رِسَالِةْ بُطْرُسْ الأُولَى 1

رِسَالِةْ بُطْرُسْ الأُولَى

تَحِيَّة

‏1 مِنْ بُطْرُسْ، رَسُولْ يَسُوعْ المَسِيحْ، للمِتْغَرّْبِينْ وِمْفَرّْتِينْ فِي كُلْ بْلاَصَة فِي بُنْطُسْ وْغَلاَطْيَة وْكَبَّدُوكِيَّة وْأَسِيَّة وْبِثِينِيَّةَ، الِّي خْتَارْكُمْ ‏2 اللهْ الآبْ بْعِلْمُو مِنْ قْبَلْ بْرُوحُو وْبِالطّاعَة وْكِتِتْرَشُّوا بْدَمْ يَسُوعْ المَسِيحْ.

بَرْشَة نِعْمَة وْسَلاَمْ عْلِيكُمْ.

أَمَلْ حَيْ

‏3 مُبَارَكْ اللهْ بُو رَبّْنَا يَسُوعْ المَسِيحْ الِّي تُولِدْنَا مِنْ جْدِيدْ بْرَحْمْتُو العْظِيمَة لْأَمَلْ حَيْ بِالقْيَامَة مْتَاعْ يَسُوعْ المَسِيحْ مِنْ بِينْ المُوتَى، ‏4 وِلْوَرْثَة مَا تَفْنَاشْ وْمَا تِفْسِدْشْ وْمَا تُوفَاشْ، مَحْفُوظَة لِيكُمْ فِي السْمَاءْ، ‏5 إِنْتُومَا الِّي تَحْفِظْكُمْ قُدْرِةْ اللهْ بِالإِيمَانْ لْخَلاَصْ بَاشْ يِتْكْشِفْ فِي آخِرْ الزْمَانْ، ‏6 تَفْرْحُوا بِالشَّيْء هَاذَا، رَغْمِلِّي تَوَّا مُمْكِنْ تِحْزْنُوا لْمُدَّة قْصِيرَة بْأَنْوَاعْ مْتَاعْ تَجَارِبْ ‏7 بَاشْ إِيمَانْكُمْ الصْحِيحْ الِّي هُوَ أَغْلَى مِالذّْهَبْ رَغْمِلِّي هُوَ فَانِي يِتْجَرِّبْ بِالنَّارْ، يْجِيبْ الشُّكْرْ وِالمَجْدْ وِالكَرَامَة نْهَارِتْ الِّي يُظْهُرْ يَسُوعْ المَسِيحْ. ‏8 الِّي تْحِبُّوهْ رَغْمِلِّي مَا رِيتُوهِشْ، وْتِمّْنُوا بِيهْ رَغْمِلِّي مَا كُمْشْ تْشُوفُوا فِيهْ تَوَّا، وْتَفْرْحُوا فَرْحَة مَجِيدَة وِعْظِيمَة مَا تِتْوْصُفْشْ ‏9 وْتُوصْلُوا لِلهَدَفْ مْتَاعْ إِيمَانْكُمْ الِّي هُوَ الخَلاَصْ مْتَاعْ نْفُوسْكُمْ.

‏10 الخَلاَصْ الِّي فَرْكْسُوا عْلِيهْ وْلَوّْجُوا عْلِيهْ الأَنْبِيَاءْ الِّي تْنَبّْأُوا عْلَى النِّعْمَة الِّي خْذِيتُوهاَ. ‏11 فَرْكْسُوا عْلَى الوَقْتْ وِالظُّرُوفْ الِّي قْصَدْهُمْ رُوحْ المَسِيحْ الِّي فِيهُمْ كِسِبْقُوا وْخَبّْرُوا عْلَى الوْجَايِعْ مْتَاعْ المَسِيحْ وِالأَمْجَادْ الِّي بَاشْ يْجِيوْ مْبَعْدْهَا. ‏12 وْتِكْشِفِّلْهُمْ الِّي مَا كَانُوشْ يِخْدْمُوا فِي رْوَاحْهُمْ آمَا يِخْدْمُوا فِيكُمْ، فِي الحَاجَاتْ الِّي خَبّْرُوكُمْ بِيهَا تَوَّا النَّاسْ الِّي بَشّْرُوكُمْ عْلَى طْرِيقْ الرُّوحْ القُدُسْ الِّي تِبْعَثْ مِالسْمَاءْ. الحَاجَاتْ الِّي المْلاَيْكَة يِشْتْهَاوْ بَاشْ يَعْرْفُوهُمْ.

كُونُوا طَاهْرِينْ

‏13 هَاذَاكَا عْلاَشْ كُونُوا فَايْقِينْ لِلخِدْمَة وِاتْحَكّْمُوا فِي رْوَاحْكُمْ وْخَلِّى يْكُونْ عِنْدْكُمْ أَمَلْ فِي النِّعْمَة الِّي تْجِيكُمْ وَقْتِلِّي يُظْهُرْ يَسُوعْ المَسِيحْ. ‏14 وْكِيفْ وْلاَدْ طَايْعِينْ، مَا اتَّبْعُوشْ الشْهَاوِي هِيَ بِيدْهَا الِّي تَبَّعْتُوهَا كِكُنْتُوا عَايْشِينْ فِي الجَهْلْ، ‏15 آمَا كُونُوا قِدِّيسِينْ فِي تَصَرُّفَاتْكُمْ الكُلْهَا كِيفْ مَا الِّي نَادَاكُمْ زَادَا قُدُّوسْ. ‏16 مَا دَامُو الكْتَابْ المُقَدَّسْ يْقُولْ: «يِلْزِمْكُمْ تْكُونُوا قِدِّيسِينْ عْلَى خَاطِرْنِي آنَا قُدُّوسْ.»

‏17 وْإِذَا كَانْكُمْ تْعَيّْطُولُو بُو، هَاكَا الِّي يُحْكُمْ عْلَى كُلْ وَاحِدْ عْلَى قَدْرْ أَعْمَالُو مِنْ غِيرْ مَا يْعَامِلْ حَتَّى حَدْ، إِمَّالاَ عِيشُوا مُدِّةْ غُرْبِتْكُمْ فِي الأَرْضْ وْإِنْتُومَا خَايْفِينْ مِنْ رَبِّي، ‏18 عَارْفِينْ الِّي إِنْتُومَا تِفْدِيتُوا مِالسِّيرَة البَاطْلَة الِّي وْرِثْتُوهَا مِنْ عِنْدْ جْدُودْكُمْ، مُوشْ بِالحَاجَاتْ الفَانْيَة كِيفْ الذْهَبْ وِالفِضَّة، ‏19 آمَا بْدَمْ غَالِي، دَمْ خَرُوفْ مَا فِيهِشْ عِيبْ وْمُوشْ أَجْرِبْ، دَمْ المَسِيحْ. ‏20 الِّي مَعْرُوفْ قْبَلْ مَا تِتْخْلَقْ الدِّنْيَا، آمَا ظْهُرْ عْلَى خَاطِرْكُمْ فِي آخِرْ الزْمَانْ. ‏21 وِعْلَى طْرِيقُو هُوَ عِنْدْكُمْ إِيمَانْ بِالله الِّي قَيّْمُو مِنْ بِينْ المُوتَى وِعْطَاهْ المَجْدْ، بَاشْ إِيمَانْكُمْ وِالأَمَلْ مْتَاعْكُمْ يْكُونُوا فِي اللهْ.

‏22 وْتَوَّا، بَعْدْ مَا طَهِّرْتُوا نْفُوسْكُمْ بِالطَّاعَة مْتَاعْكُمْ لِلحَقْ وْوَلِّيتُوا تْحِبُّوا اخْوِتْكُمْ بِحْقِيقَة، إِمَّالاَ حِبُّوا بْعَضْكُمْ حُبْ طَاهِرْ مِالقَلْبْ. ‏23 رَاكُمْ تُولِدْتُوا مِنْ جْدِيدْ، مُوشْ مِنْ زَرْعْ يِفْنَى، آمَا مِنْ زَرْعْ مَا يَفْنَاشْ، مِنْ كِلْمِةْ اللهْ الحَيَّة وِالدَّايْمَة. ‏24 رَاهُو

كُلْ بَشَرْ كِيفْ الحْشِيشْ.

وِالمَجْدْ مْتَاعُو الكُلُّو كِنُوَّارْ الحْشِيشْ.

الحْشِيشْ يِيبِسْ وِالنُّوَّارْ يْطِيحْ،

‏25 آمَا كِلْمِةْ الرَّبْ ادُّومْ لِلأَبَدْ.

الكِلْمَة هَاذِي هِيَ الِّي تْبَشِّرْتُوا بِيهَا.