رِسَالِةْ بُولِسْ الأُولَى لْكُورِنْثُوسْ 4

رُسُلْ المَسِيحْ

‏1 خَلِّي النَّاسْ يِحْسْبُونَا خُدَّامْ المَسِيحْ وِالله وَكِّلْنَا عْلَى أَسْرَارُو. ‏2 وِالشَّيْء المَطْلُوبْ مِلِّي وَكِّلْهُمْ اللهْ إِنُّو كُلْ وَاحِدْ فِيهُمْ يْكُونْ ثِيقَة. ‏3 آمَا آنَا رَانِي مَا يْهِمّْنِيشْ بَرْشَة كِتُحْكْمُوا عْلِيَّ إِنْتُومَا وِلاَّ أَيْ بَشَرْ، وْحَتَّى آنَا مَا نُحْكُمْشْ عْلَى رُوحِي. ‏4 وْضَمِيرِي مَا يْأَنِّبْنِيشْ عْلَى حَتَّى شَيْء، وِالشَّيْء هَاذَا مَا يْبَرِّرْنِيشْ، آمَا الِّي يُحْكُمْ عْلِيَّ هُوَ اللهْ. ‏5 إِمَّالاَ مَا تُحْكْمُوشْ عْلَى حَتَّى شَيْء قْبَلْ الوَقْتْ، حَتَّى لِينْ يْجِي الرَّبْ الِّي بَاشْ يْظَهِّرْ الِّي مْخُبِّي فِي الظْلاَمْ وْيِكْشِفْ نِيَّاتْ القْلُوبْ، وْكُلْ وَاحِدْ يَاخُذْ مِنْ عِنْدْ اللهْ الأَجْرْ الِّي يِسْتْحَقُّو.

‏6 يَا خْوَاتِي، آنَا حْكِيتِلْكُمْ قْبَلْ عْلَى رُوحِي وِعْلَى أَبُلُّوسْ كِيفْ مِثَالْ تِتْعَلّْمُوا مِنَّا «إِنّْكُمْ مَا تُخْرْجُوشْ عَلِّي مَكْتُوبْ فِي الكْتَابْ المُقَدَّسْ.» بَاشْ مَا تِتْفُوخْرُوشْ عْلَى بْعَضْكُمْ. ‏7 شْكُونُو الِّي رَدِّكْ خِيرْ مِنْ غِيرِكْ؟ وِشْنُوَّة الشَّيْء الِّي تِمْلْكُو وْمَا خْذِيتُوشْ مِنْ عِنْدْ اللهْ؟ وْإِذَا كَانْ خْذِيتُو، عْلاَشْ تِتْفُوخِرْ كَإِنِّكْ مَا خْذِيتُوشْ؟ ‏8 رَاكُمْ شْبَعْتُوا وْتِغْنِيتُوا! وَلِّيتُوا مُلُوكْ بْلاَشْ بِينَا! وْيَا لِيتْكُمْ كُنْتُوا بِالحَقْ مُلُوكْ عْلَى الأَقَلْ نْشَارْكُوا مْعَاكُمْ فِي المُلْكْ! ‏9 وْآنَا نْشُوفْ الِّي اللهْ حَطّْنَا أَحْنَا الرُّسُلْ فِي الإِخِّرْ كَإِنُّو مَحْكُومْ عْلِينَا بِالمُوتْ، عْلَى خَاطِرْنَا وَلِّينَا فُرْجَة لِلعَالَمْ، لِلمْلاَيْكَة وِالنَّاسْ. ‏10 أَحْنَا جُهَّالْ عْلَى خَاطِرْ المَسِيحْ وْإِنْتُومَا حُكَمَاءْ فِي المَسِيحْ. أَحْنَا ضْعَافْ وْإِنْتُومَا قْوِيِّينْ. إِنْتُومَا بِقْدَرْكُمْ وْإِحْنَا مَحْقُورِينْ. ‏11 وْإِحْنَا مَازِلْنَا لْتَوَّا نْجُوعُوا وْنَعْطْشُوا وْمَا عِنْدْنَاشْ لِبْسَة وْنِتْضَرْبُوا وْمَا عِنْدْنَاشْ وِينْ نُسْكْنُوا، ‏12 وْنِتْعْبُوا فِي خِدْمِةْ يْدِينَا. نْبَارْكُوا النَّاسْ الِّي يْسِبُّونَا، وْنِتْحَمّْلُوا وَقْتِلِّي يِضْطَهْدُونَا، ‏13 وْنَعْمْلُوا البَاهِي وَقْتِلِّي يِتْبَلُّوا عْلِينَا. وَلِّينَا كِيفْ الفَضْلَة وِالوْسَخْ مْتَاعْ العَالَمْ.

‏14 آنَا مَا نِيشْ نِكْتْبِلْكُمْ فِي الشَّيْء هَاذَا بَاشْ نْحَشِّمْكُمْ، آمَا بَاشْ نَنْصَحْكُمْ كِوْلاَدِي الِّي نْحِبّْهُمْ. ‏15 يْنَجِّمْ يْكُونْ عِنْدْكُمْ آلاَفْ مْتَاعْ مُعَلّْمِينْ فِي المَسِيحْ، آمَا مَا عِنْدْكُمْشْ بَرْشَة أُبَّيَّانْ، عْلَى خَاطِرْنِي آنَا وْلِدْتْكُمْ فِي المَسِيحْ يَسُوعْ بِالإِنْجِيلْ الِّي بَشِّرْتْكُمْ بِيهْ. ‏16 إِمَّالاَ نُطْلُبْ مِنْكُمْ بَاشْ تَعْمْلُوا كِيفِي. ‏17 وْبِسْبَبْ الشَّيْء هَاذَا بِيدُو بْعَثْتِلْكُمْ تِيمُوثَاوُسْ، وِلْدِي حْبِيبِي الأَمِينْ فِي الرَّبْ، وْهُوَ بَاشْ يْذَكِّرْكُمْ بْسِيرْتِي فِي المَسِيحْ يَسُوعْ، كِيفْ مَا آنَا نْعَلِّمْ فِيهَا فِي كُلْ بْلاَصَة لِلكَنَايِسْ الكُلْ. ‏18 ثَمَّة شْكُونْ مِنْكُمْ مْشَى فِي بَالْهُمْ الِّي آنَا مَا نِيشْ بَاشْ نْجِيكُمْ يَاخِي وَلاَّوْ مِتْكَبّْرِينْ، ‏19 آمَا رَانِي إِنْ شَاءْ اللهْ بَاشْ نْجِيكُمْ عْلَى قْرِيبْ، بَاشْ نَعْرِفْ النَّاسْ المِتْكَبّْرِينْ هَاذُومَا آشْ يْنَجّْمُوا يَعْمْلُوا، مُوشْ كْلاَمْهُمْ آكَاهُو. ‏20 وْمَمْلِكْةْ اللهْ مُوشْ بِالكْلاَمْ آكَاهُو، رَاهُو بِالفِعْلْ. ‏21 شْنُوَّة تِخْتَارُوا؟ نْجِيكُمْ بِالعْصَا وِلاَّ بِالمْحَبَّة وِالقَلْبْ الحْنِينْ.