رِسَالِةْ بُولِسْ الأُولَى لْكُورِنْثُوسْ 6

شَكْيَانْ الإِخْوَة بِبْعَضْهُمْ

‏1 وَقْتِلِّي وَاحِدْ عَنْدُو مُشْكْلَة مْعَ وَاحِدْ مِنْ خْوَاتُو المُؤْمْنِينْ، كِيفَاشْ يِمْشِي يِشْكِي بِيهْ لِلقُضَاةْ الِّي مَا هُمْشْ مُؤْمْنِينْ، وْمَا يِشْكِيشْ بِيهْ لِلإِخْوَة المُؤْمْنِينْ؟ ‏2 يَاخِي مَا تَعْرْفُوشْ الِّي المُؤْمْنِينْ بَاشْ يُحْكْمُوا عْلَى العَالَمْ؟ إِذَا كَانْ إِنْتُومَا بَاشْ تُحْكْمُوا عْلَى العَالَمْ، يَاخِي مَا كُمْشْ بَاشْ تْنَجّْمُوا تُحْكْمُوا فِي القَضَايَا الصْغِيرَة؟ ‏3 يَاخِي مَا تَعْرْفُوشْ الِّي أَحْنَا بَاشْ نُحْكْمُوا عْلَى المْلاَيْكَة؟ فَمَبَالِكْ الحَاجَاتْ مْتَاعْ الدِّنْيَا هَاذِي. ‏4 وْإِذَا كَانْ وُقْعِتْ مَشَاكِلْ بِينَاتْكُمْ فِي الحَاجَاتْ هَاذِي، يَاخِي تْحُطُّوا نَاسْ مَا عِنْدْهُمْشْ قِيمَة فِي الكَنِيسَة بَاشْ يُحْكْمُوا. ‏5 وِنْقُولْ الحَاجَة هَاذِي بَاشْ نْحَشِّمْكُمْ. يَاخِي مَا فِيكُمْشْ حَتَّى وَاحِدْ حَكِيمْ يْنَجِّمْ يُحْكُمْ بِينْ خْوَاتُو، ‏6 آمَا رَاهُو الخُو يِشْكِي بْخُوهْ، لْنَاسْ مَا هُمْشْ مُؤْمْنِينْ! ‏7 إِنْتُومَا تِشْكُوا بِبْعَضْكُمْ، وْهَاذَا عِيبْ! يَاخِي مُوشْ خِيرِلْكُمْ كِتَحْمْلُوا الظُّلْمْ؟ مُوشْ خِيرِلْكُمْ كِتِقْبْلُوا إِنّْهُمْ يِسْلْبُوكُمْ؟ ‏8 وْبِالعَكْسْ إِنْتُومَا هُومَا الِّي تُظْلْمُوا وْتِسْلْبُوا حَتَّى فِي خْوَاتْكُمْ! ‏9 يَاخِي مَا تَعْرْفُوشْ الِّي الظَّالْمِينْ مَا يُورْثُوشْ مَمْلِكْةْ اللهْ؟ مَا تُغْلْطُوشْ، لاَ فِسَّادْ وْلاَ الِّي يِعْبْدُوا فِي الصْنَبْ وْلاَ الِّي يَزْنُوا وْلاَ الرْجَالْ الِّي يْقَلّْدُوا فِي النْسَاء وْلاَ الرْجَالْ الِّي يُرْقْدُوا مْعَ الرْجَالْ، ‏10 وْلاَ سُرَّاقْ وْلاَ طَمَّاعِينْ وْلاَ الِّي يِسْكْرُوا وْلاَ الِّي يْسِبُّوا وْلاَ الِّي يَخْطْفُوا يُورْثُوا مَمْلِكْةْ اللهْ. ‏11 ثَمَّة شْكُونْ مِنْكُمْ كَانُوا فِي الحَالَة هَاذِيكَا، آمَا رَاكُمْ تِغْسِلْتُوا، وِتْقَدِّسْتُوا، وْوَلِّيتُوا أَبْرَارْ بْإِسْمْ الرَّبْ يَسُوعْ المَسِيحْ وِبْرُوحْ إِلاَهْنَا.

خَلِّي بْدُونَاتْكُمْ تْكُونْ لْمَجْدْ اللهْ

‏12 «كُلْ شَيْء يْحِلْ لِيَّا»، آمَا مُوشْ كُلْ شَيْء يِنْفَعْ. «كُلْ شَيْء يْحِلْ لِيَّا»، آمَا مَا نِيشْ بَاشْ نْخَلِّي حَتَّى حَاجَة تِتْحَكِّمْ فِيَّ ‏13 المَاكْلَة لِلكِرْشْ، وِالكِرْشْ مَجْعُولَة لِلمَاكْلَة، وِالله بَاشْ يِقْضِي عْلِيهُمْ الإِثْنِينْ. آمَا البْدَنْ رَاهُو مُوشْ لِلزْنَى، رَاهُو لِلرَّبْ وِالرَّبْ لِلبْدَنْ. ‏14 وِالله الِّي قَيِّمْ الرَّبْ مِنْ بِينْ المُوتَى بَاشْ يْقَيِّمْنَا أَحْنَا زَادَا بْقُدْرْتُو. ‏15 مَا تَعْرْفُوشْ الِّي بْدُونَاتْكُمْ هِيَ أَعْضَاءْ المَسِيحْ؟ يَاخِي نَاخُذْ الأَعْضَاءْ مْتَاعْ المَسِيحْ وِنْرُدّْهَا أَعْضَاءْ مْتَاعْ مْرَا زَانْيَة؟ حَاشَا! ‏16 وِلاَّ مَا تَعْرْفُوشْ إِنُّو الِّي يِتْرْبَطْ بِمْرَا زَانْيَة يْوَلِّي هُوَ وْيَاهَا بْدَنْ وَاحِدْ؟ عْلَى خَاطِرْ الكْتَابْ المُقَدَّسْ يْقُولْ: «الإِثْنِينْ يْوَلِّيوْ بْدَنْ وَاحِدْ.» ‏17 وْآمَا الِّي يِتْرْبَطْ بِالرَّبْ رَاهُو يْوَلِّي هُوَ وْيَاهْ رُوحْ وَاحِدْ. ‏18 أُهْرْبُوا مِالزْنَا، كُلْ ذَنْبْ يَعْمْلُو الإِنْسَانْ مَا يْأَثِّرْشْ عْلَى بَدْنُو. آمَا الزَّانِي رَاهُو يْضُرْ بَدْنُو. ‏19 يَاخِي مَا تَعْرْفُوشْ الِّي بْدُونَاتْكُمْ هِيَ هَيْكِلْ الرُّوحْ القُدُسْ الِّي فِيكُمْ وِلِّي خْذِيتُوهْ مِنْ عِنْدْ اللهْ؟ إِنْتُومَا مَا كُمْشْ مِلْكْ لِرْوَاحْكُمْ، آمَا رَاكُمْ مِلْكْ للهْ. ‏20 وْإِنْتُومَا تِشْرِيتُوا وْتِدْفَعْ فِيكُمْ سُومْ. إِمَّالاَ مَجّْدُوا اللهْ فِي بْدُونَاتْكُمْ.