ليه يا نفسي كده حزينة
42
1 يا رب، شوق نفسي ليك، زي لهفة غزال عطشان لغدير المياة.2 نفسي مشتاقة لك يا حي يا قيوم. فامتى يا رب أشوف نور وجهك؟
3 دموعي بقت قوْتي طول نهاري وليلي، وطول يومي بيسألوني فين هو إلهي؟
4 يا رب، الحزن بيفيض في قلبي لما بافتكر قيادة موكب حجاج بيتك،
وفرحتي بهتاف الحمد لك وسط جموع المسبحين.
5 فليه يا نفسي كده حزينة ومهموم قلبي؟ فأنا توكلت عليك يا ربي، ودايمًا أحمدك لأنك بتنجيني.
6 يا رب، وأنا هنا عند منبع نهر الأردن على جبل حرمون، أذكرك ونفسي حزينة.
7 سيل من الحزن غمرني، وزي الفيضان الهادر جرني.
8 دعيت لك يا ربي الحي وأنت بتتولاني طول أيامي برحمتك، وفي الليل باسبح بحمدك.
9 يا ربي وملجأي، ليه هجرتني؟ وليه أعيش حزين من عدو بيضطهدني؟
10 يا رب، الألم بينخر عظمي، و طول يومي أعدائي بيسخروا ويسألوني فين هو إلهي؟
11 فليه يا نفسي كده حزينة ومهموم قلبي؟ فأنا توكلت عليك يا ربي، ودايمًا أحمدك لأنك بتنجيني.