رِسَالِةْ بُولِسْ الأُولَى لِتْسَالُونِيكِي 5

حَضّْرُوا رْوَاحْكُمْ لْجَيَّانْ الرَّبْ

‏1 آمَا الأَوْقَاتْ وِالمْوَاعِيدْ، يَا الإِخْوَة، رَاكُمْ مَا كُمْشْ مِحْتَاجِينْ بَاشْ يِتْكْتِبِّلْكُمْ عْلِيهُمْ، ‏2 رَاكُمْ تَعْرْفُوا بِالقْدَا إِنُّو يُومْ الرَّبْ يْجِي عْلَى غَفْلَة كِيفْ مَا يْجِي السَّارِقْ فِي اللِّيلْ. ‏3 وْوَقْتِلِّي يْقُولُوا النَّاسْ: «عِنْدْنَا سَلاَمْ وْأَمَانْ»، يْجِيهُمْ الهْلاَكْ عْلَى غَفْلَة كِيفْ مَا تْجِي وْجَايِعْ الوْلاَدَة لِلمْرَا الحِبْلَى، وْمَا يْنَجّْمُوشْ يِمْنْعُوا. ‏4 آمَا إِنْتُومَا، يَا الإِخْوَة، مَا كُمْشْ عَايْشِينْ فِي الظْلاَمْ حَتَّى لِينْ يْجِيكُمْ النْهَارْ هَاذَاكَا عْلَى غَفْلَة كِيفْ السَّارِقْ، ‏5 إِنْتُومَا الكُلْكُمْ وْلاَدْ النُّورْ وِوْلاَدْ النْهَارْ. وْإِحْنَا رَانَا لاَنَا مِاللِّيلْ وْلاَنَا مِالظْلاَمْ. ‏6 إِمَّالاَ مَا نُرْقْدُوشْ كِيفْ مَا يَعْمْلُوا النَّاسْ، آمَا يِلْزِمْنَا نَسْهْرُوا وِنْبَاتُوا فَايْقِينْ. ‏7 رَاهُمْ الرَّاقْدِينْ يُرْقْدُوا فِي اللِّيلْ، وِالسْكَارَى يِسْكْرُوا فِي اللِّيلْ. ‏8 آمَا أَحْنَا وْلاَدْ النْهَارْ خَلِّينَا نْكُونُوا فَايْقِينْ، لاَبْسِينْ دِرْعْ يِحْمِي سْدُورَاتْنَا هُوَ الإِيمَانْ وِالمْحَبَّة وْكَاسْكَا هِيَ الأَمَلْ مْتَاعْ الخَلاَصْ، ‏9 رَاهُو اللهْ مَا خْتَارْنَاشْ بَاشْ يَغْضِبْ عْلِينَا، آمَا بَاشْ نَاخْذُوا خَلاَصُو بْرَبْنَا يَسُوعْ المَسِيحْ. ‏10 الِّي مَاتْ عْلَى خَاطِرْنَا بَاشْ الكُلْنَا نَحْيَاوْ مْعَاهْ، إِذَا كُنَّا فَايْقِينْ فِي اليَقْظَة مْتَاعْ الحَيَاةْ وِلاَّ فِي غَفْوِةْ المُوتْ. ‏11 إِمَّالاَ شَجّْعُوا بْعَضْكُمْ وْعَاوْنُوا بْعَضْكُمْ كِيفْ مَا تَعْمْلُوا تَوَّا.

دُعَاءْ وْسَلاَمْ

‏12 وْنُطْلُبْ مِنْكُمْ، يَا الإِخْوَة، بَاشْ تِكْرْمُوا الِّي يِتْعْبُوا مَا بِينَاتْكُمْ وْيَرْعَاوْ فِيكُمْ فِي الرَّبْ وْيِرْشْدُوا فِيكُمْ، ‏13 وْإِنّْكُمْ تْعَامْلُوهُمْ ابَّرْشَة إِحْتِرَامْ وِمْحَبَّة عْلَى خَاطِرْ الخِدْمَة مْتَاعْهُمْ. عِيشُوا مْعَ بْعَضْكُمْ فِي سَلاَمْ. ‏14 وِنْأَكِّدْ عْلِيكُمْ، يَا الإِخْوَة، إِنّْكُمْ تْنَبّْهُوا عْلَى البُخْلِينْ وِتْشَجّْعُوا الِّي فَاشْلِينْ وِتْعَاوْنُوا الضْعَافْ وْتُصْبْرُوا عْلَى النَّاسْ الكُلْ. ‏15 رُدُّوا بَالْكُمْ لاَ تْكَافُوا وَاحِدْ عْلَى الشَّرْ بِالشَّرْ، آمَا دِيمَا أَعْمْلُوا الخِيرْ، مْعَ بْعَضْكُمْ وِمْعَ النَّاسْ الكُلْ.

‏16 أَفْرْحُوا دِيمَا ‏17 دَاوْمُوا عْلَى الصَّلاَةْ، ‏18 إِحْمْدُوا اللهْ عْلَى كُلْ شَيْء، رَاهِي هَاذِي هِيَ إِرَادِةْ اللهْ لِيكُمْ فِي المَسِيحْ يَسُوعْ. ‏19 وْمَا تِطْفُوشْ الرُّوحْ، ‏20 مَا تَحْقْرُوشْ النُّبُوءَاتْ، ‏21 آمَا جَرّْبُوا كُلْ شَيْء وْشِدُّوا صْحِيحْ فِي البَاهِي، ‏22 وْإِبْعْدُوا عْلَى الشَّرْ الكُلُّو.

‏23 وْإِلاَهْ السَّلاَمْ بِيدُو يْقَدِّسْكُمْ فِي كُلْ شَيْء. وْنِتْمَنَّاوْ انُّو رُوحْكُمْ وْنَفْسْكُمْ وِبْدَنْكُمْ يْكُونُوا مَحْفُوظِينْ بِالكَامِلْ وْمَا عْلِيكُمْشْ لُومْ، وَقْتِلِّي يْجِي رَبّْنَا يَسُوعْ المَسِيحْ. ‏24 رَاهُو الِّي دْعَاكُمْ صَادِقْ وْيُوفِي بْوَعْدُو.

‏25 يَا الإِخْوَة، صَلِّيوْ مِنْ أَجْلْنَا. ‏26 سَلّْمُوا عْلَى الإِخْوَة الكُلْهُمْ ابُّوسَة مُقَدّْسَة. ‏27 نِتْرَجَّاكُمْ بِالرَّبْ إِنّْكُمْ تَقْرَاوْ الجْوَابْ هَاذَا عْلَى الإِخْوَة الكُلْهُمْ.

‏28 إِنْ شَاءْ اللهْ نِعْمِةْ رَبّْنَا يَسُوعْ المَسِيحْ تْكُونْ مْعَاكُمْ.