Ro Pangatlo nga Sueat ni
Juan
1
Para kay Gayo nga ginapalangga ko it hantop gid sa akong tagipusuon. Ro nagasueat ngara hay tag ginakilaea nga Ro Magueanga 2 Pinalangga ko nga amigo, kabay pa nga sa tanan nga butang hay una ka sa mayad nga kahimtangan ag mabaskog ro imong eawas pareho ku imong pagtuo nga malig-on man. 3 Nalipay gid ako it duro pag-abot riya ku ibang mga kaigmanghuran sa pagtuo ay ginsugid nanda nga hugot gid ro imong pagpati sa matuod nga mensahi it Dyos ag nagakabuhi ka suno sa rayang mensahi. 4 Ro makatao eang kakon it kalipay eabaw sa tanan hay ro balita nga ro akong mga unga sa pagtuo hay nagakabuhi suno sa matuod nga mensahi.5 Pinalangga ko nga amigo, ginapakita mo ro imong pagkamatutom kada magbulig ka sa imong mga igmanghod sa pagtuo bisan owa mo sanda hakilaea. 6 Sanda mismo ro nagsugid sa mga tumueuo riya ku imong paghigugma kanda. Kabay pa nga padayunon nimo ro pagbulig sa mga nagaserbisyo sa Dyos sa andang pagpamanawon ay ruyon ro nagakabagay nga obrahon kanda. 7 Dapat gid man sanda nga buligan sa andang pagpanaw agod magwali parti kay Kristo nga dungganon nga Maneueuwas ay owa sanda nagapangayo it bulig halin sa mga bukon it tumueuo. 8 Ngani dapat kita mismo nga mga tumueuo ro magasuporta kanda agod mangin kabulig nanda kita sa andang ginaobra nga pagsugid ku matuod nga mensahi parti kay Kristo.
9 Nagsueat eon ako kinyo nga mga tumueuo inha pero owa ginatahura ni Diotrefes ro among pagdumaea. Gusto mat-a abi nana hay imaw gid-a ro magdumaea. 10 Ngani kon mag-adto ako inha hay akon nga ihathat kinyo nga mga tumueuo ro mga maeain ag pinuril nga mga ginapanghambae nana parti kamon. Ag owa pa imaw makuntento sa anang gin-obra ngaron. Owa man nana ginapasakaa sa anang baeay ro atong mga igmanghod nga gaadto inha kinyob Ginabawaean man nana ro mga tumueuo inha nga magpasaka kanda ag ana nga ginasuboe sa grupo it mga tumueuo ro gusto nga magpasaka kanda. 11 Pinalangga ko nga amigo, ayaw gid pagtueara ro maeain nga ginahimo it tawo kundi tueara ro mayad. Ro nagahimo it mayad hay unga it Dyos pero ro gahimo it maeain hay owa nakaeubot kon ano ro kinaiya it Dyos.
12 Si Demetrio mat-a hay ginahambae ku tanan nga nakakilaea kana nga mayad imaw nga tawo. Makita gid ro anang kamayad sa anang pagtuman sa matuod nga mensahi. Kami mismo riya hay makapamatuod ku anang kamayad ag sayod ka man nga matuod ro amon nga ginahambae. c
13 Abo pat-a kunta ro akong gustong ihambae kimo ugaling hay indi ko eon lang igpaagi sa sueat. 14 Kabay pa nga magkilita kita eagi agod makaistorya kita. 15 Kabay pa nga taw-an ka ku Dyos it kalinong sa inyong tagipusuon. Gapangamusta kimo ro tanan naton nga mga amigo nga tagariya. Kumustaha lang it tig sambilog ro atong mga amigo inha.