8
Ayaya inyan̄a-ibot mè ayaya ogwu ngwugwa òje me lek înwọn igak echi oka
1 Otutuuk ibot ikọ eji ekitumu ire ikeyi: Eji mîkaan̄ ojelek ogwu òban Awaji òkup kubọk ntumube iraka, ogwu òsisiki ikweek irek me agan̄ ubọk ulom ogboon̄ ubọọn̄ eyi Awaji Ogwu Òmimin Ichit, me emen inyọn̄. 2 Ogwu òban Awaji yi ìkisi ikwaan̄ me Ere Òkup Mbuban Ichit, eyi òrere Uwu Mbuban eyi atata, eyi Okumugwem me lek kan̄ onamabe, ìkare ebilene enama.
3 Ekigobo ogwu òban Awaji geelek ito ibe ikinyi Awaji inyinyi, mè ikigwa ngwugwa inyi Awaji. Ikeya si, îkup me uyọt ibe ogwu òban Awaji keyi ikaan̄ si inu ìbosa inyi Awaji. 4 Mebe ke ọmọ ìkup me linyọn̄, ọmọ kpomore ogwu ngwugwa kubọk ge, mije, ebi ngwugwa mîwa me linyọn̄, ebi ìkinyi Awaji inyinyi igọọk me lek Ikan ebi Ju. 5 Ere Mbuban eyi ebi ngwugwa cha ekikup isi ikwaan̄ ìre gaalek mbet mè ogugo Ere Mbuban eyi òkup me emen inyọn̄. Ikeya orọ, mgbọ Awaji obe Mosis inama Atanga Chinichini, ìtataba Mosis ubọk me utọn̄ ibe, “Mun̄ ibe ke orọ otutuuk inu igọọk me ubọk eyi atata ya esabe ijeen̄ owu me inyọn̄ ogoon̄ okupbe.”a 6 Ire, irek ikwaan̄ ogwu ngwugwa eyi Jisọs obọkọbe îbene igak eyi kiban̄. Ikeya si ke ayaya inyan̄a-ibot eyi òje me ubọk kè Jisọs inu obene igak oka inyan̄a-ibot. Ayaya inyan̄a-ibot yi îkaan̄ owuwa use ònwọnwọn igak eyi oka me emen.
7 Mije, mebe ke kpunu inu òlọlọ me lek adasi inyan̄a-ibot ya, kpomokup me uyọt ibe eweek ofifi inyan̄a-ibot. 8 Ire, Awaji îmun̄ nlilọ inu me emen ebilene, mè itumu ibe,
“Okumugwem îtumu ibe,
‘Mgbọ òkinu, mgbọ mânyibe ebi ido Ijeren,
mè ebi otoko kè Juda ayaya inyan̄a-ibot.
9 Ìkpokup kubọk inyan̄a-ibot nnyan̄abe melek ebi nte nte kiban̄
mgbọ ntetbe ema ubọk, mè isa ema inan̄a isibi me ido Ijipiti,
mije, ife cha kpesun̄ ikan inyan̄a-ibot n̄a.
Eya orọ, nsasan̄a ema chieen̄ me lek.’
10 Okumugwem îtumu si ibe,
‘Inyan̄a-ibot mbanyan̄a melek ebi Ijeren ìre ikeyi:
Ukot keya isiraka,
mâtap ikan n̄a me emen ekiket kiban̄,
mè ige ikan cha me ejit kiban̄.
Emi mâre Awaji kiban̄,
ema mêrere ebi n̄a.
11 Ìkpoyaka ikup me uyọt ibe ene geege ijeen̄ ogwu melek kan̄,
mè ìre ogwu ngwan̄ kan̄ ibe,
“Riọọn̄ Okumugwem,”
mije, ema otutuuk ene mêriọọn̄ emi,
bene me lek ogwu òsisip ichit re lek ogwu òmimin ichit.
12 Mâtele nrọ-nlọ kiban̄ inyi ema,
m̀kpayaka ikeek otutuuk ijo inu kiban̄ kubọk ge.’ ”b
13 Mije Awaji ogwenbe inyan̄a-ibot yi “ayaya,” ìsibi ibe ke eyi adasi ya îkana oka. Eya orọ, inu geelek òkakan, mè ikana oka ìbochechep ugwat ugwat.