27
Mîsa Jisọs inu me isi kè Pailet
1 Me ofit iwele kan̄, me agan̄ egwe, ebi ibot ngwugwa, mè ebi ugane ama enenititiin̄, mè itumu ifieek ibe ke mêkpan̄ Jisọs. 2 Ema enenitap ọmọ mkpọn me ubọk mè ukot, mè isa ọmọ isi isi kè Pailet, ogwu ibot mkpulu.
Mkpa kè Judas
(Ikwaan̄ 1:18-19)
3 Mgbọ Judas ogwu òleleke Jisọs omun̄be ibe ke mîtip Jisọs oyerebet mkpa, ibọbọnọ lek enenen, mè iyaka akọp ikpoko alata okuket ita îbọkọbe ya ijet ebi ibot ngwugwa mè ebi ugane ama, ebi ìnyinyi ọmọ ikpoko ya, 4 mè itumu ibe ke ọmọ îrọ ijo inu, mije ke ọmọ îleke ogwu ikarọge ijo inu geege inyi ekpan̄. Ema ebebe ọmọ, “Eya ìre mbubek kwun̄, ìkagbaan̄ eji me lek.”
5 Judas okpukpulu ikpoko cha itọọn̄ igwook me emen Uwu Mbuban, mè ije inan̄a isi itap olik me ebek, mè itaba lek kan̄ ikpan̄.
6 Ire, ebi ibot ngwugwa eteteen̄ ikpoko cha, mè ibe ke ìkatat me Ikan ibeben ikpoko ya itap me ere ekisun̄ ikpoko me Uwu Mbuban, mije ke îre ikpoko eje ene. 7 Eya orọ, ema esasa ikpoko ya isi ilep ijọn̄ me ubọk ene ge òkibot ugọn̄, inyi ekesa efuun̄ ebi ichen. 8 Mije keya ke ekigwen ere ya Ijọn̄ Eje inire chereyi. 9 Ikeyi ke esa irọ inu ogwu nriran Jerimaya otumube iso ibe, “Ema mîbọkọ akọp ikpoko alata okuket ita, òrere otu ewe ebi Ijeren echieekbe ikpekpe me ibot kan̄, 10 mè isa ilep ijọn̄ me ubọk ene ge òkibot ugọn̄, ike Okumugwem otọbe inyi emi.”a
Jisọs me isi kè Pailet
11 Me mgbọ ya, Jisọs òwa okekebe me isi kè Pailet ogwu ibot mkpulu ebi Rom etobe ibe ikikpulu agan̄ Judia. Pailet ododo ọmọ ibe, “Ìre owu ore ogwu ubọọn̄ ebi Ju ya?”
Jisọs ofọfọọk ọmọ ibe, “Owu otumu ma!”
12 Mgbọ ebi ibot ngwugwa mè ebi ugane ama etoon̄be Jisọs uraamọn ikọ, Jisọs ìkpọkpọ iriaan̄ otu, ìkafọọk ema ikọ geege. 13 Pailet onenido Jisọs ibe, “Ìre òkanọ otutuuk ikọ chi ekitumu ikeme owu?” 14 Ire, Jisọs ìkafọọk ema otu me lek ikọ cha geege. Inu ya okeke ogwu ibot mkpulu ya chieen̄ enenen.
15 Me ijọk Iraraka geelek, îre orọmijọn̄ ogwu ibot mkpulu yi isasan̄a ogwu mkpọn ge, ogwu ebi ama edobe, isibi me mkpọn inyi ifo. 16 Ike mgbọ ya, ogwu enerieen̄ ge ekigwen Barabas ogwu otutuuk ene eriọọn̄be ibe ke îre ogwu afa, ọmọ òwa me uwu mkpọn okupbe. 17 Eya orọ, mgbọ ebi ene etitiin̄be me ere uwu kè Pailet me usen ya, Pailet onenido ema ibe, “Ìre ogwu owa ke enyi eweek ibe emi ǹsan̄a ǹsibi ǹnyi enyi? Ìre Barabas, sà ìre Jisọs ogwu ekigwen Karais?” 18 Pailet ìdo ikọ yi, mije, îriọọn̄ ibe ke esa me ejit mba itet Jisọs inu me isi kan̄ ibe ọmọ ikpan̄.
19 Mgbọ Pailet okweekbe irek me inyọn̄ ogboon̄ ubọọn̄ oyerebet kan̄, ogwu nwa oraria etip ijet ibe isan̄a lek kan̄ isan̄a me lek inu geelek ògbaan̄ me lek ogwu enerieen̄ ata irọrọ ya, mije ke ọmọ îmun̄ ijo ilaak ofolek ogwu enerieen̄ ya me eririeen̄; ke ilaak ya îsisaak ọmọ enenen karake ewelegwe.
20 Ebi ibot ngwugwa mè ebi ugane ama etọtọ ejit ebi ene ifiat ibe mè edo ibe isan̄a Barabas inyi ema, mè ikpan̄ Jisọs.
21 Pailet, ogwu ibot mkpulu, okpọkpọk ido ife cha ibe, “Ìre ekene ke enyi eweek ibe emi ǹtele inyi ifo?”
Ema otutuuk ene edidimi igwook ibe ke ema eweek Barabas.
22 Pailet onenido ema ibe, “Ìre keke ke enyi eweek ibe emi ǹrọ Jisọs ogwu ekigwen Karais yi?”
Ema egwagwat lek ifọọk ibe, “Gon kpan̄!”
23 Pailet ododo ema ibe, “Mije keke? Ìre kpasi ijo inu ke îrọ?”
Ire, ema erọriọọn̄ ikitaan̄ ukpo unye unye ibe, “Gon ọmọ kpan̄ me inyọn̄ uti nkwurieen̄!”
24 Pailet omumun̄ ibe ke kpunu ike ọmọ obokọt inyan̄a Jisọs, kpan̄asi ikeya, ire ọmọ ije inyi isi, ke etim mè uyọrọlek môsibi. Eya orọ, me isi ogbogbo ebi ife cha, ibọbọkọ mun̄ isa igwọk ubọk kan̄, mè itumu inyi ema ibe, “Ubọk n̄a geege kpunu me lek eje ogwu enerieen̄ yi. Eje ogwu enerieen̄ yi ìtoon̄ enyi me ibot.”
25 Otutuuk kiban̄ echechieek igwook ibe, “Iin̄, eje kan̄ itoon̄ eji me ibot, mè itoon̄ si me ibot bọn kiji!”
26 Pailet onenisan̄a Barabas isibi me mkpọn inyi ema, ike ema edobe, mè isa Jisọs inyi ebi akọn̄ esulu me njijan̄, mè esa esi egon ekpan̄ me inyọn̄ uti nkwurieen̄.
Ebi akọn̄ mîrọ Jisọs inu ochak
27 Ebi akọn̄ ìkibem ogwu ibot mkpulu enenisa Jisọs isibi isi emen oyet egep uwu ogwu ibot mkpulu. Otutuuk urum ebi akọn̄ ìkup me ere ya ekekeke ikana ọmọ okokop, 28 mè iwọọk ofọnti kan̄ isan̄a ọmọ me lek, mè iyaka initap ọmọ uga ofọnti irio irio eyi ebi ubọọn̄ ekitap, 29 mè isa ukpak ilọk okpibot ubọọn̄ ikwuun̄ ọmọ me ibot, mè imọnọ okuba itap ọmọ me ubọk agan̄ ulom, mè ikitọbọ ekpe me isi kan̄, isasa irọ ọmọ inu ochak, mè ikibe ọmọ, “Ogwu ubọọn̄ ebi Ju, eji mîtọp owu amọn!” 30 Ema ekekicho ataak igwook ọmọ me lek, mè ibọkọ okuba òkup me ubọk kan̄ ya isa isulu ọmọ me ibot owuwa mgbọ. 31 Mgbọ ema erọbe ọmọ inu ochak chi isan̄a, ema ewọwọọk ofọnti irio irio ya isan̄a ọmọ me lek, mè ikpọk ikpulu ofọnti kan̄ cha itap ọmọ me lek, mè isa ọmọ ije inan̄a ibesi igon ikpan̄ me inyọn̄ uti nkwurieen̄.
Mîgon Jisọs me uti nkwurieen̄
32 Mgbọ ema ekije inan̄a me ama ya isibi, ema enenichichini ogwu enerieen̄ ge ekigwen Saimọn ònan̄a me ama Sairini, mè itet me ubọk unye ibe iben uti nkwurieen̄ kè Jisọs. 33 Ema enenije isi ire ere ekigwen Gọligọta (eyi òsisibi Ere Ngigọ Ibot Ene). 34 Me ere ya ke ene ge otọkọ miin̄ ewọlọbe ugwun̄ òkirọ mè ene ikanọ unan me lek inyi Jisọs. Ire, mgbọ îchakbe miin̄ ya me otu ikpọ, ijijit inwọnwọ. 35 Ema egogon ọmọ me inyọn̄ uti nkwurieen̄. Mgbọ egonbe ọmọ isan̄a, ema eneniroon̄ nriroon̄ isasa iriọọn̄ ubọk ebesa iche ofọnti kan̄ cha inyi lek kiban̄, mè isa me ikeya iche ofọnti kan̄ isan̄a,b 36 mè inisiki ikweek irek me ere ya ikibem ọmọ. 37 Mîge ikan esabe itip ọmọ oyerebet igon me agan̄ ibot uti nkwurieen̄ ya ibe OGWUGWU ÌRE JISỌS, OGWU UBỌỌN̄ EBI JU. 38 Mîgon si ene iba ebi ìkichiin̄ inọ me afa me uti nkwurieen̄ me agba lek kan̄ me ere ya, ene ge me agan̄ ulom kan̄, ene ge me agan̄ ujit kan̄. 39 Ebi ìkije iraka me ere ya ekekitọp ibot, mè ikichak ọmọ, 40 mè ikitumu ibe, “Owu ogwu òbe ke ọmọ môgbugbọ Uwu Mbuban ito, mè isa egwe ita gaalek ikpọk inama isan̄a, nyan̄a lek kwun̄ ma! Nan̄a me inyọn̄ uti nkwurieen̄ ya sibi ijọn̄ nu, ire me atikọ ke owu ìre Gwun̄ Awaji.”
41 Ikeya si ke otutuuk ebi ibot ngwugwa, mè ebi ìjeen̄ Ikan, mè ebi ugane ama erọ ọmọ inu esip, 42 mè ikitumu ibe, “Înyan̄a ebi ofifi ife, ire, ìkakọt inyan̄a lek kan̄. Ọmọ ogwu òrere ogwu ubọọn̄ ebi Ijeren, inan̄a me inyọn̄ uti nkwurieen̄ isibi ijọn̄ nu, inyi eji echieek me lek kan̄. 43 Ọmọ ìtoon̄ ejit me lek Awaji. Awaji ya îtoon̄be ejit me lek ininyan̄a ọmọ ma, ire Awaji iweek ọmọ. Ke ọmọ ìkigugo lek ibe, ‘Emi ìre Gwun̄ Awaji.’ ” 44 Ikeya si ke ebi inọ iba cha egonbe me agba lek kan̄ ekinye chieen̄ inyi ọmọ.
Mkpa kè Jisọs
45 Udun okakana ichit otutuuk ere ke bùk, ibene me mgbọ òfuk-mgbọ osulube akọp mè iba eyi ejit ikarek mege ire mgbọ òfuk-mgbọ osulube ita eyi ikarek. 46 Mgbọ òfuk-mgbọ osulube ita, Jisọs otataan̄ ukpo ibe, “Elọi, Elọi, lama sabatani,” eyi òsisibi “Awaji n̄a, Awaji n̄a, ìre keke orọ mè owu òjit emi òtele?”c
47 Mgbọ ebi ìkeke me ere ya enọbe ida kan̄, usini kiban̄ ekekitumu ibe ke ìkibọn̄ọ Ilaija.
48 Ene ge me lek kiban̄ ogwagwat lek ilibi isi imọnọ ise ijiin̄ me emen miin̄ agburu, mè iben inwaan̄ me otu uti, mè ibene ifo otu kè Jisọs ibe inwọ. 49 Ire, usini kiban̄ ebebe ene ya, “Nan̄a me lek, inyi eji ekpọ-nu mè ìre Ilaija mônu ininyan̄a ọmọ.”
50 Jisọs okpọkpọk itaan̄ ukpo si, mè itọbọ.
51 Me ike mgbọ yaage, ekwut esaba ifieek ikwek Ere Mbuban me emen Uwu Mbuban otọtọbọ ibum iba, bene me inyọn̄ inire ijọn̄. Ijọn̄ osisisik. Ewuuk oraraan̄ ibak. 52 Owuwa udọn̄-ufuun̄ obubum, mè ichili otu, owuwa ebi ìchechieek me lek Awaji, mè ikwu iraka, ejojomo me mkpa. 53 Me mgbọ Jisọs ojomobe me mkpa eyi kan̄ isan̄a, ema mînan̄a me udọn̄-ufuun̄ cha isibi, mè ije inin̄ emen ama Jeruselem. Owuwa ene emumun̄ ema.
54 Mgbọ ogwu ibot akọn̄ mè ebi melek kan̄ ìgọgọọk ikup ikibem Jisọs emun̄be sikisik-ijọn̄ ya mè otutuuk inu cha òrọrọ, ukpook otetet ema enenen. Ema etutumu ibe, “Me atikọ, ene yi ìre Gwun̄ Awaji.”
55 Owuwa ebibaan̄ ebi ìkitap ubọk inyi Jisọs, mè igọọk ọmọ ije bene me karake Galili mîgọọk inu, mè ikeke me ujọn̄ọ ere ikikpọ. 56 Meri ogwu Magidala, mè Meri nga kè Jemis melek Josefu, mè nwa kè Jebidi nga kè Jemis mè Jọn òwa me lek ebibaan̄ cha.
Ifufuun̄ kè Jisọs
57 Me agan̄ ikakwun̄ usen ya, ogwu enerieen̄ ge òbọbọọn̄ ubọọn̄ enenen, mè ire si ogwu udun̄ kè Jisọs, ekigwen Josefu, ogwu ama Arimatia, 58 oneninan̄a ije isi lek kè Pailet, mè isi ibeek ibe inyi ọmọ nkwukwu kè Jisọs, inyi ọmọ iben isi ifuun̄. Pailet onyinyi ida ibe etele inyi Josefu iben nkwukwu kè Jisọs isi ifuun̄. 59 Josefu onenisi isan̄a nkwukwu kè Jisọs me inyọn̄ uti nkwurieen̄ ya, mè isa aya ekwut ikat, 60 mè iben isi ifuun̄ me emen aya udọn̄-ufuun̄ îrọkọbe me lek ewuuk inyi lek kan̄, mè ikpukpọt ikpele ewuuk ge ichit otu udọn̄ ya, mè ije ifo. 61 Meri ogwu Magidala, mè Meri nga kè Jemis mè Josefu me ere ya esikibe ikweek ikibene isi ikpọ udọn̄-ufuun̄ ya.
62 Me ofit iwele kan̄, mgbọ usen ebi Ju ekinen̄e lek kiban̄ isun̄ iban Usen Mbuban orakabe, ebi ibot ngwugwa mè ebi Farisi enenije isi lek kè Pailet, 63 mè ibe ọmọ, “Ogwu nte, eji mîkeek mgbọ ogwu ofiaan̄ ya okupbe me ugwem, mè ikijeen̄ inu. Îtumu ibe ire ọmọ ikwu, mè egwe ita isiraka, ke ọmọ môjomo me mkpa. 64 Eya orọ nyi ida ibe ebi akọn̄ eriọọn̄ ubọk ekebem udọn̄ ya usen geelek ubọk ògbegbe mege eso usen ita. Ire kperọ ikeya, ebi udun̄ kan̄ mêkọt isi iben nkwukwu kan̄ isan̄a, mè inifiaan̄ itumu inyi ebi ene ibe ke îjomo me mkpa. Ire ojelek inu òkup ikeya irọ, ofiaan̄ eyi mgburudun̄ mômin igak eyi adasi.”