الرِّسَالَة لِلْعِبْرَانِيِّينْ 13

‏1 خَلِّي المْحَبَّة الِّي بِينْ الإِخْوَة تْكُونْ دَايْمَة ‏2 وْمَا تَنْسَاوْشْ بَاشْ تْرَحّْبُوا بِالبْرَايْنِيَّة، رَاهُو بِالشَّيْء هَاذَا ثَمَّة شْكُونْ الِّي ضَيّْفُوا مْلاَيْكَة مِنْ غِيرْ مَا يَعْرْفُوا. ‏3 اذَّكّْرُوا الِّي مَرْبُوطِينْ فِي الحَبْسْ كَإِنّْكُمْ فِي الحَبْسْ مْعَاهُمْ، وِلِّي هُومَا قَاعْدِينْ يِتْهَانُوا فِي بْدُونَاتْهُمْ كَإِنّْكُمْ قَاعْدِينْ تِتْهَانُوا مْعَاهُمْ فِي بْدُونَاتْكُمْ. ‏4 خَلِّي النَّاسْ الكُلْهُمْ يِحْتَرْمُوا العِرْسْ، وْخَلِّي الفَرْشْ مْتَاعْ العِرْسْ يْكُونْ طَاهِرْ، رَاهُو اللهْ بَاشْ يُحْكُمْ عْلَى الفَاسْدِينْ وِلِّي يَزْنُوا. ‏5 خَلِّي سِيرِتْكُمْ تْكُونْ طَاهْرَة مِنْ مْحَبِّةْ الفْلُوسْ. اقْتَنْعُوا بِلِّي عِنْدْكُمْ. رَاهُو اللهْ قَالْ: «عُمْرِي مَا نْهَمّْلِكْ وْلاَ نْخَلِّيكْ.» ‏6 وِانَّجْمُوا نْقُولُوا وْإِحْنَا وَاثْقِينْ:

الرَّبْ يْعَاوِنِّي

مَا نْخَافِشْ.

شْنُوَّة البَشَرْ بَاشْ يَعْمِلِّي؟

‏7 اذَّكّْرُوا القَادَة مْتَاعْكُمْ الِّي حْكَاوْلْكُمْ عْلَى كِلْمِةْ اللهْ. أُخْزْرُوا لِنْهَايِةْ سِيرِتْهُمْ وْتَبّْعُوهُمْ فِي الإِيمَانْ. ‏8 يَسُوعْ المَسِيحْ هُوَ بِيدُو آمِسْ وِاليُومْ وْلِلأَبَدْ. ‏9 مَا اتَّبْعُوشْ أَيْ تَعْلِيمْ غْرِيبْ وْكِيفْ مَا جَا، رَاهُو بَاهِي إِذَا كَانْ القَلْبْ يِتْقَوَّى بِالنِّعْمَة، مُوشْ بُمَّاكِلْ مْتَاعْ عِبَادَاتْ مَا نَفْعِتْشْ الِّي تَبّْعُوهَا. ‏10 عِنْدْنَا مَذْبَحْ الِّي كَانُوا يِخْدْمُوا فِي الخِيمَة مَا عِنْدْهُمْشْ الحَقْ بَاشْ يَاكْلُوا مِنُّو. ‏11 رَاهُمْ الحَيَوَانَاتْ الِّي دَمّْهُمْ يْجِيبُو أَعْلَى وَاحِدْ فِي رُؤَسَاءْ الكُهَّانْ لْقُدْسْ الأَقْدَاسْ عْلَى خَاطِرْ الذْنُوبْ يِتْحَرْقُوا البَرَّة مِالمْدِينَة. ‏12 وْهَكَّا يَسُوعْ زَادَا، تْعَذِّبْ لْبَرَّة مِالبِيبَانْ مْتَاعْ المْدِينَة، بَاشْ يْقَدِّسْ النَّاسْ بْدَمُّو هُوَ. ‏13 إِمَّالاَ خَلِّينَا نُخْرْجُولُو لْبَرَّا مِالمْدِينَة وِنْهِزُّوا العْذَابْ وِالعَارْ الِّي هَزُّو هُوَ. ‏14 رَانَا مَا عِنْدْنَاشْ مْدِينَة دَايْمَة لِهْنَا، آمَا رَانَا نلَوّْجُوا عْلَى المْدِينَة الِّي بَاشْ تْجِي فِي المُسْتَقْبِلْ. ‏15 خَلِّينَا دِيمَا نْقَدّْمُوا لْرَبِّي ذْبِيحَة مْتَاعْ تَسْبِيحْ عْلَى طْرِيقْ يَسُوعْ، الِّي هِيَ الغَلَّة الِّي تُخْرُجْ مِالفُمْ الِّي يِعْتَرِفْ بْإِسْمُو. ‏16 مَا تَنْسَاوْشْ بَاشْ تَعْمْلُوا الخِيرْ وْتِتْشَارْكُوا فِي الحَاجَاتْ الِّي عِنْدْكُمْ، رَاهِي الذْبَايِحْ الِّي كِيفْ هَكَّا تْرَضِّي اللهْ.

‏17 طِيعُوا القَادَة مْتَاعْكُمْ وْأَسْمْعُوا كْلاَمْهُمْ، رَاهُمْ حَارْصِينْ عْلَى رْوَاحْكُمْ كَإِنّْهُمْ بَاشْ يِتْحَاسْبُوا عْلِيهَا، بَاشْ يَعْمْلُوا الشَّيْء هَاذَا وْهُومَا فَرْحَانِينْ، مُوشْ وْهُومَا حْزَانَى مَا كَانِشْ رَاكُمْ مَا تِسْتْفَادُوشْ.

‏18 صَلِّيوْلْنَا، رَانَا مِتْأَكّْدِينْ الِّي أَحْنَا عِنْدْنَا ضَمِيرْ، نْحِبُّوا نِتْصَرّْفُوا بِالقْدَا فِي كُلْ شَيْء. ‏19 نْأَكِّدْ عْلِيكُمْ أَكْثِرْ مَا يُمْكِنْ بَاشْ تْصَلِّيو إِنِّي نَرْجْعِلْكُمْ فِيسَعْ.

صْلاَةْ فِي الإِخِّرْ

‏20 تَوَّا نْصَلِّي لْإِلاَهْ السَّلاَمْ الِّي رَجَّعْ مَرَّة أُخْرَى رَبّْنَا يَسُوعْ مِنْ بِينْ المُوتَى، الِّي هُوَ الرَّاعِي العْظِيمْ مْتَاعْ الغْنَمْ، بْدَمْ العَهْدْ الِّي يَبْقَى لِلأَبَدْ، ‏21 بَاشْ يَعْطِيكُمْ كُلْ شَيْء بَاهِي بَاشْ تْنَجّْمُوا تَعْمْلُوا إِرَادْتُو؛ وْهُوَ قَاعِدْ يَعْمِلْ فِينَا فِي الشَّيْء الِّي يْرَضِّيهْ عْلَى طْرِيقْ يَسُوعْ المَسِيحْ لِيهْ المَجْدْ لِلأَبَدْ. آمِينْ.

الكِلْمَة الإِخْرَانِيَّة

‏22 نُطْلُبْ مِنْكُمْ، يَا خْوَاتِي، إِنّْكُمْ تِتْحَمّْلُوا جْوَابِي الِّي شَجَّعْتْكُمْ بِيهْ، رَانِي كْتِبْتْهُولْكُمْ بْإِخْتِصَارْ. ‏23 نْخَبِّرْكُمْ الِّي خُونَا تِيمُوثَاوُسْ خْرَجْ مِالحَبْسْ. تَوْ نْجِيكُمْ آنَا وْيَاهْ إِذَا كَانْ يْجِي عْلَى قْرِيبْ.

‏24 سَلّْمُوا عْلَى القَادَة مْتَاعْكُمْ الكُلْهُمْ وِعْلَى المُؤْمْنِينْ الكُلْهُمْ. يْسَلْمُوا عْلِيكُمْ الإِخْوَة الِّي جَاوْ مِنْ إِيطَالْيَا.

‏25 النِّعْمَة مْعَاكُمْ الكُلْكُمْ. آمِينْ.