10
Jisọs Karais ìgwa ngwugwa mgbọ ge gaalek eyi òsoso otutuuk mgbọ
1 Ikan kè Mosis ìre gaalek ogugo atata inu echi òbonunu, ìkare atata inu cha me lek kiban̄. Me irak Ikan ya, ebi ngwugwa ekpọkpọ ikigwa chieen̄ ngwugwa yaage acha geelek. Mije Ikan ya orebe ogugo gaalek, ìkpokọt irọ inyi ebi ìkitọbọ ebum inyi Awaji enwọn esan̄a. 2 Mebe ke Ikan ya îrọ inyi ebi ìkitọbọ ebum inyi Awaji cha etana esan̄a mgbọ yaage, mè ijo kiban̄ ikayaka ìkup ema me lek, ejit kiban̄ kpomoyaka ikifieek ema ikọ ofolek ijo inu ofifi. More ikeya, kè otutuuk ngwugwa cha îra ifieek. 3 Ngwugwa cha ìkirọ inyi ebi ene ekekeek ijo kiban̄ me acha me acha, 4 mije, eje eriembuuk mè ebot ìkpokọt iben ijo inu ebilene isan̄a.
5 Eya orọ, mgbọ Karais onube linyọn̄, ìtumu inyi Awaji ibe,
“Ngwugwa eyi ekikpan̄ anam mè eyi kpekikpan̄ anam
ìkakup owu me uyọt,
ire, akpalek n̄a ke oneen̄ isun̄ ibe emi ǹsa ǹgwa ngwugwa.
6 Owu òkakibele ejit me lek owuwa ngwugwa ewọwọp,
mè echi ekisa iben ijo inu isan̄a.
7 Nnenitumu ibe, ‘Jei Awaji, kpọ emi gwu!
Ǹnu inenirọ ekiket kwun̄,
kubọk egebe ofolek n̄a me Ikpa Ikan kè Mosis.’ ”a
8 Me adasi irek, ubọk geelek Ikan kè Mosis okido ibe egwa ngwugwa, Karais ìtumu ibe, “Owu òkaweek ngwugwa echi ekikpan̄ anam mè echi kpekikpan̄ anam, mè echi ewọwọp mè echi ekisa iben ijo inu isan̄a. Ngwugwa chi ìkakibele owu ejit si.” 9 Îtumu si ibe, “Kpọ emi gwu! Ǹnu inenirọ ekiket kwun̄.” Sa me ikeyi ke Awaji oda adasi ngwugwa cha isan̄a, mè inisa eyi òso iba, òrere ngwugwa Karais ogwabe, inwene. 10 Mije Jisọs Karais osabe akpalek kan̄ igwa ngwugwa mgbọ ge gaalek iso otutuuk mgbọ, kubọk Awaji oweekbe, mîrọ inyi eji otutuuk ene ekup me mbuban.
11 Ogwu ngwugwa ebi Ju geelek ìkikekeke ikeke ikeke ikifaka mfaka kan̄ egwe geelek òwele me inyọn̄, mè ikpọkpọ ikigwa chieen̄ ngwugwa yaage kpa mgbọ kpa mgbọ. Ire, ngwugwa chi ìkpokọt iben ijo inu ebilene erọbe isan̄a kubọk ge. 12 Ire, Karais ìgwa ngwugwa mgbọ ge gaalek iso otutuuk mgbọ, isasa iben ijo inu ebilene isan̄a. Mgbọ îgwabe ngwugwa ya isan̄a, isisiki ikweek irek me agan̄ ubọk ulom Awaji. 13 Karake mgbọ ya ke îkup me ere ya ikikpọ mgbọ Awaji môrọbe inyi ebi ochicha kan̄ ekana inu ibene ukot enyi ọmọ. 14 Sa me mgbọ ngwugwa ge ya, Karais îrọ inyi otutuuk ebi ọmọ okirọ inyi ekup me mbuban etana esan̄a ire mgbọ ikakaan̄ge itata. 15 Ekwukwu Mbuban si îrọ ikọ ya inye. Ìdasi itumu ibe,
16 “Okumugwem ìtumu ibe,
‘Inyan̄a-ibot mbanyan̄a melek kiban̄ ìre ikeyi:
Ukot keya isiraka, mâtap ikan n̄a me emen ejit kiban̄,
mè ige si ikan cha me emen ekiket kiban̄.’b
17 Îtumu igbaalek si ibe,
“ ‘M̀kpayaka ikeek ijo inu kiban̄
mè nrọ-nlọ kiban̄ kubọk ge.’c ”
18 Awaji isitele otutuuk ijo inu chi inyi ebilene, ngwugwa ekigwa isa iben ijo inu isan̄a ìkpoyaka ikup me uyọt ofifi.
Eji ekat ejit ekeke enye, mè eje egbet lek Awaji
19 Eya orọ, bọn Nte n̄a, eji mîkaan̄ òjot òjot unen iraraka inin̄ Ere Òkup Mbuban Ichit, sa me eje kè Jisọs. 20 Ọmọ îchili ayaya oniin̄ eyi òkup me ugwem inyi eji ekọt eje etibi ekwut mgban Uwu Mbuban ya, eyi òrere akpalek kan̄. 21 Eji mîkaan̄ ikpele ogwu ngwugwa ogwu òrere ogwu ibot me uwu Awaji. 22 Mije eji ekaan̄be otutuuk inu chi, eji esa me ejit òtatana, mè òjot òjot ikpọchieen̄ eyi ichechieek eje enu me lek Awaji. Eji esa ejit eyi esabe eje inyan igwook inyi itana, mè ikayaka ìfieek eji ikọ, mè esa si akpalek eyi esabe mun̄ eyi kpunube okpa geege me emen igwọk itana, eje enu me lek Awaji. 23 Eji etet ikpọchieen̄ ya, eyi eji echieekbe me lek mè ikitumu isibi, enye, mije, ogwu òchechieek eji use ya ìkakilọ irọrọ inu geelek îtumube ibe ọmọ môrọ. 24 Eji ekekeek ubọk eji ebekisa itap ebi melek kiji efuuk me emen, inyi ema ekemun̄ ene me chieen̄, mè ekerọ ata inu. 25 Eji ekatele ikekigbaan̄ ititiin̄, kubọk usini ebi ene ekitele. Eji eketap ebi melek kiji efuuk me emen, ògak ge, mije eji eriọọn̄be ibe ke usen Okaan̄-ene obonu òkigbet enenen.
26 Mgbọ keyi erọbe inyi eji eriọọn̄ otutuuk atikọ, ire eji ikigen ibak ikpọkpọ ikirọ ijo inu, kpunu ofifi ngwugwa ebeyaka igwa isa iben ijo kiji isan̄a. 27 Ire, otutuuk inu òboyaka inikup inyi eji me mgbọ keya ìre ikukup me ukpook ikikpọ oyerebet Awaji, mè unye ukan̄ òkisak gwugwugwugwu, eyi òbotaka ebi ochicha Awaji iriọk. 28 Me ukot ikaan̄, ogwu geelek òrọrọn̄ Ikan kè Mosis, ekikpakpan̄ ene ya me kpunube nsan, ire ebi ata-ikọ iba, mè ìre ita isinikeke ata-ikọ ikeme ene ya. 29 Ire, ire ikeya me atikọ, ìre enyi kpekeek ibe ke osusut òmimin enenen igak ikeya môkup inyi ene geelek òjajak Gwun̄ Awaji me ukot, mè imọnọ eje inyan̄a-ibot ya, eyi esabe irọ inyi ọmọ ikup me mbuban, kubọk inu ikakupge me mbuban, mè inye chieen̄ inyi Ekwukwu Mbuban ogwu òkinyi ene atata nnwọn eyi Awaji? 30 Mije, eji mîriọọn̄ ogwu òtutumu ibe, “Îre emi nkirọ ene useen̄ inu, mâyaka ikpe,”d mè itumu si ibe, “Okaan̄-ene môfieek oyerebet inyi ebi kan̄.”e 31 Ene irọrọn̄ inin̄ ubọk Awaji òkup me ugwem ìre inu òkakaan̄ ukpook.
32 Ire, ìkeek adasi mgbọ ya enyi ebọkọbe utoon̄ Awaji itap. Enyi mîbọkọ owuwa ufialek mgbọ ya, mè ichieek si mkpa ikeke inye. 33 Usini mgbọ, ebi ene mîrọ enyi inu esip, mè itap enyi unan me lek me eden̄ ama. Usini mgbọ, enyi mîra ikisa chieen̄ imun̄ ubọk ekirọ si ebi melek kinyi inu cha me agba lek kinyi, njijin ebi melek kinyi cha îra ikitet enyi. 34 Enyi mîbọkọ ufialek melek ebi ìkup me mkpọn. Mgbọ ebọkọbe enyi inu enyi ekaan̄be, enyi mîme me unwọọn̄, mije, enyi mîriọọn̄ ibe ke enyi me lek kinyi mîkaan̄ inu echi ònwọnwọn igak echi ebọkọbe enyi, mè ikifuk si ire mgbọ ikakaan̄ge itata.
35 Eya orọ, ikafiin̄ unye-ejit ya enyi ekaan̄be, mije, ebi mênyebe ejit ire itata mêbọkọ mkpukpe òmimin enenen. 36 Îkup me uyọt ibe enyi ekaan̄ ukarajit, inyi enyi ekọt erọ nkeek Awaji, mè ebọkọ inu ya Awaji ochieekbe use inyinyi enyi. 37 Mije, Ikpa Mbuban ìtumu ibe,
“Me mgbidim mgbọ, ogwu òbonunu ya mônu, ìkpofiat mgbọ.
38 Ire, ogwu eyi n̄a, ogwu ata irọrọ
môluk ugwem sa me ichechieek.
Ire, ire ikpebe lek inyi udun̄,
emi m̀kpabele ejit me lek kan̄.”f
39 Ire, eji kpere ebi ìkikpebe lek inyi udun̄, mè ikwu ichep. Eji ìre ebi ìchechieek, mè ikaan̄ unyan̄a me ubọk Awaji.