4
Ebilene mêjit igbagban̄ atikọ
1 Ǹkinyi owu nteme keyi me isi Awaji mè isi kè Jisọs Karais, ogwu òbosibi oyerebet me ibot ebi ìkup me ugwem mè ebi ìkwakwaan̄, me mgbọ môsabe mkpulu kan̄ inu kubọk ogwu ubọọn̄. 2 Tumu ikọ Awaji kana! Chieek mkpa kitumu mgbọ geelek, mgbọ òtatat mè mgbọ ikatatge. Kitumu sa teme ebi ene nteme inyi eje etat, mè kisa kan̄ inu nyi ene, mè kisa tap ene efuuk me owot. Ire, mgbọ geelek okijeen̄ inu, kigwuun̄ chieen̄, mè kaan̄ ujọn̄ọ ukarajit. 3 Mije, mgbọ mônu, mgbọ ebilene kpebeyaka ikigban̄ utọn̄ me lek ata ijejeen̄ eyi Awaji. Kpan̄asi ikeya, ema mêkikpulu ogbogbo ebi ijejeen̄ iwak ikana lek kiban̄, inyi ekejeen̄ ema inu utọn̄ kiban̄ okison iweek inọnọ. 4 Ema mêda utọn̄ kiban̄ isan̄a me lek atikọ, mè ikisi igban̄ urọk ikike ikakaan̄ge ibot. 5 Ire, owu, tet lek kwun̄ kaan̄ me inu geelek, mè kat ejit me emen ufialek. Kisi ikwaan̄ kubọk ogwu òkitumu ikọ Awaji, mè kirọ inu geelek eyi irek ikwaan̄ kwun̄ odobe.
6 Ire emi, mîwuuk lek isa emi igwa ngwugwa kubọk miin̄ egwookbe me ijọn̄. Mgbọ mbatele ugwem keyi îra ikem. 7 Nra itim akọn̄ ya ubọk îgbebe, mè ilibi ekot n̄a isi ire òta. Ntet ichechieek n̄a me lek Awaji inye. 8 Eya orọ, mgbọ yi, mkpukpe eyi ntim-mkpan̄ ọmọ òwa okikup iban emi. Mkpukpe yi ìre okpibot ubọọn̄ esun̄be iban ebi ata irọrọ, eyi Okaan̄-ene, ogwu òkifieek unen oyerebet, mônyibe emi me Usen Oyerebet Awaji ya. Ìkare emi gaalek ke ìbonyi, mônyi si iso otutuuk ebi ìkup me mbem-lek ikikpọ chieen̄ me inunu kan̄.
Etip ofolek kè Pọọlu gaalek
9 Ikaan̄ ubọk geelek oriọọn̄be, gwat lek na na mun̄ emi chieen̄, kafiat mgbọ, 10 mije, Demas îma inu linyọn̄ keyi, mè ibak me lek keya ilibi itele emi ifo Teselonaika. Kirisens îsi Galesia, sà Taitọs osi Dalimatia. 11 Îtata Luk gaalek ogọọk emi ikup. Mgbọ obonu, sa Mak gbaalek na, mije, ọmọ îkaan̄ ntap-ubọk inyi emi me lek ikwaan̄. 12 Nria Taikikọs ibe isi Efesọs. 13 Osibonu, sa ofọnti utọọk n̄a ya ntelebe me ubọk kè Kapọs me ama Torowas sa gbaalek na, mè sa ikpa n̄a cha si gbaalek na, ògak ge ikpa echi esabe ikpa anam irọ cha.
14 Alikisenda, ogwu òkisa okwukwut irom inu, îrọ emi inu inaan̄ me lek ikpele ikpele. Okaan̄-ene môkpe ọmọ mkpukpe ikpọ me lek inu îrọbe emi. 15 Owu si, riọọn̄ lek kwun̄ me lek kan̄, mije, ọmọ îkije ikeme ikọ Awaji eji ekitumu enenen.
16 Me adasi oyerebet esibibe me ibot n̄a, otutuuk ene elilibi itele emi. Emi gaalek nkeke ifọọk ikọ ibot n̄a. Ǹkibeek Awaji ibe itele inyi ema. 17 Ire, Okaan̄-ene îgọọk emi ikeke, mè inyi emi unye, inyi ǹkọt ǹtumu ikọ Awaji mè otutuuk ebi ekarege ebi Ju ìkup me ere ya egọọk enọ. Okaan̄-ene înyan̄a emi isibi me otu egbe àtat. 18 Mônyan̄a emi isibi si me ijo inu geelek eberọ emi, mè isa emi me utelelek isi itap me mkpulu kan̄ me emen inyọn̄. Itọn̄ ikup inyi ọmọ mgbọ geelek, mgbọ geelek. Ikup ikeya!
Amọn mgburudun̄ Pọọlu otọpbe Timọti
19 Tọp Pirisila mè Akwila amọn nyi emi, mè tọp si otutuuk ebi uwu kè Onesiferọs. 20 Irasitọs òwa me Kọrint okupbe, Tọrọfimọs ke ntele me Militọs, mije lek kan̄ ikanyege. 21 Week ike owu mônube lek n̄a sabum mgbọ utọọk ònore. Yubulọs mè Pudinsi mè Lainus mè Kọlọdia mè otutuuk bọn Nte mîtọp owu amọn.
22 Okaan̄-ene ikup melek ekwukwu kwun̄! Atata nnwọn eyi Awaji ikup inyi otutuuk kinyi!