Nqtavq gaqkhoel khi haoqgavq pavqyov yov yaq teevq yov nail ganl
10
Aq-u phao,
gaq mao-ail kav nail nqtavq gaqkhoel teevq gaq nqdil doi khi,
nqtavq nee mail yavq kha lee thailthaiq nail bhai,
ngal ya moel-a nail ngaol.
Aivq neq,
haildallalkov uqjeeq jeeq-nq thaq nail ngaol.
Aivq nail maivphaoq neq,
nlma khe-ai dul khi,
aivq nail aqkhil neq,
miqjaq nail ilkhel khe-ai,
dul nail ngaol.
2 Aivq nail aqlavq lavqkhoel bhai phao-ai thaq nail haoqgavq pavqyov yov yaq teevq yov aol nail ngaol.
Aivq nail lavqmal phao khe aqkhil neq,
iqyaq iqma bhai naoq thaiq-ai thaq nail ngaol.
Lavqtsel phao khe aqkhil neq,
miltsaq bhai naoqthaiq-ai thaq nail ngaol.
3 Allaqjaqsil geeq nail khe-ai,
aivq aqthel mailma-ail gul nail ngaol.
Aq-u phao,
nqjaiq jaiq nail aqthel sivq thel meel dol leevq-a nail ngaol.
4 Nqjaiq jaiq nail aqthel meel dov-ai leevq gaq-u phao,
ngal aqthel al bhai gevq thaq-ai nail khi ngaol.
Thailhai ngaol-aoq,
nqtavq nee mail aqthel meel dov-ai leevq khi,
“Nqjaiq jaiq nail aqthel sivq thel meel dov-ai leevq nail bhai junq deeq yaoq.
Al bhai thaq gevq” dai,
ge lavq nail bhai ngal ya gaiq-a nail ngaol.
5 Aq-u phao,
iqyaq iqma khi miltsaq bhai naoqthaiq-ai khi thulphaol-nvq thaq nail bhai ngaq-i mail ya moel-a nail nqtavq gaqkhoel al gaq,
aivq nail lavqmal lavq nqtavq phao bavq dil-a nail ngaol.
6 A bhai nee ngal-aq,
nqmaq maqluv halyeel doevq nail gaq pevq nail,
nqtavq,
miltsaq,
iqyaq iqma khi al juq nail lavqkhoel khe khal doevq khal jaol nail phaq iqsanl bhai teivq-a nail Miqyail nail aqmil kov-uvq nee niailhai ge nail ngaol:
“Aqyanq maq jiav yaoq-aol.
7 Nqtavq gaqkhoel sivq gaq teevq gaq,
aivq nail nqbho jiiv nail aqthel meel dol leevq nail aqyanq kev lee-u phao,
Miqyail-i mail oil tsail-ai thaq nail phaq bhee lal nail ngaol.
Oil tsail-ai thaq nail al phaq neq,
Miqyail nail yaqkav pevq nail aivq nail haqbhoil gedan nail juq bhai ge-ai thaq nail khe-ai pevq lal naol” dai,
khanq-a nail ngaol.
8 Aq-u phao,
nqtavq nee mail meel dov-ai leevq nail bhai,
ngaq-i mail ya gaiq-a nail aqthel al,
ngaq bhai niailhai gaoq ge lavq-a nail ngaol:
“Iqyaq iqma khi miltsaq nail kovtavq bhai naoqthaiq khi thulphaol-nvq thaq nail nqtavq gaqkhoel al gaq nail aqlavq lavqkhoel bhai aol nail,
phao-ai thaq nail haoqgavq al yov oil lai yaoq” dai,
ge lavq-a nail ngaol.
9 Alheel ngel-i mail,
“Ngaq bhai haoqgavq yov yaq thoil yov bivq lavq yaoq” dai,
nqtavq gaqkhoel al gaq bhai ge bhiq lai-a nail ngaol.
Aivq ge nail:
“Oil khi jaq yaoq.
Naoq nail ovqmav lavqkhoel bhai aqkhaq ngaol.
Thailhai ngaol-aoq,
naoq nail moeqthaoq lavqkhoel bhai neq,
bhaiqtsil bhaiqeel khe-ai tsilju gaoq deel ngaol” dai,
ge lavq-a nail ngaol.
10 Aq-u phao,
ngal nqtavq gaqkhoel al gaq nail aqlavq lavqkhoel bhai aol nail haoqgavq yov yaq al yov bhai oil jaq-a nail ngaol.
Ngaq nail moeqthaoq lavqkhoel bhai neq,
bhaiqtsil bhaiqeel khe-ai tsilju gaoq dai,
pevq-ail nial.
Thailhai ngaol-aoq,
haoqgavq al yov jaq gaq-u phao,
ngaq nail ovqmav lavqkhoel bhai neq,
aqkhaq khaq lal-a nail ngaol.
11 Aq-u phao,
aivq ngaq bhai gaoq ge lavq-a nail:
“Tsaol jeq-e maodai jeq-e nail ganl maqkhaiq,
milkhaoq maodai khaoq nail ganl maqkhaiq,
daoq mee nia phaq nail ganl maqkhaiq,
heeqphaq maodai gaq nail ganl maqkhaiq,
Miqyail naoq bhai bhi ge lavq nail khe-ai,
naol ya ge bhiq nail ngaol” dai,
ge lavq-a nail ngaol.