رِسَالِةْ بُولُسْ لْرُومَة 12

الحَيَاةْ الجْدِيدَة فِي المَسِيحْ

‏1 هَاذَاكَا عْلاَشْ نُطْلُبْ مِنْكُمْ، يَا إِخْوْتِي، بْرَحْمِةْ اللهْ إِنّْكُمْ تْقَدّْمُوا بْدُونَاتْكُمْ كِيفْ ذْبِيحَة حَيَّة مُقَدّْسَة وْمَقْبُولَة عِنْدْ اللهْ، وْهَاذِي هِيَ عْبَادِتْكُمْ الحَقَّانِيَّة. ‏2 مَا تْقَلّْدُوشْ الحَاجَاتْ الِّي فِي العَالَمْ هَاذَا. آمَا اتْبَدّْلُوا كِتْجَدَدُوا عْقُولْكُمْ بَاشْ تَعْرْفُوا شْنُوَّة هِيَ الإِرَادَة مْتَاعْ اللهْ: الِّي هِيَ صَالْحَة وْمَقْبُولَة وْكَامْلَة.

‏3 رَانِي بِالنِّعْمَة الِّي عْطَاهَالِي رَبِّي نْوَصِّي كُلْ وَاحِدْ فِيكُمْ بَاشْ مَا يَعْمِلْشْ قِيمَة لْرُوحُو أَكْثِرْ مِاللاَّزِمْ، آمَا يَعْطِي لْرُوحُو القِيمَة الِّي يِسْتْحَقّْهَا، كُلْ وَاحِدْ عْلَى قَدْرْ الإِيمَانْ الِّي عْطَاهُولُو رَبِّي. ‏4 رَاهُو كِيفْ مَا فِي بْدَنْ وَاحِدْ عِنْدْنَا بَرْشَة أَعْضَاءْ وِالكُلْهُمْ مَا عِنْدْهُمْشْ الخِدْمَة هِيَ بِيدْهَا، ‏5 هَكَّا أَحْنَا زَادَا رَغْمِلِّي أَحْنَا بَرْشَة رَانَا بْدَنْ وَاحِدْ فِي المَسِيحْ، وْأَعْضَاءْ مْتَاعْ بْعَضْنَا، ‏6 وْعَنْدْنَا مَوَاهِبْ مَا هُمْشْ كِيفْ كِيفْ عْلَى قَدْرْ النِّعْمَة الِّي تِعْطَاتِلْنَا: الِّي عَنْدُو مَوْهِبْةْ النُّبُوَّة خَلِّيهْ تْنَبَّأ بِالإِيمَانْ، ‏7 وِلِّي عَنْدُو مَوْهِبْةْ الخِدْمَة فِي الخِدْمَة، وِلِّي عَنْدُو مَوْهِبْةْ التَّعْلِيمْ فِي التَّعْلِيمْ، ‏8 وِلِّي عَنْدُو مَوْهِبْةْ الوَعْظْ خَلِّيهْ فِي الوَعْظْ، وِلِّي هُوَ كْرِيمْ خَلِّيهْ يَعْطِي مِنْ غِيرْ مَا يِحْسِبْ، وِلِّي هُوَ يْقُودْ خَلِّيهْ يْقُودْ بِالقْدَا، وِلِّي عَنْدُو مَوْهِبْةْ الرَّحْمَة خَلِّيهْ يَرْحِمْ وْهُوَ فَرْحَانْ.

المْحَبَّة

‏9 المْحَبَّة يِلْزِمْهَا تْكُونْ صَادْقَة. أَكْرْهُوا الشَّرْ وْشِدُّوا صْحِيحْ فِي الخِيرْ. ‏10 حِبُّوا بْعَضْكُمْ كِيفْ الإِخْوَة، وْإِكْرْمُوا بْعَضْكُمْ. ‏11 إِخْدْمُوا بَرْشَة وْمَا تَبْخْلُوشْ، كُونُوا حَارِّينْ فِي الرُّوحْ، إِخْدْمُوا الرَّبْ. ‏12 أَفْرْحُوا فِي الأَمَلْ مْتَاعْكُمْ، أُصْبْرُوا فِي الضِّيقْ، وْدَاوْمُوا عْلَى الصَّلاَةْ. ‏13 شَارْكُوا فِي الإِحْتِيَاجْ مْتَاعْ المُؤْمْنِينْ، وْضَيّْفُوا البْرَايْنِيَّة. ‏14 بَارْكُوا الِّي يِضْطَهْدُوا فِيكُمْ، بَارْكُوا وْمَا تِلْعْنُوشْ. ‏15 أَفْرْحُوا مْعَ الفَرْحَانِينْ وْإِبْكِيوْ مْعَ الِّي يِبْكُوا. ‏16 عِيشُوا عَلاَقِتْكُمْ بَاهْيَة مْعَ بْعَضْكُمْ، مَا تِتْكَبّْرُوشْ آمَا خَالْطُوا المِتْوَاضْعِينْ. مَا تِحْسْبُوشْ رْوَاحْكُمْ حُكَمَاءْ. ‏17 مَا تْكَافْؤُوشْ حَتَّى وَاحِدْ عْلَى الشَّرْ بِالشَّرْ آمَا أَحْرْصُوا بَاشْ تَعْمْلُوا الخِيرْ قُدَّامْ النَّاسْ الكُلْ. ‏18 أَعْمْلُوا قَدْ مَا تْنَجّْمُوا بَاشْ تْعِيشُوا فِي سَلاَمْ مْعَ النَّاسْ الكُلْهُمْ. ‏19 يَا حْبَابِي مَا تِنْتَقْمُوشْ، آمَا خَلُّوا الغَضَبْ للهْ، رَاهُو الكْتَابْ المُقَدَّسْ يْقُولْ: «آنَا الِّي نِنْتَقَمْ، يْقُولْ الرَّبْ، وْآنَا الِّي نْجَازِي.» ‏20 آمَا «إِذَا كَانْ عْدُوِّكْ جَاعْ وَكّْلُو، وْإِذَا كَانْ عْطُشْ شَرّْبُو، رَاكْ كِتَعْمِلْ الشَّيْء هَاذَا تْحُطْ جْمَرْ مْتَاعْ نَارْ فُوقْ رَاسُو.» ‏21 مَا تْخَلِّيشْ الشَّرْ يِغْلْبِكْ آمَا إِغْلِبْ الشَّرْ بِالخِيرْ.