Yerusalem Wà Mó É Gye Pé Lhoqhtên Pyâm É Hui Râ Hkyô
12
Myìqhtoi dang: Isira-elaq a-myû eq sêng é haû Yhûmsîng Garaî é mungdang gi, shí dông nghut ri.Mauhkûng lé hpyi hkâng to mù, myìdàm htoq é a-pûn awang lé hkyô to luî, byu é ahkaû má sô hpan kat to byî é Yhûmsîng Garai gi, shi su ga taî pyo ri; 2 “Ngò gi, Yerusalem wà mó lé, awui ayàm lhînghkyùq mâ é byù myû bànshoq é matú, shuq wùt é gòm dùt nhâng râ nghut lhê; Yerusalem wà mó lé lhom hkyuq to kô é hkûn, Yudaq mau le lhom hkyuq tô é hui râ nghut lhê. 3 Haú buìnyì má, myìdàm htoq mâ é byu myû bànshoq bang Yerusalem wà mó lé htim râ matú chôm zùp zîng bùm kô é hkûn, Ngò gi, Yerusalem wà mó lé, byù myû wuì bànshoq bâng é matú a wó htòt pyâm é lungmó cham dùt nhâng râ nghut mù, haú lé htòt chyam wú é bang bànshoq gi, dàm dap é hui zo kôrâ nghut lhê. 4 Haú buìnyì má, Ngò gi, myang du hkangmó lé gyùq dàn nhâng mù, myang ji jî é sû lé nâ byùq nhâng râ nghut lhê.” gâ ri; haû gi, Yhûmsîng Garai taî pyo é nghut ri. Hau htoq agó, “Ngò gi, Yudaq a-myû up lé wú tsuq nyî râ nghut kôle, gótû byù myû wui é myang bànshoq lé myòq lhoqchit pyám byi râ nghut lhê. 5 Haú hkûn, Yudaq a-myû koq pé gi, yhûmsing é i-myìt hkaû má, ‘Yerusalem wà mó mâ é bang gi, wúm htan bum ri; hkâsu mù gâ le, haû Wum-o a-tsam dìk shoq bò Sû Yhûmsîng Garai gi, yhángmòq é Garai Gasang nghut ri.’ ga taí kôrâ nghut lhê.
6 Haú buìnyì má, Ngò gi, Yudaq a-myû koq pé lé, htang bûm hkaû mâ é myi-au su le, gùqding gyoro mâ é myishâm su le, dùt nhâng râ nghut lhê. Yhángmòq gi, lòqyò, lòqpai lhînghkyùq mâ é byu pé bànshoq lé nyé gyó pyám râ nghut lhê. Nghut kôlhang, Yerusalem wà mó mâ é byu pé gi, haî a dùt é za, Yerusalem wà mó má nyi myìt gyó to kôrâ nghut lhê.
7 Haû Yhûmsîng Garai gi, Dawiq é yhûmbyù wuì eq Yerusalem wà mó má nyì bâng é xânghpoq nge wó hkyô lé, Yudaq mingbyû wui é xânghpoq nge wó hkyo htoq a ko sháng gàq ga, Yudaq mingbyû wui é nyì jowò lé hí hkyi yù râ nghut lhê. 8 Haú buìnyì má, haû Yhûmsîng Garai gi, Yerusalem wà mó má nyi é bang lé wú magûm byi râ nghut lhê; haú hkûn, yhángmòq mâ é wum je nyhôm é bang gi, Dawiq su wum htân kôrâ nghut lhê; Dawiq é yhûmbyù wuì gi, Garai Gasang su le, yhángmòq é hí má e ló byî é Yhûmsîng Garaî é maumang su le, dùt râ nghut lhê. 9 Haú buìnyì má, Ngò Yhûmsîng Garai gi, Yerusalem wà mó lé majan lé zân é byù myû bànshoq lé lhoqhtûm pyám râ nghut lhê.
Htaû Sat Pyám Huí Su É Matú Ngaùhkyûng Ngaùyang Kut Râ Hkyô
10 Ngò gi, Dawiq é yhûmbyù wuì eq Yerusalem wà mó má nyì bâng é ahtoq má, jeju eq dûng tôngbán é sô lé hut hkyô kat râ nghut lhê. Yhángmòq gi, yhángmòq èq htaû sat pyâm é sû Ngo lé wú kôrâ nghut mù, zotê é matú ngau é su, yhâng é matú ngaùhkyûng ngaùyang kut luî, zo-mún yùqzô é matú yón ngau é su, yhâng é matú sing hpyik û gyàng yón ngaû kôrâ nghut lhê. 11 Haú buìnyì má, Yerusalem wà mó má ngaùhkyûng ngaùyang dùt é gi, Megido pá má Hadat Rimon jowò é matú ngaùhkyûng ngaùyang kut é í dùt râ nghut lhê. 12 Mîngdán hkaû má, ó le ô é akoq iyon yon râ nghut mù, Dawiq é yhûmhtu akoq mâ é bang rawò, yhángmòq é yhûmsîng myhî pé rawò, Nahtan é yhûmhtu akoq mâ é bang rawò, yhángmòq é yhûmsîng myhî pé rawò, 13 Lewiq é yhûmhtu akoq mâ é bang rawò, yhángmòq é yhûmsîng myhî pé rawò, Shimi é yhûmhtu akoq mâ é bang rawò, yhángmòq é yhûmsîng myhî pé rawò, 14 myìt gyó tô é a-myû koq bànshoq mâ é bang rawò, yhángmòq é yhûmsing pé rawò kut, iyon yôn bùm kôrâ nghut lhê.