الرِّسَالَة لِلْعِبْرَانِيِّينْ 5

‏1 رَاهُو كُلْ أَعْلَى وَاحِدْ فِي رُؤَسَاءْ الكُهَّانْ يِخْتَارُوهْ مِنْ بِينْ النَّاسْ ويِتْحَطْ عْلَى خَاطِرْ النَّاسْ فِي الخِدْمَة مْتَاعْ اللهْ، بَاشْ يْقَدِّمْ القَرَابِينْ وِالذْبَايِحْ بَاشْ يْكَفِّرْ عْلَى الذْنُوبْ. ‏2 قَادِرْ بَاشْ يْحِنْ عْلَى الجُهَّالْ وِالضَّالِّينْ، عْلَى خَاطْرُو هُوَ بِيدُو ضْعِيفْ، ‏3 وْكَانْ لاَزْمُو يْقَدِّمْ كَفَّارَة عْلَى ذْنُوبُو كِيفْ مَا يْقَدِّمْ كَفَّارَة عْلَى ذْنُوبْ الشَّعْبْ. ‏4 وْحَتَّى وَاحِدْ مَا يْشِدْ بْلاَصِةْ رَئِيسْ الكُهَّانْ، إِلاَّ إِذَا كَانْ اللهْ دْعَاهْ كِيفْ مَا دْعَى هَارُونْ.

‏5 وِالمَسِيحْ زَادَا مَا حَطِّشْ رُوحُو فِي البْلاَصَة مْتَاعْ أَعْلَى وَاحِدْ فِي رُؤَسَاءْ الكُهَّانْ، آمَا اللهْ هُوَ الِّي قَالُّو: «إِنْتِ ابْنِي وْآنَا اليُومْ جِبْتِكْ.» ‏6 وْقَالُّو فِي بْلاَصَة أُخْرَى فِي الكْتَابْ المُقَدَّسْ: «إِنْتِ كَاهِنْ لِلأَبَدْ مِنْ فِرْقِةْ مَلْكِيصَادِقْ.» ‏7 وْهُوَ الِّي وَقْتِلِّي كَانْ بَشَرْ صَلَّى وِتْشَحِّتْ رَبِّي الِّي قَادِرْ بَاشْ يْخَلّْصُو مِالمُوتْ وْهُوَ يْصِيحْ بِالقْوِي وْيِبْكِي، يَاخِي سْمَعْلُو عْلَى خَاطْرُو مُتَّقِي. ‏8 وْرَغْمِلِّي هُوَ الإِبْنْ تْعَلِّمْ الطَّاعَة بِالوْجَايِعْ الِّي عَانَاهَا. ‏9 وْوَقْتِلِّي وْصُلْ لِلكَمَالْ وَلَّى سْبَبْ فِي إِنُّو الِّي يْطِيعُوهْ الكُلْهُمْ يُخْلْصُوا لِلأَبَدْ، ‏10 وِالله سَمَّاهْ أَعْلَى وَاحِدْ فِي رُؤَسَاءْ الكُهَّانْ فِي الفِرْقَة مْتَاعْ مَلْكِيصَادِقْ.

الإِرْتِدَادْ عْلَى الإِيمَانْ

‏11 وْعَنْدْنَا بَرْشَة كْلاَمْ انَّجّْمُوا نْقُولُوهْ عْلَى الرَّاجِلْ هَاذَا، آمَا صْعِيبْ بَاشْ نْفَسّْرُوهْ عْلَى خَاطِرْكُمْ تِفْهْمُوا بِصْعُوبَة، ‏12 وْكَانْ لاَزِمْكُمْ تَوَّا تْوَلِّيوْا مُعَلّْمِينْ، آمَا إِنْتُومَا مَازِلْتُوا مِحْتَاجِينْ لِشْكُونْ يْعَلِّمْكُمْ الحَاجَاتْ الأُولَى مْتَاعْ كِلْمِةْ اللهْ. إِنْتُومَا مِحْتَاجِينْ لِلحْلِيبْ، مُوشْ لْمَاكْلَة قْوِيَّة. ‏13 وِلِّي يُشْرُبْ الحْلِيبْ آكَاهُو رَاهُو طْفُلْ صْغِيرْ مَا عِنْدُوشْ خِبْرَة فِي الكْلاَمْ مْتَاعْ البِرْ. ‏14 آمَا المَاكْلَة القْوِيَّة، رَاهِي لِلكْبَارْ الِّي إِحْسَاسْهُمْ مْدَرِّبْ عْلَى إِنُّو يْفَرِّقْ مَا بِينْ الخِيرْ وِالشَّرْ.