رِسَالِةْ بُطْرُسْ الثَّانْيَة 2

المُعَلّْمِينْ الكَذَّابِينْ

‏1 آمَا كِيفْ مَا ظُهْرُوا أَنْبِيَاءْ كَذَّابِينْ فِي وُسْطْ الشَّعْبْ قْبَلْ، رَاهُمْ بَاشْ يُظْهْرُوا زَادَا مَا بِينَاتْكُمْ مُعَلّْمِينْ كَذَّابِينْ وْبِشْ يْدَخّْلُوا تَعَالِيمْ غَالْطَة فِي الدِّينْ تِهْلِكْ النَّاسْ وْحَتَّى الرَّبْ الِّي فْدَاهُمْ بَاشْ يُنْكْرُوهْ، وْفِيسَعْ بَاشْ يِهِزُّو رْوَاحْهُمْ لِلهْلاَكْ. ‏2 وْبَرْشَة نَاسْ بَاشْ يْتَبّْعُوا الفَاحْشَة مْتَاعْهُمْ وْبِسْبَبْهُمْ طْرِيقْ الحَقْ بَاشْ يَكْفْرُوا بِيهْ. ‏3 وْبِالطّْمَعْ مْتَاعْهُمْ بَاشْ يِسْتْغَلُّوكُمْ بِكْلاَمْ حْلُو وْمِلْيَانْ بِالكِذْبْ. مِنْ قْبَلْ هْلاَكْهُمْ مُوشْ بَاشْ يُبْطُلْ وِالحُكْمْ عْلِيهُمْ مُوشْ بَاشْ يَبْطَى.

‏4 رَاهُو إِذَا كَانْ اللهْ مَا خَلاَّشْ المْلاَيْكَة فِي بْلاَصِتْهُمْ وَقْتِلِّي عَمْلُوا الذْنُوبْ، آمَا رْمَاهُمْ فِي جْهَنِّمْ وْحَطّْهُمْ فِي حُفْرِةْ الظْلاَمْ الِّي مَا يُوفَاشْ مَرْبُوطِينْ بِالسْلاَسِلْ حَتَّى لِينْ يْجِي يُومْ الحْسَابْ، ‏5 وْمَا خَلاَّشْ حَتَّى حَدْ فِي العَالَمْ القْدِيمْ، آمَا حْفَظْ نُوحْ الِّي هُوَ الثَّامِنْ وِلِّي هُوَ يْبَشِّرْ بِالبِرْ كِجَابْ الفَيَضَانَاتْ عْلَى النَّاسْ الأَشْرَارْ. ‏6 وْإِذَا كَانْ رَدْ المُدُنْ مْتَاعْ سَدُومْ وْعَمُورَة رْمَادْ وِقْلِبْهُمْ وْرَدّْهُمْ عِبْرَة لِلِّي بَاشْ يْجِيوْ مْبَعْدْهُمْ وْمَا يْخَافُوشْ رَبِّي، ‏7 وْإِذَا كَانْ مَنَّعْ لُوطْ البَارْ مِالنَّاسْ العَاصِينْ الِّي كَثّْرُوا مِنْ عَمْلاَنْ الشَّرْ ‏8 وْهَاكَا الإِنْسَانْ البَارْ كَانْ يِتْعَذِّبْ فِي رُوحُو البَارَّة بِالشَّرْ الِّي يَعْمْلُوا فِيهْ، مِالشَّيْء الِّي كَانْ يْشُوفْ فِيهْ وْيِسْمَعْ فِيهْ نْهَارْ بَعْدْ نْهَارْ كِكَانْ عَايِشْ فِي وُسْطْهُمْ. ‏9 إِمَّالاَ رَاهُو الرَّبْ يَعْرِفْ كِيفَاشْ يْمَنَّعْ الِّي يْخَافُوا رَبِّي مِالتَّجْرْبَة وِيْخَلِّي الِّي مَا يْخَافُوشْ رَبِّي فِي العْذَابْ حَتَّى لِينْ يْجِي يُومْ الحْسَابْ، ‏10 بِالأَخَصْ هَاكَا الِّي يِجْرِيوْ وْرَاء الشْهَاوِي المَنْزُوسَة مْتَاعْ البْدَنْ وِيِسْتْهَانُوا بِالسُّلْطَة.

مَا يَحْشْمُوشْ وغَالْطِينْ فِي رْوَاحْهُمْ! مَا يْخَافُوشْ كِيْهِينُوا المَخْلُوقَاتْ الِّي عِنْدْهَا مَجْدْ، ‏11 وِينْ مُوجُودِينْ المْلاَيْكَة الِّي هُومَا عِنْدْهُمْ قُدْرَة وْقُوَّة أَكْثِرْ مِنْ المْلاَيْكَة الخَايْبِينْ، مَا يُحْكْمُوشْ عْلِيهُمْ حُكْمْ فِيهْ سَبَّانْ قُدَّامْ الرَّبْ. ‏12 آمَا المُعَلّْمِينْ الكَذَّابِينْ هَاذُومَا رَاهُمْ كِيفْ حَيَوَانَاتْ مَا عِنْدْهُمْشْ عْقَلْ وْمَخْلُوقَاتْ تْحَرِّكْ فِيهُمْ بْدُونَاتْهُمْ تْوِلْدُوا بَاشْ يِتْشَدُّوا وِيِتْقَطّْعُوا، يْهِينُوا فِي حَاجَاتْ مَا يَعْرْفُوهَاشْ، رَاهُمْ بَاشْ يِتْهِلْكُوا بالهْلاَكْ الِّي يِهْلْكُوا بِيهْ فِي النَّاسْ. ‏13 وِيْعَانُوا مِالغْلَطْ الِّي هُوَ الأَجْرْ مْتَاعْ شِيخَاتْهُمْ الخَايْبَة. مَاشِي فِي بَالْهُمْ الِّي هُومَا يِتْمَتّْعُوا بِالفْسَادْ حَتَّى فِي قَلْبْ النْهَارْ. هُومَا بْقُعْ مْتَاعْ عَارْ وِالكُلْهُمْ عْيُوبْ حَتَّى وَقْتِلِّي يِتْمَتّْعُوا مْعَانَا بِالأَعْيَادْ وْهُومَا يْغُشُّوا. ‏14 عِينِيهُمْ مِلْيَانَة بِالزْنَى، مَا يِشْبْعُوشْ مِالذْنُوبْ، يِخْدْعُوا فِي النْفُوسْ الضْعِيفَة، قْلُوبْهُمْ ادَّرْبِتْ عْلَى الطْمَعْ. هُومَا وْلاَدْ مَلْعُونِينْ. ‏15 خَلاَّوْ الطْرِيقْ المُسْتَقِيمْ وْضَاعُوا وِمْشَاوْ فِي طْرِيقْ بَلْعَامْ وِلْدْ بَعُورْ الِّي حَبْ يِرْبِحْ مِالشَّرْ، ‏16 آمَا تْوَبِّخْ عْلَى المَعْصْيَة مْتَاعُو، بْهِيمَة مَا تِتْكَلِّمْشْ نُطْقِتْ بْصُوتْ بَشَرْ وْرَجّْعِتْ النَّبِي لْعَقْلُو.

‏17 هَاذُومَا رَاهُمْ عْيُونْ مَا فِيهَاشْ مَاء وِسْحُبْ هَازِّتْهَا الرِّيحْ القْوِيَّة، وِتْحَضّْرِلْهُمْ الظْلاَمْ الِّي مَا يُوفَاشْ. ‏18 رَاهُمْ يِتْكَلّْمُوا بِكْلاَمْ كْبِيرْ وْفَارِغْ، يِخْدْعُوا بِشْهَاوِي البْدَنْ الفَاسْدَة فِي نَاسْ هُرْبُوا بِالسِّيفْ مِنْ بِينْ الِّي عَايْشِينْ فِي الغْلَطْ. ‏19 يُوعْدُوهُمْ بِالحُرِّيَّة وْهُومَا بِيدْهُمْ عَبِيدْ مْتَاعْ الفْسَادْ، عْلَى خَاطِرْ الإِنْسَانْ يْوَلِّي عَبْدْ مْتَاعْ الشَّيْء الِّي غَلْبُو! ‏20 رَاهُمْ إِذَا كَانْ بَعْدْ مَا مَنْعُوا مِنْ النْجَاسَة مْتَاعْ العَالَمْ عْلَى طْرِيقْ المَعْرْفَة مْتَاعْ رَبّْنَا وِالمُخَلِّصْ مْتَاعْنَا يَسُوعْ المَسِيحْ، وْيَرْجْعُوا يُحْصْلُوا فِيهُمْ وْيِتْغِلْبُوا، رَاهِي حَالِتْهُمْ فِي الإِخِّرْ بَاشْ تْكُونْ أَخْيِبْ مِلِّي كَانُوا عْلِيهْ فِي الأُوِّلْ، ‏21 وْلُوكَانْ مَا عَرْفُوشْ الطْرِيقْ مْتَاعْ البِرْ خِيرِلْهُمْ مِنْ إِنّْهُمْ بَعْدْ مَا عَرْفُوهْ يِبْعْدُوا عْلَى الوْصِيَّة المُقَدّْسَة الِّي تِعْطَاتِلْهُمْ. ‏22 وْيَاقْعِلْهُمْ كِيفْ مَا قَالْ المَثَلْ الِّي مَا يُغْلُطْشْ:

الكَلْبْ رْجَعْ لِرْدَادُو،

الحْلاَلِفْ الِّي تْغِسْلُوا

لِلوْسَخْ رَجْعُوا.