2
Ata ogwu akọn̄ kè Jisọs Karais
1 Me mgbọ yi, owu gwun̄ n̄a, keke nye sa me atata nnwọn ya eyi eji ekaan̄be inan̄a me ubọk kè Jisọs Karais. 2 Ikọ onọbe nkitumu me isi ogbogbo ene, sa ikọ cha jeen̄ ebi geelek otoon̄be ejit me lek ibe ke mêkọt ijeen̄, inyi esa esi ejeen̄ ebi ofifi ife. 3 Gọọk eji kat ejit bọkọ ufialek kubọk ata ogwu akọn̄ kè Jisọs Karais. 4 Ogwu akọn̄ geelek òkup me akọn̄ ìkakitap lek kan̄ me lek inu ebi ekarege ebi akọn̄ ekirọ. Ulọk kan̄ mgbọ geelek ìre ikekirọ inu òbokibele ogwu ibot kan̄ ejit. 5 Ikeya si, ogwu òkigọọk iwut ifan̄a ekot ìkaboben inu geege, îtata ìlilibi ekot ya igọọk me ikan ifan̄a ekot. 6 Ubọk yaage si, ogwu uko ònyenye ubọk isi ikwaan̄ me uko ogbe ogwu òbodasi ibọkọ uche inu erọkọbe me uko. 7 Keek ekiket ofolek inu chi nkitumu, mije, Awaji môrọ inyi owu ògobo otutuuk inu chi òtet.
8 Keek inu ofolek kè Jisọs Karais gwun̄ owot iman kè Debit. Îre ọmọ ke Awaji ojomo me mkpa, kubọk nkitumu me emen ata etip eyi nkilook. 9 Mije keyi ke nkibọkọ otutuuk ufialek chi ire lek eyi etetbe emi igon me mkpọn ikeyi kubọk ogwu ìkakisun̄ ikan. Ire, ejit îbele emi ibe ke ìkare ikọ Awaji ke egon me mkpọn. 10 Eya orọ, ǹkikat ejit ibeme ufialek chi geelek mije ebi Awaji ogobobe inyi lek kan̄, inyi ema si esa me ikeyi ekaan̄ unyan̄a melek ujamgbugbo eyi ikakaan̄ge okputut, eyi Jisọs Karais okirọ inyi ene ekaan̄.
11 Ikọ mbatumu mgbọ keyi ìre ikọ ògbegbe ibe etoon̄ ejit me lek:
Ire eji igọọk Jisọs, mè ikwu mkpa, eji mêluk melek kan̄.
12 Ire eji ikeke inye melek kan̄, eji mêgọọk ọmọ
igbaan̄ ikpulu me mkpulu kan̄.
Ire eji ijit ọmọ, ọmọ si môjit eji.
13 Ire eji kpegbe ebi ebetoon̄ ejit me lek,
ọmọ îgbe ogwu ebetoon̄ ejit me lek,
mije, ọmọ ìkpokọt itele irọrọ ikọ kan̄ iso.
Ogwu ikwaan̄ ogwu Awaji obọkọbe itap
14 Kikeek ebi ntitiin̄ Awaji inu chi. Sa me erieen̄ Awaji taba ema ubọk me utọn̄, inyi ema ekakigbini ikọ, mije, igbini-ikọ ìkakaan̄ oruru geege. Otutuuk inu îkirọ ìre ifafiat ejit ebi geelek ìkukup ikigban̄. 15 Nye lek kirọ inu geelek efuuk kwun̄ okọtbe, inyi Awaji ibọkọ owu itap kubọk ogwu òrọriọọn̄ ikijeen̄ atikọ kan̄ me oniin̄ òtatat, inyi owu okare ogwu ikwaan̄ ogwu ubọk ikwaan̄ kan̄ okisa esip ijet. 16 San̄a lek kwun̄ me lek burubut mbele echi ìkakinyi Awaji umin, mije, ebi geelek ìkibele mbele kechi mêrọriọọn̄ ikifo isi ikiluk ugwem echi ìkakinyi Awaji umin. 17 Inu geelek ema ekijeen̄ me emen mbele kiban̄ cha ìkup kubọk njijọ inya òkpọkpọ ikitaka iwele chieen̄, mè ikitaka ene ufuk ijibi. Ene iba me lek ebi ìkijeen̄ ijo ijejeen̄ chi ìre Ameniọs mè Filetọs. 18 Ene iba chi mîtele atikọ, mè ikikan̄ ataak ibe ke ebi ìchechieek me lek kè Jisọs Karais mîra iwuuk lek ijojomo me mkpa iraka. Ikeya ke ema esa ifiat ichechieek ogbogbo ebi ene. 19 Ire, ikọ Awaji ìkup kubọk ọdọ, ìkpọkpọ ikeke inye! Kpunu inu geege òbokọt isisik. Ikọ egebe ikam me lek ewuuk ya ìre, “Okaan̄-ene îriọọn̄ ebi eyi kan̄,”a melek si, “Ene geelek òrere ogwu eyi Okaan̄-ene, isan̄a lek kan̄ me lek ijo inu.”
20 Me emen uwu geelek òmimin, ìkare inu itap-inu echi alata araran̄ mè echi alata okuket gaalek okikup, echi uti mè echi ibat si ìkekikup. Usini ke ekisa itap inu inyi ebi ichen inyi isibi ogwukaan̄ uwu isi, usini ke ekisa itap inu geelek ikadoge umin. 21 Ikeya si, ene geelek ògwọgwọk ubọk kan̄ isan̄a me lek ijo inu chi, ene ya îkaan̄ oruru inyi Nte uwu kan̄, òrere Okaan̄-ene. Eya orọ, Okaan̄-ene môsan̄a ene ya isun̄ esese, mè ikisa ọmọ isi ikwaan̄ òkakaan̄ umin, mije, ọmọ îkup me mbem-lek ibe esa ọmọ esi ata ikwaan̄ geelek òkukup isisi.
22 Libi nan̄a me lek ijo ulọk òkilọk nsabọn irieen̄. Gọọk ebi ìkigwen Okaan̄-ene me ejit òtatana. Chieek mkpa kirọ ata irọrọ, mè kaan̄ ichechieek, mè imumechieen̄, mè esuuk. 23 Je nan̄a me lek burubut igbini-ikọ ikakaan̄ge ifuk-ibot geege me emen, mije, owu oriọọn̄ ibe ke ìkisa ibaak mè etim inu. 24 Ogwu ikwaan̄ Okaan̄-ene ìkpore ogwu òkibaak ibaak, ire, ìbore ogwu òkirọ inu esuuk esuuk melek ebi ene, mè ata ogwu ijejeen̄, mè ogwu òkikọt ime inu. 25 Ọmọ môre si ogwu òkisa me esuuk esuuk iteme ebi ìkije ikeme ikọ kan̄ nteme me ere ife cha ejebe ilọ. Usini mgbọ, sa me ikeyi, Awaji môrọ inyi ife cha egwu ekom, mè eneriọọn̄ atikọ. 26 Me oniin̄ òkup ikeyi, ife cha mêkọt ilibi inwọnọ ufe Yọk otipbe isa itet ema ikaan̄, inyi ema ekerọ ekiket kan̄.