2
Ijejeen̄ ògbegbe ibe ejeen̄ ebi ntitiin̄ Awaji
1 Ire, owu me lek kwun̄, mgbọ geelek obojeen̄ inu, kijeen̄ inu òjeje itat me lek ata ijejeen̄ eyi Awaji. 2 Jeen̄ ebi ugane ebirieen̄ ibe ere ebi chieen̄ okire ijọn̄ mgbọ geelek, mè ekekaan̄ ulibi, mè ere ebi ifuk-ibot kiban̄ okiso ifuk mgbọ geelek, mè ebi ìkikọt itet lek kiban̄ ikaan̄, mè ebi ìkekeke inye me emen ichechieek mè imumechieen̄ mè ukarajit.
3 Ikeya si, jeen̄ ebi ugane ebibaan̄ ibe ekesiki lek, mè ekeluk ugwem eyi òkinyi Awaji umin mgbọ geelek, mè ekare ebi ìkitumu ene ifiat, ekare si ebi ìkinwọ miin̄ isa. Kpan̄asi ikeya, ema ekejeen̄ inu ònwọnwọn. 4 Mgbọ ya ke ema mêkọt ikijeen̄ ebibaan̄ ebi ekanin̄ge ugane ibe ekema ebi olom mè ebi bọn, 5 mè eketet lek kiban̄ ekaan̄, mè ekakibubat chieen̄, ire, ekeriọọn̄ ubọk ekpọ uwu, mè ekekaan̄ ata ejit, mè ekesiki ibot enyi ebi olom, inyi ene geege ikakọt ìtumu ijo ikọ ìkeme ikọ Awaji.
6 Ikeya si, jeen̄ ebi nsabọn irieen̄ ibe eketet lek kiban̄ ekaan̄. 7 Owu Taitọs, me oniin̄ geelek, luk ugwem eyi ebi ene mêkikpọ, mè ikikween̄ inu ofolek irọrọ ata inu. Me emen inu geelek okijeen̄, re ogwu atikọ, mè kirọ inyi eriọọn̄ ibe ke inu owu okijeen̄ îkup me uyọt. 8 Mgbọ geelek okijeen̄ inu, kitumu ikọ òtetet mun̄, eyi ebi ene kpebekọt imun̄ nrọ-nlọ geege me emen, inyi esip itet ebi ìkije ikeme owu, mè ema ekamun̄ ijo inu geege ebesa itumu ikeme eji.
9 Jeen̄ ebi ìrere usun̄ ibe ekesiki ibot enyi ebi nte uwu kiban̄ mgbọ geelek, mè ekerọ inu òbokibele ebi nte uwu kiban̄ ejit. Jeen̄ ema ibe ekakifọọk ebi nte uwu kiban̄ otu mgbọ ebi nte uwu kiban̄ ekitumu ikọ inyi ema, 10 mè ekakichiin̄ inu nte uwu kiban̄. Kpan̄asi ikeya, ema ekejeen̄ ibe ke ema mîgbe utoon̄-ejit me oniin̄ geelek. Sa me ikeyi, ugwem kiban̄ môkisa itọn̄ ijet ijejeen̄ eyi eji ekijeen̄ ofolek Awaji Ogwu Unyan̄a kiji, me emen inu geelek ema ekirọ.
11 Mije, Awaji îra isan̄a atata nnwọn kan̄ isibi. Awaji ìbosa me lek atata nnwọn yi inyan̄a otutuuk ebilene isibi. 12 Atata nnwọn yi si okijeen̄ eji ibe ejit ugwem ekariọọn̄ge Awaji, mè ejit si ijo ulọk eyi utop linyọn̄, mè eketet lek kiji ekaan̄, mè ekeluk ugwem òtatat mè ikinyi Awaji umin me linyọn̄ keyi. 13 Sa me ikeyi ke atata nnwọn yi okijeen̄ eji ibe ekeluk ugwem òtatat me mgbọ keyi eji ekupbe me ubelejit ikikpọ chieen̄ inunu eyi ujamgbugbo eyi ikpele Awaji kiji mè ogwu Unyan̄a kiji Jisọs Karais. 14 Ogwu Unyan̄a kiji Jisọs Karais ore ogwu òsasa ugwem kan̄ inyi mije kiji otutuuk, isasa ifaka eji isibi me emen otutuuk ijo irọrọ. Sa me ikeyi ke ọmọ ogwọk ogbogbo ene itana isun̄ inyi lek kan̄, inyi enere ebi kan̄ ebi ìkakaan̄ ikpele ulọk irọrọ ata inu mgbọ geelek.
15 Kijeen̄ ema otutuuk inu chi, mè kisa unye kwun̄ kubọk ogwu mkpulu tap ebi okijeen̄ inu efuuk me emen, mè kikan̄ inu nyi ema si mgbọ geelek ema ejebe ilọ. Kachieek ibe ene geege ikpọ owu chieen̄ isiki.