رِسَالِةْ بُطْرُسْ الأُولَى 4

وُكَلاَءْ صَالْحِينْ عْلَى نِعْمِةْ اللهْ

‏1 مَا دَامُو المَسِيحْ تْعَذِّبْ فِي البْدَنْ، سَلّْحُوا رْوَاحْكُمْ بِالفِكْرَة هَاذِي بِيدْهَا، رَاهُو الِّي يِتْعَذِّبْ فِي بَدْنُو يْبَطِّلْ الذْنُوبْ، ‏2 بَاشْ يْعِيشْ بْقِيِّةْ العْمُرْ فِي البْدَنْ مُوشْ بِالشْهَاوِي مْتَاعْ البَشَرْ، آمَا بْإِرَادِةْ اللهْ. ‏3 يِزِّيكُمْ الِّي عَدِّيتُوهْ مِنْ عْمُرْكُمْ تَعْمْلُوا فِي الحَاجَاتْ الِّي يْحِبُّوا يَعْمْلُوهَا الشْعُوبْ الِّي مَا يِمّْنُوشْ بْرَبِّي، عَايْشِينْ فِي النْجَاسَة وِالشْهَاوِي وِالسُّكْرْ وِالخْلاَعَة وْقَعْدَاتْ الشْرَابْ وِعْبَادِةْ الصْنَبْ الِّي هِيَ حْرَامْ. ‏4 وْهُومَا تَوَّا مِسْتَغْرْبِينْ فِيكُمْ الِّي إِنْتُومَا مَا تِجْرِيوْشْ مْعَاهُمْ وْرَاء الخْلاَعَة المْسَيّْبَة وْهُومَا يْهِينُوا فِيكُمْ، ‏5 آمَا رَاهُمْ بَاشْ يِتْحَاسْبُوا قُدَّامْ الِّي هُوَ حَاضِرْ بَاشْ يُحْكُمْ عْلَى الحَيِّينْ وِالمُوتَى. ‏6 رَاهُو هَاذَاكَا عْلاَشْ حَتَّى المُوتَى زَادَا تْبَشّْرُوا بِالإِنْجِيلْ، بَاشْ حَتَّى إِذَا كَانْ تِحْكَمْ عْلِيهُمْ فِي البْدَنْ كِيفْ البَشَرْ يْعِيشُوا فِي الرُّوحْ كِيفْ اللهْ.

‏7 نْهَايِةْ كُلْ شَيْء قُرْبِتْ، هَاذَاكَا عْلاَشْ اتْحَكّْمُوا فِي رْوَاحْكُمْ وْفِيقُوا بَاشْ تْصَلِّيوْ ‏8 قْبَلْ كُلْ شَيْء خَلِّيوْ مْحَبِّتْكُمْ لِبْعَضْكُمْ تْكُونْ قْوِيَّة، رَاهِي المْحَبَّة تُسْتُرْ بَرْشَة ذْنُوبْ. ‏9 ضَيّْفُوا بْعَضْكُمْ مِنْ غِيرْ مَا تِتْشَكَّاوْ، ‏10 خَلِّي كُلْ وَاحِدْ يِسْتَعْمِلْ المَوْهْبَة الِّي خْذَاهَا بَاشْ يِخْدِمْ الأُخْرِينْ، كِيفْ وُكَلاَءْ صَالْحِينْ عْلَى نِعْمِةْ اللهْ المِتْنَوّْعَة. ‏11 أَيْ وَاحِدْ يِتْكَلِّمْ خَلِّيهْ يِتْكَلِّمْ بِكْلاَمْ اللهْ، وْأَيْ وَاحِدْ يَعْمِلْ خِدْمَة خَلِّيهْ يِخْدِمْهَا بِالقُوَّة الِّي يَعْطِيهَا اللهْ، بَاشْ اللهْ يِتْمَجِّدْ فِي كُلْ شَيْء بْيَسُوعْ المَسِيحْ، المَجْدْ وِالسُّلْطَة لِيهْ لِلأَبَدْ. آمِينْ

اتْحَمّْلُوا العْذَابْ

‏12 يَا حْبَابِي، مَا تِسْتَغْرْبُوشْ فِي المْصِيبَة الِّي تَحْرِقْ الِّي جَايِتْكُمْ، بَاشْ تْجَرِّبْكُمْ، كَإِنّْهَا حَاجَة غْرِيبَة قَاعْدَة تَاقْعِلْكُمْ، ‏13 آمَا أَفْرْحُوا بْقَدْرْ مَا تْشَارْكُوا فِي العْذَابْ مْتَاعْ المَسِيحْ، بَاشْ زَادَا تَفْرْحُوا وْتِتْهَنُّوا وَقْتِلِّي يْظَهِّرْ المَجْدْ مْتَاعُو. ‏14 صَحَّة لِيكُمْ إِذَا كَانْ تْعَايِرْتُوا بِسْبَبْ إِسْمْ المَسِيحْ عْلَى خَاطِرْ رُوحْ اللهْ وِالمَجْدْ بَاشْ يَهْبِطْ عْلِيكُمْ. ‏15 آمَا مَا تْخَلِّيوْشْ حَتَّى وَاحِدْ فِيكُمْ يِتْعَذِّبْ كِيفْ قَاتِلْ، وِلاَّ سَارِقْ، وِلاَّ يَعْمِلْ فِي الشَّرْ وِلاَّ يِدَّخِّلْ فِي أُمُورْ غِيرُو، ‏16 آمَا إِذَا كَانْ وَاحِدْ يِتْعَذِّبْ عْلَى خَاطْرُو مَسِيحِي، خَلِّيهْ مَا يِحْشِمْشْ آمَا يْمَجِّدْ اللهْ عْلَى خَاطْرُو مِتْسَمِّى بِالإِسْمْ هَاذَا. ‏17 رَاهُو جَا الوَقْتْ الِّي بَاشْ يِبْدَى فِيهْ الحُكْمْ بْشَعْبْ اللهْ. وْإِذَا كَانْ يِبْدَى بِينَا، كِيفَاشْ بَاشْ تْكُونْ نْهَايِةْ الِّي مَا يْطِيعُوشْ إِنْجِيلْ اللهْ؟ ‏18 إِذَا كَانْ الإِنْسَانْ البَارْ يُخْلُصْ بِصْعُوبَة، شْنُوَّة بَاشْ يَعْمِلْ الفَاسِدْ وِالمِذْنِبْ؟ ‏19 إِمَّالاَ الِّي قَاعْدِينْ يِتْعَذّْبُوا كِيفْ مَا تْحِبْ إِرَادِةْ اللهْ خَلِّيهُمْ يَعْمْلُوا الخِيرْ وِيْحُطُّوا رْوَاحْهُمْ بِينْ يْدِينْ الخَالِقْ الأَمِينْ.