Ikpa Etip Pọọlu Ogebe Ijet
Filimọn
1
1 Emi Pọọlu òrere ogwu mkpọn mije kè Jisọs Karais, mè Timọti gwun̄ Nte kiji ege ikpa etip keyi ijet owu Filimọn atata unene kiji, mè ogwu melek kiji ekisi ikwaan̄, 2 mè gwun̄ Nte kiji enenwaan̄ òrere Afia, mè Akipọs ogwu melek kiji ekigbaan̄ itim akọn̄ eyi ilolook ata etip, mè ebi ntitiin̄ Awaji ìkititiin̄ me uwu kwun̄.
3 Atata nnwọn mè esuuk eyi Awaji òrere Nte kiji mè eyi Okaan̄-ene Jisọs Karais ikup inyi enyi.
Filimọn îkaan̄ ichechieek, mè ikimun̄ ene me chieen̄
4 Gwun̄ Nte n̄a Filimọn, nkikeek owu me uriaak mgbọ geelek, mè ikitọn̄ Awaji n̄a enenen mije kwun̄, 5 bak me lek, nkinọ ibe ke owu omun̄ otutuuk bọn Awaji me chieen̄ enenen, mè ikeke si inye me emen ichechieek kwun̄ me lek Okaan̄-ene Jisọs. 6 Ǹkiriaak uriaak ibe mè mgbaan̄-nrọ, eyi owu ogọọkbe ikaan̄ inan̄a me lek ichechieek kwun̄, irọ inyi owu òriọọn̄ ubọk òriọọn̄ otutuuk ata inu eyi eji ekaan̄be me emen kè Karais. 7 Gwun̄ Nte n̄a Filimọn, imumechieen̄ owu okaan̄be înyi emi ikpele unwọọn̄, mè ikitap emi efuuk me emen enenen. Mije, ikwaan̄ ata ejit owu okirọ inyi bọn Nte îbele otutuuk bọn Awaji ejit enenen.
Pọọlu îbeek Filimọn mbeek me ibot kè Onesimọs
8 Me emen kè Karais, emi mâkọt ifet lek inyi owu ida ibe owu òrọ inu ògbegbe irọrọ. Ire, ǹkaweek irọrọ ikeya. 9 Kpan̄asi ikeya, mije mmun̄be owu me chieen̄, ǹkibebeek owu kubọk mbeek. Îre emi Pọọlu, òrere ogwu ugane, ogwu òkup me mkpọn mgbọ yi mije kè Jisọs Karais, nkibeek owu mbeek yi. 10 Ǹkibeek owu mbeek yi me ibot kè Onesimọs,a gwun̄ n̄a me emen Karais. Îre mgbọ nkupbe me mkpọn me ere keyi ke nkana ute inyi Onesimọs me emen kè Karais.
11 Me mgbọ òraraka, Onesimọs ìkakaan̄ oruru geege ìnyi owu. Ire, me mgbọ keyi ọmọ îkaan̄ ikpele oruru inyi owu, mè ikaan̄ si inyi emi. 12 Mgbọ keyi, ǹkiria ọmọ kubọk gwun̄ ibot ejit n̄a, ibe igwu ikom inu me lek kwun̄. 13 Îkup emi me lek kubọk matet Onesimọs ikaan̄ me agba lek n̄a, inyi ikitap ubọk inyi emi me useen̄ kwun̄, me mgbọ keyi nkupbe me mkpọn mije ata etip kè Karais. 14 Ire, ǹkaweek irọrọ inu geege me nkadage isi ìgọọk owu ìtumu ìfieek, mije ǹkaweek itetet owu me unye ibe owu òtap ubọk ònyi emi. Kpan̄asi ikeya, ǹkiweek ibe owu òsa me ejit kwun̄ gaalek òtap ubọk ònyi emi. 15 Kpọkpọ mọnọ ibe, usini mgbọ, ke Onesimọs ìnan̄a itele owu sọnja mgbọ, inyi owu òyaka òkpọk òkaan̄ ọmọ òre mgbọ geelek. 16 Mgbọ keyi, ọmọ ìkayaka ìre usun̄ ofifi, ọmọ îbene igak usun̄. Me mgbọ yi, ọmọ îkana atata gwun̄ Nte me emen kè Karais. Ọmọ îkaan̄ oruru inyi emi enenen. Ire, môkaan̄ oruru igak ikeya inyi owu, kubọk ogwu usun̄, mè ikaan̄ si oruru inyi owu kubọk atata gwun̄ Nte me emen Okaan̄-ene.
17 Eya orọ, ire owu omọnọ emi kubọk ogwu melek kwun̄ ekigbaan̄ irọ ikwaan̄, bọkọ ọmọ tap kubọk mobọkọbe emi itap. 18 Ikaan̄ inu geelek îrọbe owu ilọ, mè ìre urieek geelek îkaan̄be owu, fuk toon̄ emi me ibot. 19 Iin̄, îre emi Pọọlu nsa ubọk n̄a ikige ikpa yi, ìkare ofifi ene. Mâkpe owu otutuuk inu cha geelek. Ire, owu kawuuk ibe ke owu okaan̄ emi urieek òmimin enenen. Urieek ya ìre otutuuk ugwem kwun̄, mije, îre nan̄a me ubọk n̄a ke owu okana ogwu eyi kè Karais. 20 Eya orọ, Filimọn gwun̄ Nte n̄a, tele mè ǹkaan̄ sọntiik oruru ònan̄a mije kwun̄ me emen Okaan̄-ene. Soso rọ emi inu ubelejit kubọk gwun̄ Nte kwun̄ me emen kè Karais. 21 Ǹkige ikpa yi, mije, ejit înye emi ibe ke owu môsiki ibot inyi emi, mè irọ igak ubọk mbeekbe owu.
22 Ofifi si, nen̄e agwut ge, ere mâkupbe, sun̄ ban emi, mije, ǹkikpọ chieen̄ ibe ke Okaan̄-ene môfọọk otu uriaak kinyi me ibot n̄a, mè irọ inyi etele emi ǹka ǹgọọk enyi me utelelek.
Òta amọn
23 Epafaras ogwu egbaan̄be emi melek kan̄ itap me mkpọn mije kè Karais Jisọs îtọp owu amọn enenen. 24 Ikeya si Mak, mè Arisitakọs, mè Demas, mè Luk, ebi melek n̄a ekigbaan̄ isi ikwaan̄ mîtọp enyi amọn si.
25 Atata nnwọn eyi Okaan̄-ene Jisọs Karais ikup melek kinyi otutuuk ene.