2 Gaolliqthu
Iqmoeq ilmoeq khe daoq
1
Ngal neq,
Paolluv ngaol.
Miqyail neema tsaq nail ngel-i mail,
Yeiqsul Khali nail gaqkhoel jiovq thailthaiq nail ngaol.
Gaolliqthu meenq bhai jaol nail Miqyail nail tsaol-aq bhai maqkhaiq,
Aqgaqyal milkhaoq doi dai jaol nail Khali yaq iqsanl bhai maqkhaiq,
jaqbheq Tilmolseiq nv-nvq gaq haoqgavq niil gevq bhoel-ai leevq-a nail ngaol.
2 Ngadao nail Aqbhu Miqyail khi Heeqphaq Yeiqsul Khali nail geeqlaoq eeljaol khi neesal-ovq nail phaq nuljuq nail kovtavq bhai jiav dei-eiq.
Paolluv Miqyail bhai tsiqeeq nail ganl
3 Ngadao nail Heeqphaq Yeiqsul Khali nail Aqbhu Miqyail bhai tsiqeeq bhel.
Aivq neq,
gaoqhaq gaiq-a nia nail Aqbhu ngaol.
Yaoq phaq yaoq-ao nee nail lavqkhoel ngadao bhai neesal bhi ovq nail Miqyail iqsanl ngel nail ngaol.
4 Nvjuq ya daq nail iqsanl nail lavqkhoel bhai,
aivq nvjuq bhai neesal bhi ovq lavq-a nail ngaol.
Miqyail nvjuq bhai neesal bhi ovq lavq-a nail khe-ai,
khoeq nail jiovq nail yaoq phaq yaoq-ao nee bhai ya daq nail tsaol-aq bhai nvjuq iqsanl neesal-ovq nail al phaq bivq kivq nail ngaol.
5 Khul khi mail dai ngal-aq neq,
Khali-i mail ya daq-a nail haq nail aoq nail juq nvjuq nail lavqkhoel-ai mao lal-a nail khe-ai,
Khali bhaqda nee Miqyail-i mail neesal bhi ovq lavq-a nail phaq bhai iqsanl,
nvjuq nail lavqkhoel bhai mao lal thailthaiq nail ngaol.
6 Nvjuq haq nail aoq nail phaq bhai ya daq haq neq,
nuljuq nail haqbhoil neesal-ovq nail phaq khi hevqkovq nail phaq pevq nail ngaol.
Nvjuq neesal-ovq haq neq,
nuljuq iqsanl nvjuq khe-ai,
neesal-ovq nail ngaol.
Alheel ngel-i mail,
nvjuq-i mail ya daq-a nail juq nuljuq iqsanl ya daq-u phao,
nuljuq oltsaol lal nail ngaol.
7 Ngal nuljuq nail ganl saol-nvq daiq haq neq,
noeqthunq nail phaq ivqdao dai,
jiav-ail nial.
Khul khi mail dai ngal neq,
nvjuq-i mail ya daq-a nail juq nuljuq iqsanl ya daq-a nail khe-ai,
nvjuq nail neesal-ovq nail phaq nuljuq iqsanl ya nail ngaol dai,
nvjuq heeq kivq nail ngaol.
8 Aqivq jaqbheq juq-ol,
nvjuq Aqsil-aq milkhaoq bhai jaol-u phao,
ya daq-a nail juq nail ganl nuljuq bhai bhi heeq kivq movq-ail nial.
Ya sil nail jaol-aq dai,
nvjuq noeq-u phao kev dai,
maq khanq tsaol nail khoeq nail jiovq nail juq ya daq-a nail ngaol.
9 Nvjuq neq,
ya sil naol dai,
yalkhaq dal lavq-a nail bhai nvjuq ya daq-a nail khe-ai,
dul nail ngaol.
Nvjuq neq,
yovqgavq nail aqmaol bhai yovqgavq maq juq mail,
sil nail tsaol-aq bhai bhi doevq kovq lal nia nail Miqyail bhai taivq-ail juq dai,
alhai pevq lal-a nail ngaol.
10 Aivq neq,
a dai eeq nail sil nail phaq nail lavqkhoel nvjuq bhai bhi jel-ail lavq-a nail nee ovqtavq,
yaqhao iqsanl bhi jel-ail lavq nail ngaol.
Aivq nvjuq bhai bhi jel-ail lavq dai,
nvjuq aivq bhai noeqthunq nail ngaol.
11 Nuljuq iqsanl geeqlaoq tsao hal lavq nail ngel-i mail,
aivq nvjuq bhai bhi jel-ail lavq nail ngaol.
Tsaol-aq maodai geeqlaoq hal lavq-a nail bhaqda nee,
nvjuq-i mail ya-a nail geeqlaoq eeljaol nail haqbhoil,
tsaol-aq maodai Miqyail bhai tsiqeeq nail ngaol.
Paolluv khul khi mail maq lal-a nail ganl
12 Nvjuq niailhai neema eeq duq ya nail ngaol.
Miltsaq yaq nail sivtavq bhai maqkhaiq,
a dai nee maqtsil nuljuq nail sivtavq bhai maqkhaiq,
Miqyail-i mail bivq-ai leevq-a nail meeq nail haol nail phaq khi maldil tsaq nail phaq nail lavqkhoel nee nvjuq nl nail hal nail ngaol dai,
nvjuq-i mail heeq kivq nail neema salkhil khanq nail ngaol.
Nvjuq miltsaq nail neenoeq neekha bhai juq juq-ail,
alhai nl nail hal nail maq ngel-ail.
Miqyail nail geeqlaoq eeljaol bhai juq nail ngaol.
13 Nuljuq-i mail maq ge nia nail phaq maq heeq nia nail phaq bhai nvjuq nuljuq bhai gevq bhoel-ai lavq-a nail maq ngel-ail.
14 Nuljuq maq gal dai heeq nia nail khe-ai,
teevq bhee teevq lovq heeq nia lal dai,
ngal noeqthunq nail ngaol.
Nuljuq alhai heeq nia lal haq neq,
ngadao nail Heeqphaq Yeiqsul nail aqn n-gaol nuljuq bhaqda nee nvjuq neema eeq duq ya nail khe-ai,
nuljuq iqsanl nvjuq bhaqda nee neema eeq duq ya nail ngaol.
15 Ngal al bhai aqmeeq-ai neema thaqtsaol nail ngel-i mail,
nuljuq nvq pov teevq pov geeqlaoq ya nia dai,
ngal nuljuq jaol nail bha iqmoeq lal naol dai,
noeq-ai thaq nail ngaol.
16 Ngal Maqgeiqdaolnil milkhaoq bhai lai-u phao,
nuljuq jaol nail bha nalga lal khi,
a bhai nee mail kovq lee-u phao iqsanl,
nuljuq jaol nail bha gaoq nalga lee naol dai,
aq-u phao alhai noeq-a nail ngaol.
A bhai nee ngal-aq,
nuljuq ngal loq nail phaq bhai lainq lavq khi Yuldav milkhaoq bhai bhi hevq ha lai nail dai iqsanl,
noeq-a nail ngaol.
17 Ngal alhai noeq-a nail ngel-i mail,
maq duq maq tsil dai pevq nail laiq.
Maq ngel haq neq,
miltsaq yaq juq nl nail khe-ai,
ngel nail phaq iqsanl,
maq ngel nail phaq iqsanl,
oil kheq oil lel khi mail,
ngal ge nail laiq.
18 Miqyail saljial ivq nail khe-ai,
ngaq-i mail nuljuq bhai ge bhiq-a nail daoq neq,
ngel nail phaq iqsanl,
maq ngel nail phaq iqsanl,
oil kheq oil lel khi ge nail,
maq ngel-ail.
19 Khul khi mail dai ngal-aq neq,
Siqlav,
Tilmolseiq nvjuq-i mail nuljuq bhai cav bhiq-a nail Miqyail nail Yaqyov Yeiqsul Khali neq,
ngel nail phaq iqsanl maq ngel nail phaq iqsanl oil kheq oil lel-ai thaq nail phaq maq ngel-ail.
Aivq nail lavqkhoel bhai neq,
ngel nail phaq teevq-eel ngaol.
20 Miqyail nail saljial iqsanl neq,
aivq nail lavqkhoel-ai ngel nail phaq teevq-eel ngaol.
Alheel ngel-i mail,
ngadao nail Miqyail bhai tsiqeeq tsiqheel-u phao,
Yeiqsul Khali bhaqda nee “Aqmiq” dai,
ge nail ngaol.
21 Nuljuq nee mail teevq gaq khe-ai,
nvjuq bhai Khali nail lavqkhoel-ai bhi jaol ivq lavq-a nail gaq khi tsel dov lavq-a nail gaq neq,
Miqyail ngaol.
22 Aivq neq,
ngadao bhai junq deeq-ai thaq nail ngaol.
Yaqhao jaiqbhoil ovq nail ngaol dai,
ngadao heeq kivq dai,
niil aq-il nee mail ngadao nail neema lavqkhoel-ai,
aivq nail Aqhaqlal bhi jaol lee-a nail ngaol.
23 Ngal nuljuq bhai maq bhi noeqhaq movq nail ngel-i mail,
Gaolliqthu meenq bhai maq lal-a nail ganl,
Miqyail heeq nia nail ngaol.
24 Nvjuq niailhai ge nail neq,
nvjuq nuljuq nail neema thaqtsaol nail phaq bhai uvthaiq nail maq ngel-ail.
Nuljuq neema thaqtsaol nail phaq neq,
ivq nail ngaol.
Nuljuq lavqkhiq tsail dai,
nvjuq nuljuq nee mail teevq gaq khe-ai,
nl thailthaiq nail ngaol.