22
Urọk ijọk ido-nwa
1 Jisọs onenitumu si ikọ inyi ebi ene me urọk, 2 mè ibe, “Mkpulu eyi Awaji ìkup kubọk ogwu ubọọn̄ òtoto ijọk ido-nwa inyi gwun̄ kan̄ enerieen̄. 3 Mgbọ ijọk ya obobene, ogwu ubọọn̄ ya oneniria ebi usun̄ kan̄ ibe esi elook otutuuk ebi egwenbe cha ibe enu, ke ijọk mônibene. Ire, ife cha ejijit inunu.
4 “Ogwu ubọọn̄ ya okpọkpọk iria owuwa ebi usun̄ kan̄ ibe esi elook otutuuk ebi egwenbe cha ibe mè enu ke ọmọ îtem inorie ijọk isan̄a; ke ọmọ îkpan̄ owuwa uman eriembuuk egwookbe imiin̄ ufuk, mè ikpan̄ si owuwa orie eriembuuk igbaalek; ke mîneen̄ inu geelek isun̄ isan̄a iban ebibi, mè ebibi enu enegọọk ọmọ erie ijọk ido-nwa gwun̄ kan̄.
5 “Ire, ife cha kpesa igwen ogwu ubọọn̄ ya isun̄ inu geege. Ogwu ikup, oje òsi uyọrọlek kan̄. Ene ge osi uko kan̄, ofifi ene ojeje isi inu òbek ọmọ. 6 Ebibilọ esasa me ejit ikpak itet ebi usun̄ ogwu ubọọn̄ ya isut ikpan̄. 7 Mgbọ ogwu ubọọn̄ ya onọbe inu ife cha erọbe, inanaan̄ ejit enenen, mè iria ebi akọn̄ kan̄ ibe esi ekpan̄ otutuuk ebi ìkpakpan̄ ebi usun̄ kan̄ cha, mè etap ukan̄ ewọp ama kiban̄.
8 “Ogwu ubọọn̄ ya onenikpọk igwen ebi usun̄ kan̄ itumu inyi ibe, ‘Mînen̄e otutuuk inorie ijọk ido-nwa ya isun̄ isan̄a, ire, ebi egwenbe cha kpegbe ibọbọkọ umin enyibe ema. 9 Eya orọ, ìje ìsibi otutuuk lek oniin̄ geelek, mè ìgwen ebi geelek enyi emun̄be ibe enerie inorie ijọk ido-nwa ya.’ 10 Ikeya si, ebi usun̄ cha enanan̄a isibi, mè ije inin̄ otutuuk lek oniin̄, mè igween̄ ene geelek ema emun̄be, ebi ata mè ebi ijo. Uwu ijọk ya ojojot dum dum.
11 “Ire, mgbọ ogwu ubọọn̄ ya onin̄be uwu ya ibonikpọ ebi ichen cha, imumun̄ ogwu enerieen̄ ge ikatapge ofọnti ido-nwa ogọọkbe ikweek irek me emen uwu ya, 12 mè ibe ọmọ, ‘Une, òjeje inin̄ uwu yi me okatapge ofọnti ido-nwa?’ Ogwu enerieen̄ ya ìkakọt ìsan̄a amọn.
13 “Ogwu ubọọn̄ ya onyinyi ida ibe ebi usun̄ kan̄ etet ogwu enerieen̄ ya ebọp ukot mè ubọk, mè etọp eto me oyet me emen udun, mè ikup me ere ya ikito ito, mè ikitaka ejeek.
14 “Mije ebi egwenbe mîwa, ire, ene inen mè inen gaalek ke egobo.”
Idodo ofolek otitip ido
15 Ebi Farisi enenititiin̄, mè itọt ubọk ebesa ileke Jisọs ikọ me otu, mè esa me ikeya etet ọmọ. 16 Ema eneniria ebi udun̄ kiban̄ melek ebi ìkigọọk Erọdu isi lek kan̄. Ebi melek kiban̄ chi esisi, mè ido Jisọs ibe, “Ogwu Ijejeen̄, eji mîriọọn̄ ibe ke owu ìre ogwu òkitumu atikọ, mè ikijeen̄ si oniin̄ eyi Awaji ike îgbebe. Òkakilibi ene chieen̄, mije, òkakikpọ ene geege chieen̄ me isi. 17 Tumu-nu nkeek kwun̄ ofolek ikọ keyi nyi eji. Ìre îgbe ibe eketip otitip ido enyi ogwu Sisa,a sà ìre ìkagbe?”
18 Jisọs orọriọọn̄ ijo otitọt kiban̄, mè ibe ema, “Enyi ebi isi iba kechi! Ìre keke orọ enyi ekiweek ileleke emi ikọ me otu ikeyi? 19 Ìjeen̄ emi nu ikpoko enyi ekisa itip otitip ido ya.” Ema esasa dinari ge ijet ọmọ. 20 Idodo ema ibe, “Ìre ogugo kè ekene mè erieen̄ kè ekene ire echi me lek ikpoko yi?”
21 Ema efọfọọk ibe ke îre eyi ogwu Sisa.
Jisọs ofọfọọk ema ibe, “Ìsa inu ogwu Sisa ìnyi ogwu Sisa, mè ìsa eyi Awaji ìnyi Awaji.”
22 Ufọọk-otu ya okeke ema chieen̄. Ema etetele ọmọ, mè ije inan̄a.
Idodo ofolek ijojomo me mkpa
23 Me usen yaage, ebi Sadusi ebi ìkijeen̄ ibe ke kpunu ijojomo me mkpa, enenisa idodo ge inu me lek kè Jisọs, 24 mè inibe ọmọ, “Ogwu Ijejeen̄, Mosis ìtumu inyi eji ibe ire ene ikwu itele ogwu nwa, ìkabon gwun̄, mè ogwu ngwan̄ imọnọ nwakpa ngwan̄ kan̄ okwube itele ya ido, mè ibon bọn me owot inyi ngwan̄ kan̄ ogwu òkwukwu.b 25 Me ere ngwan̄ ebirieen̄ jaaba ekupbe, ogwu adasi me etete kiban̄ ododo nwa, ìkabon gwun̄. Ikwukwu itele nwa kan̄ ya inyi ogwu ngwan̄. 26 Ogwu òso iba omọmọnọ ogwu enenwaan̄ ya ido, mè ikwu itele si, ìkabon gwun̄. Ikeya ke ema otutuuk ene ere nlom ogwu enenwaan̄ ya iso ire lek ogwu òso jaaba, mè ikwaan̄ itele, kpebon bọn. 27 Me mgburudun̄ kan̄, ogwu enenwaan̄ ya okwukwu. 28 Tumu-nu, me mgbọ ebi ìkwakwaan̄ mêjomobe me mkpa, ìre ogwu enenwaan̄ ya ìbore nwa inyi ekene me etete ebi ngwan̄ jaaba cha, mije, ema otutuuk ene mîkaan̄ ọmọ me lek nwa iso?”
29 Jisọs ofọfọọk ema ibe, “Enyi mîje ilọ, mije, enyi kperiọọn̄ inu egebe me Ikpa Mbuban, enyi kperiọọn̄ si unye Awaji. 30 Me mgbọ ijojomo me mkpa, ebi ene kpebedo nwa, kpebesa ene iche olom si, ebekup kubọk ebi osat ìkup me emen inyọn̄. 31 Ire me lek ikọ ijojomo me mkpa, ìre enyi kpefufuk inu Awaji otumube me emen Ikpa Mbuban inyi enyi ibe, 32 ‘Emi ìre Awaji kè Ebereyam, mè Awaji kè Ajiki, mè Awaji kè Jekọp’c? Awaji ìkare Awaji ebi ìkwakwaan̄. Îre Awaji ebi ìkup me ugwem.”
33 Mgbọ ebi urum ene cha enọbe ikọ ya, ijejeen̄ kè Jisọs okeke ema chieen̄ enenen.
Ikan òmimin ichit
34 Mgbọ ebi Farisi enọbe ibe ke Jisọs îtumu ikọ ichit ebi Sadusi otu, ema enenititiin̄. 35 Ogwu òjeen̄ Ikan ge me etete kiban̄ onenido Jisọs ikọ ge isasa itọ ọmọ ikpọ, 36 mè ibe ọmọ, “Ogwu Ijejeen̄, ìre ikan eyi owa omin ichit me etete otutuuk Ikan kè Mosis?”
37 Jisọs ofọfọọk ọmọ ibe, “Îre Ikan eyi òbe, ‘Ma Okumugwem Awaji kwun̄ me otutuuk ejit kwun̄ mè otutuuk ibot ejit kwun̄, mè otutuuk ekiket kwun̄.’d 38 Eyiyi ore adasi Ikan, mè ire si eyi òmimin ichit. 39 Ikan eyi òmimin igọọk eya, mè ikup si kubọk keya ìre eyi òbe, ‘Ma ogwu melek kwun̄ kubọk omabe akpalek kwun̄.’e 40 Îre me lek Ikan iba kechi ke otutuuk Ikan kè Mosis, mè otutuuk ijejeen̄ ebi nriran ejeen̄be obieen̄.”
Idodo ofolek ogwu Awaji otọkọbe aran̄ me ibot
41 Ike ebi Farisi etitiin̄be me ere ya, Jisọs osasa me irek keya ido ema ibe, 42 “Ìre enyi ekikeek keke ofolek ogwu Awaji otọkọbe aran̄ me ibot? Ìre gwun̄ kè ekene ke îre?”
Ema efọfọọk ibe ke îre gwun̄ kè Debit.
43 Ikpọkpọk ido ema ibe, “Ire ikeya, ìre Debit ìjeje igwen ene ya Okaan̄-ene mgbọ îbenbe nriran inan̄a me unye Ekwukwu Mbuban? Debit ìben nriran ibe,
44 “ ‘Okumugwem ìtumu inyi Okaan̄ n̄a ibe,
“Siki kweek irek me agan̄ ubọk ulom n̄a,
mege ire mgbọ mâsabe ebi ochicha kwun̄ irọ inu ibene ukot inyi owu.” ’f