é yhûm má jòq é au pé gi, hkungga gyàp hí má jòq é hkoq pé su, chyoiyúng râ nghut lhê. 21 Hau htoq agó, Yerusalem wà mó eq Yudaq mau má jòq é au pé bànshoq gi, haû Wum-o a-tsam dìk shoq bò Sû Yhûmsîng Garaî é matú chyoiyúng râ nghut lhê; hkungga nhông râ matú lé é bang bànshoq gi, au pé lé yù mù, hkungga sho chyoq kôrâ nghut lhê. Haú buìnyì mai, haû Wum-o a-tsam dìk shoq bò Sû Yhûmsîng Garaî é yhûm má, Hkanan byu péa lòm râ a nghut lo.