13
Ijejeen̄ ofolek imumechieen̄
1 Ìrere ǹkọkọt ikitumu ikọ me otutuuk usem ebilene mè usem ebi osat Awaji, mè ire ǹkakaan̄ imumechieen̄ me lek ene, emi ìre nkom ikike mè enwirinwan òkitaan̄ ida ichit ene utọn̄. 2 Ìrere ǹkakaan̄ uche eyi ibeben nriran, mè ikaan̄ unye isasa iriọọn̄ otutuuk udọk udọk nlelet inu eyi Awaji, mè ikaan̄ otutuuk ifuk-ibot geelek, ikerere ǹkakaan̄ ojelek ichechieek eyi mâsabe ikọt ijibi ogoon̄ isan̄a me akpat isi iyik me ofifi ere, mè ire ǹkakaan̄ imumechieen̄ me lek ene, emi ìre inu ikike. 3 Ìrere m̀kpukpulu otutuuk inu nkaan̄be iche inyi ebi ugbọọn̄, mè isa lek n̄a inyi ibe ewọp me ukan̄ esa egwa ngwugwa,a mè ire ǹkakaan̄ imumechieen̄ me lek ebi ene, kpunu oruru geege mbakaan̄.
4 Ogwu òmun̄ ene me chieen̄ îkime inu ijọn̄ọ mgbọ, mè ikikaan̄ ata ejit me lek ene. Ìkakikaan̄ chieen̄ ile, ìkakitumu otu ile, ìkakigumu si lek. 5 Ogwu òmun̄ ene me chieen̄ ìkakinye chieen̄ ìnyi ene, ìkakiweek nnwọn eyi lek kan̄ gaalek, ìkakigwat lek ìnaan̄ ejit, ìkakifuk ijo inu ene orọbe ọmọ ìtet ìkaan̄. 6 Ogwu òmun̄ ene me chieen̄ ìkakinwọọn̄ unwọọn̄ mije ijo inu ene orọbe. Kpan̄asi ikeya, ìkinwọọn̄ unwọọn̄ me mgbọ ene orọbe inu òtatat. 7 Ogwu òmun̄ ene me chieen̄ ìkakitumu ijo inu ene orọbe ìsibi, kpan̄asi ikeya, ìkichichit. Ìkitotoon̄ ene ejit me lek mgbọ geelek, mè ikikaan̄ ikpọchieen̄ mgbọ geelek me irek geelek ibe ke inu mônwọn, mè ikikaan̄ si ukarajit mgbọ geelek.
8 Imumun̄ ene me chieen̄ ìkakaan̄ okputut. Uche eyi ibeben nriran ọmọ òwa, ire, mgbọ òkinu eyi ibeben nriran ìkpoyaka ikup. Uche eyi itutumu ikọ me nke nke usem ọmọ òwa, ire, mgbọ òkinu mgbọ ìkpoyaka ikup. Uche eyi ifuk-ibot ọmọ òwa, ire, uche keyi si môraka. 9 Mije, me mgbọ keyi, eji kperiọọn̄ otutuuk inu isan̄a, Awaji ìkachili si otutuuk inu ìjeen̄ eji, inyi eji etumu esibi. 10 Ire, mgbọ Awaji isirọ inyi otutuuk inu geelek iso ifuk, inu geelek ikasoge ifuk ìkpoyaka ikup.
11 Mgbọ emi nrebe sọntiik gwun̄, ǹkitumu ikọ kubọk sọntiik gwun̄, ǹkikeek ekiket kubọk sọntiik gwun̄, ǹkifuk ifuk-ibot si kubọk sọntiik gwun̄. Ire, mgbọ mminbe inin̄ ene, ǹkayaka ìkirọ inu kubọk sọntiik gwun̄. 12 Mgbọ keyi, eji ekimọọn̄ inu ogugo ogugo, kubọk inu ekimọọn̄ me isi umọọn̄ òfafiat. Ire, me mgbọ ya, eji mêmọọn̄ otutuuk inu geelek isi mè isi. Mgbọ keyi, ǹkariọọn̄ otutuuk inu ìsan̄a. Ire, me mgbọ ya, mâriọọn̄ inu geelek òjot òjot kubọk Awaji oriọọn̄be emi òjot òjot.
13 Inu ita okup, echi òkikup ire mgbọ geelek. Ema ìre ichechieek, mè ikpọchieen̄, mè imumechieen̄. Eyi òmimin ichit me etete inu ita chi ìre imumechieen̄.