رِسَالِةْ بُولُسْ الثَّانْيَة لْكُورِنْثُوسْ 10

بُولُسْ يْدَافِعْ عْلَى رُوحُو

‏1 آنَا بُولُسْ نُطْلُبْ مِنْكُمْ بِالتَّوَاضُعْ مْتَاعْ المَسِيحْ وْلُطْفُو، آنَا الِّي مِتْوَاضَعْ كِنِبْدَا مْعَاكُمْ وِقْوِي كِنِبْدَا بْعِيدْ عْلِيكُمْ، ‏2 نِتْمَنَّى إِنّْكُمْ مَا تْلِزُّونِيشْ بَاشْ نْكُونْ صْعِيبْ وَقْتِلِّي نِبْدَا مْعَاكُمْ وْمَاذَا بِيَّ نْكُونْ مْعَ النَّاسْ الِّي يْخَمَمُوا الِّي أَحْنَا نْوَرِّيوْ فِي رْوَاحْنَا قُدَّامْ النَّاسْ. ‏3 صْحِيحْ، أَحْنَا نْعِيشُوا فِي البْدَنْ، آمَا مَا نْجَاهْدُوشْ الجِهَادْ مْتَاعْ النَّاسْ الِّي فِي الدِّنْيَا هَاذِي. ‏4 السْلاَحْ الِّي نْجَاهْدُوا بِيهْ مُوشْ مِالدِّنْيَا هَاذِي آمَا رَاهُو مِنْ عِنْدْ اللهْ وْقَادِرْ بَاشْ يْهَدِّمْ أَسْوَارْ ‏5 وْكُلْ حَاجَة مِتْكَبّْرَة تْجِي ضِدْ مَعْرِفْةْ اللهْ، وْنَرْبْطُوا كُلْ فِكْرْ وِنْخَلِّيوْهْ يْطِيعْ المَسِيحْ. ‏6 وْإِحْنَا مُسْتْعَدِّينْ بَاشْ نْعَاقْبُوا عْلَى كُلْ مَعْصْيَة بَعْدْ مَا الطَّاعَة مْتَاعْكُمْ تْوَلِّي كَامْلَة.

‏7 أُخْزْرُوا لِلحَاجَاتْ كِيفْ مَا هِيَ. إِذَا كَانْ وَاحِدْ مْشَى فِي بَالُو الِّي هُوَ تَابِعْ لِلمَسِيحْ، خَلِّيهْ يِتْذَكِّرْ الِّي أَحْنَا زَادَا تَابْعِينْ لِلمَسِيحْ كِيفُو. ‏8 وْآنَا مَا نِحْشِمْشْ حَتَّى إِذَا كَانْ كَثِّرْتْ مِالفُخْرَة بِالسُّلْطَة الِّي عِنْدْنَا فِي المَسِيحْ وِلِّي نِسْتَعْمْلُوا فِيهَا بَاشْ نِبْنِيوْكُمْ مُوشْ بَاشْ نْطَيّْحُوكُمْ. ‏9 مَا نْحِبِّشْ نُظْهُرْ الِّي آنَا نْحَاوِلْ نْخَوِّفْكُمْ بِجْوَابَاتِي. ‏10 وْثَمَّة شْكُونْ مِنْكُمْ يْقُولْ: «جْوَابَاتْ بُولُسْ قْوِيَّة وِتْخَوِّفْ، آمَا وَقْتِلِّي يْجِي بِيدُو رَاهُو ضْعِيفْ وِكْلاَمُو فَارِغْ.» ‏11 خَلِّيهْ يَعْرِفْ الِّي يْقُولْ فِي الكْلاَمْ هَاذَا الِّي الشَّيْء الِّي نِكْتْبُوهْ فِي جْوَابَاتْنَا وْإِحْنَا غَايْبِينْ هُوَ بِيدُو الِّي نَعْمْلُوهْ وَقْتِلِّي الِّي نْكُونُوا حَاضْرِينْ.

‏12 أَحْنَا مَا انَّجّْمُوشْ نْشَبّْهُوا رْوَاحْنَا بِلِّي يُشْكْرُوا فِي رْوَاحْهُمْ وِلاَّ نْحُطُّوا رْوَاحْنَا كِيفْهُمْ، قَدَّاشْهُمْ مَا عِنْدْهُمْشْ عْقَلْ! يْقِيسُوا فِي رْوَاحْهُمْ بِرْوَاحْهُمْ وْيُحْكْمُوا عْلَى رْوَاحْهُمْ بِيدِيهُمْ. ‏13 آمَا أَحْنَا، رَانَا مَا نِتْفُوخْرُوشْ بْحَاجَاتْ مَا عْمَلْنَاهَاشْ، آمَا رَانَا نَاقْفُوا فِي الحَدْ الِّي حَطّْهُولْنَا اللهْ بَاشْ نُوصْلُولْكُمْ بِيهْ. ‏14 وْإِحْنَا مَا نِدَّعِيوْشْ حَاجَاتْ مَا هِيشْ مْتَاعْنَا، كَإِنَّا مَا وْصُلْنَاشْ لِيكُمْ، عْلَى خَاطِرْنَا أَحْنَا بِالحَقْ وْصُلْنَالْكُمْ وِمْعَانَا إِنْجِيلْ المَسِيحْ. ‏15 وْمَا نْفُوتُوشْ الحَدْ هَاذَاكَا وْنِتْفُوخْرُوا بِالخِدْمَة مْتَاعْ غِيرْنَا، آمَا عِنْدْنَا أَمَلْ إِنُّو إِيمَانْكُمْ يِكْبِرْ وْخِدْمِتْنَا فِي وُسْطْكُمْ تْزِيدْ فِي الحَدْ الِّي حَطْهُولْنَا اللهْ، ‏16 بَاشْ نْبَشّْرُوا بِالإِنْجِيلْ فِي بْلاَدْ أَبْعِدْ مِنْ بْلاَدْكُمْ، بَاشْ مَا نِتْفُوخْرُوشْ بِالشَّيْء الِّي عَمْلُو غِيرْنَا فِي خِدْمْتُو. ‏17 وِالكْتَابْ المُقَدَّسْ يْقُولْ: «الِّي يِتْفُوخِرْ، خَلِّيهْ يِتْفُوخِرْ بِالرَّبْ» ‏18 عْلَى خَاطِرْ الِّي يُشْكْرُو الرَّبْ هُوَ المَقْبُولْ، مُوشْ الِّي يُشْكُرْ رُوحُو.